Kichay leenaykipaq

Índice nisqaman riy

 38 CAPÍTULO

¿Imaraykun Jesusta munakunanchis?

¿Imaraykun Jesusta munakunanchis?

SICHUS viajasqayki barco unuman chinkaykushanman chayri, ¿munawaqchu pillapas salvanasuykita?... ¿Imaynan sientekuwaq salvaqniyki runa qanta salvaspa wañupuqtin?... Chaytan Jesuspas ruwaran. 37 capitulopi yachasqanchis jina, paymi salvawananchisrayku kausayninta qoran.

¿Imamantan Jesús salvawaranchis? ¿Yuyashankichu?... Arí, juchamanta wañuymantawan. Jesusqa llapa runakunaraykun wañuran. Qan, ¿wañuwaqchu millay runakunata salvanaykipaq?...

Biblian nin: “Juj runa chaninña kanman chaypas, ñak’aytan pipas payraykuqa wañunman, juj allin runaraykuqa ichapaschá pipas wañunman”, nispa. Jesusmi ichaqa ‘juchasapakunarayku’ wañuran. Biblian willawanchis ‘juchasaparaq kashaqtinchis’, arí, mana allinkunata ruwashaqtinchisraq Cristo ‘noqanchisrayku wañusqanta’ (Romanos 5:6-8).

¿Mayqen apostolmi manaraq cristiano kashaspa millay runa karan? ¿Yuyashanki?... Apóstol Pablon. Paymi niran: ‘Jesusqa juchasapakunata salvaqmi kay pachaman jamuran. Noqataqmi chay juchasapakunamanta aswan juchasapaqa kani’, nispa. Kaytan nillarantaq: ‘Noqaqa mana yuyayniyoqmi karani, millaytan kausarani’, nispa (1 Timoteo 1:15; Tito 3:3).

Diosqa anchatan runakunata munakun, chaymi wawanta kachamuran runakunarayku wañunanpaq. Bibliapi maskhay Juan librota, 3 capitulota, 16 versiculota. ¿Leeruwaqchu? “Diosqa  anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq”.

¿Imakunatan Jesús aguantaran noqanchisrayku?

30 capitulopin yacharanchis Jesusta jap’ispa imaymana ruwasqankuta. Ñaupaqtan Caifaspa wasinman aparanku juzganankupaq. Chaypin llulla testigokuna pay contra rimaranku, jujkunataq saqmaranku. Chaypin amigon Pedropas Jesusta negaran. Jesusqa munakuwasqanchisraykun chaykunata aguantaran. ¿Iman chay qhepaman pasaran?

Jesusqa manan chay tuta puñuranchu. Tutallapi juzgasqankuraykun, p’unchayamuqtin jina juezkunata wajachimuranku Jesusta jujmanta juzganankupaq. chaypin Jesusta yapamanta tumparanku: ‘Diospa contranpin juchallikun’, nispa.

Chay qhepamanmi sacerdotekuna Jesusta Pilatoman aparanku. Nirankun: ‘Kay runan reypa contranpi kashan, wañunanmi’, nispa. Ichaqa llullakusqankuta reparaspan Pilato niran: ‘Noqaqa manan imatapas paypiqa tarinichu wañunanpaq jinaqa, chayraykun kacharipusaq’, nispa. Chayta uyarispan sacerdotekunapas juj runakunapas niranku: “Wañuchiy chay runataqa”, nispa.

Pilatoqa yapamantan Jesusta kacharipuyta munaran. Ichaqa sacerdotekunan runakunata tanqaranku kayta ninankupaq: “Chay runatachus kacharipunki chayqa, manan Roma reypa amigonchu kanki”, nispa. Jinan runakunaqa astawanraq qapariranku: ‘¡Wañuchiy! ¡Wañuchiy chay runata!’, nispa. ¿Imatan Pilato ruwaran?...

Runakunata kasuspan Pilatoqa kamachiran Jesusta soq’anankupaq, chaymantataq soldadokunaman entregaran wañuchinankupaq.  Soldadokunaqa Jesusmanta burlakunankupaqmi kiskamanta coronata churaspa ñaupanpi qonqorikuranku. “Calavera pata” nisqaman k’aspita q’epichispataq chakinta makintawan k’aspiman clavaranku. K’aspita sayachiqtinkun k’irinkunamanta yawar lloqsimuran jinaspa cuerpon maytapuni nanaran.

Jesusqa unaymi k’aspipi ñak’ariran. Chaypin sacerdotekuna paymanta burlakuranku, wakin runakunataq niranku: ‘¡Diospa wawan kaspaqa uraykamuy k’aspimanta!’, nispa. Jesusqa noqanchisraykun ñak’arisharan, Diosmi paytaqa kachamuran ch’uya kausayninta qonanpaq. Chay qhepamanmi Jesusqa  las tres tardenta jina papanmanta wajakuspa wañupuran (Mateo 26:36-27:50; Marcos 15:1; Lucas 22:39-23:46; Juan 18:1-19:30).

Adanqa manan Jehová Diosta munakuranchu chaymi mana kasukuranchu. Payqa manan runakunatapas munakuranchu, chaymi paypa juchanpi llapallanchis juchayoq kashanchis. Jesusmi ichaqa Diostapas noqanchistapas munakuwanchis. Payqa tukuypin papanta kasukuran, chaymi kausaynintapas qoran Adanpa chinkachisqanta yapamanta chaskikapunanchispaq.

¿Imaynatan rikuchisunman Jesús munakusqanchista?

May admirakunapaqmi Jesuspa ruwasqanqa ¿riki?... Diosmanta mañakushaspa, ¿“gracias” ninkichu wawan kachamusqanmanta?... Pabloqa anchatan Jesusta agradecekuran, niranmi: ‘Diospa Churinqa noqata munakuwaspan noqarayku wañuran’, nispa (Gálatas 2:20). Jesusqa qanrayku noqaraykun kausayninta qoran wiñay kausayta chaskinanchispaq. Chaymi tukuy sonqowan payta munakunanchis.

Corinto llaqtapi cristianokunatan Pablo niran: “Cristoq munakuyninmi tanqawanku chayta ruwanaykupaq”, nispa. ¿Imamantan Pablo chaypi rimasharan?... Pay kikinmi niran: ‘Cristoqa lliupa allinninpaqmi wañuran, kausaqkunaqa manaña paykunaq munayninkuta ruwanankupaqchu kausanankupaq, aswanpas Cristollapaqña kausanankupaq’, nispa (2 Corintios 5:14, 15).

 ¿Imakunata ruwaspan rikuchiwaq Cristollapaqña kausasqaykita?... Bibliamanta yachasqaykita jujkunaman willaspan. Jinaspapas sapallaykipi kaspan allinkunata ruwanayki. A ver, sapallayki kashaspa, ¿qhawanaykichu televisionpi otaq internetpi Jesuspa cheqnisqan ruwaykunata?... Jesusqa janaq pachapin kashan, rikumushanmi tukuy ruwasqanchistapas.

¿Pin rikumushan ruwasqanchista?

Chaymantapas Jehová Diospa ejemplontan qatikunanchis. Jesusmi niran: ‘Yayaqa munakuwanmi’, nispa. ¿Imaraykun Jehová Dios Jesusta munakuran? ¿Imaraykun noqanchispas Jesusta munakunanchis?... Diosta kasukuspa noqanchisrayku kausayninta qosqanraykun (Juan 10:17). Chaymi Biblia niwanchis: ‘Dios jina kaychis paypa munasqan wawankuna kasqaykichisrayku. Munanakuspa kausaychis imaynan Cristopas munakuwaranchis jinata, payqa noqanchisraykun Diosman entregakuran’, nispa (Efesios 5:1, 2).

Jesusta tukuy sonqowan agradecekunapaq leesun Juan 3:35; 15:9, 10; 1 Juan 5:11, 12.