Kichay leenaykipaq

Índice nisqaman riy

 34 CAPÍTULO

¿Iman suceden wañupuq runakunawan?

¿Iman suceden wañupuq runakunawan?

YACHASHANKICHÁ llapa runapas machuyapusqanta, onqopusqanta, wañupusqantapas. Mayninqa wawakunapas wañupunkun ¿riki? ¿Manchakunanchischu wañuyta otaq wañupuqkunata?... ¿Iman suceden wañupuqkunawan? ¿Yachankichu?...

Kay tiempopiqa manan pipas wañusqanmanta kausarimuranchu wañupuqkuna imaynapi tarikusqanta willawananchispaq. Jesuspa tiemponpin ichaqa juj runa kausarimuran. Chay runaqa Jesuspa amigon Lazaron karan. Payqa Betania llaqtapin tiyaran Marta, María panankunawan. Paymanta yachasqanchismi yanapawasun wañupuqkuna imaymanapi tarikusqankuta yachananchispaq.

Juj kutinmi Lázaro sinchita onqorapuran. Chaymi Martawan Mariawan juj runata kacharanku Jesusman willamunanpaq. Jesusqa manan medicochu karan jampinanpaq, ichaqa Diosmi atiyta qoran onqosqakunata qhaliyachinanpaq. Chaytan Lazaroq panankunaqa yacharanku. Jesusmi ichaqa karu llaqtapi kasharan (Mateo 15:30, 31).

Ichaqa manaraq Jesús chayashaqtinmi Lazaroqa wañupuran. Chayta yachaspan Jesusqa qatikuqninkunata niran: ‘Amigonchis Lazaroqa puñurapunmi, payta rijch’arichiqmi risaq’, nispa. Jesusta qatikuqkunan ichaqa mana entienderankuchu, chaymi  Jesusqa niran: “Lazaroqa wañupunmi”, nispa. ¿Imatan chay nisqanmanta yachanchis?... Wañupuq runakuna misk’i puñuypi jina kasqankutan.

Jesusqa Lazaroq wasintan qatikuqninkunawan kuska riran. Chay ratopaqqa askha runakunan Marta, Mariaq wasinpi kasharanku. Jinan Martaqa Jesuspa chayamushasqanta yacharuspa ñanman ayparan. Mariapas qhepantan rillarantaq. Jinan Mariaqa Jesuswan tuparuspa ñaupanpi qonqorikuspa waqaykuran. Paykunawan kaq runakunapas llapallankun waqasharanku.

Jesusmi tapuran: “¿Maymanmi churamurankichis?”, nispa. Jinan paykunaqa churamusqanku t’oqoman aparanku. Munakusqanchis runa wañupuqtinqa sonqonchismi sinchita nanan ¿riki? Chaymi llapa runakunapas waqasharanku Lazaromanta. Jinan Jesuspas amigonmanta llakikuspa waqaran.

Lazaroq kasqan t’oqoqa rumiwanmi wisq’asqa kasharan. Chaymi Jesusqa niran: “Rumita suchuchiychis”, nispa. ¿Kasukurankuchu?... Martan niran: ‘Señor, ñachá asnashanña, tawa p’unchayñan karun’, nispa.

Chaymi Jesusqa niran: “¿Manachu nirayki: ‘Creenki chayqa, rikunkin Diospa atiyninta’?”, nispa. Chaytaqa nisharan milagro ruwasqanwan Jehová Dios jatunchasqa kanantan. ¿Ima milagrotan ruwaran? Rumita suchuchiqtinkun Jesusqa fuerteta niran: “¡Lázaro, lloqsimuy!”, nispa. ¿Lloqsimuranchu Lázaro?...

¿Rijch’arichiwaqchu puñushaq runata?... Arí, fuerteta wajaqtiykiqa ratollan rijch’arinqa. Wañupuq runari, ¿rijch’arinmanchu fuertetaña wajashaqtiykipas?... Manan ¿riki? Maytaña ladonpi qapariwaq chaypas manan rijch’arinmanchu. Manan qanpas, noqapas, pi runapas wañupuqtaqa rijch’arichiyta atinmanchu.

¿Imatan Jesús ruwashan?

 Jesusmi ichaqa rijch’arichiyta atiran. Papanmi atiyta qoran wañupuqkunata kausarichinanpaq. Chaymi Lazaroqa Jesús wajaqtin jina rijch’arimuran. ¡May admirakunapaqmi karan! Lazaroqa tawa p’unchayñan wañusqa kasharan. Ichaqa kausarimpuspan yapamanta puriripuran, samaripuran, rimaripuran ima (Juan 11:1-44).

Ichaqa, ¿iman Lazarowan sucederan wañupuqtin? ¿Cheqaqtachu cuerponmanta juj alma otaq espíritu lloqsispa juj ladopi kasharan? Chay tawa p’unchay, ¿janaq pachapichu kasharan? ¿Dioswan angelkunawan kuskachu kasharan?...

Manan. ¿Yuyashankichu Jesuspa nisqanta? Payqa niranmi: ‘Lazaroqa puñushanmi’, nispa. Misk’ita puñuruqtiyki, ¿reparankichu ladoykipi imapas pasasqanta?... Rijch’arusqayki qhepaman, ¿yachankichu jayk’a hora puñusqaykita? Manan ¿riki? Relojta qhawaspañan chaytaqa reparanki.

 Kaqllataqmi suceden wañupuqkunawanpas. Paykunaqa manañan imatapas yachankuchu, manan sientenkuchu nitaq imatapas ruwayta atinkuchu. Chhaynan Lazaropas kasharan wañupuspa. Wañupuqkunaqa misk’itapas puñushankuman jinan mana imatapas reparankuchu. Chaymi Biblia nin: ‘Wañupuqkunaqa manan imatapas yachankuchu’, nispa (Eclesiastés 9:5, 10).

¿Imaynapin Lázaro tarikuran wañupuspa?

Kaypi piensasun: Sichus Lázaro chay tawa p’unchay janaq pachapi kanman karan chayqa, willakunmanmi karan ¿riki?... Jinaspapas janaq pachapi kausayqa may sumaqchá. Chaypi kanman karan chayri, ¿kusikunmanchu karan kay allpaman kutichimuqtinku?... Manan ¿riki?

Askha runakunan ninku: “Wañupuqtinchisqa juj alma otaq espiritun cuerponchismanta lloqsispa kausashan”, nispa. Lazaromantapas ninkun: “Wañupusqan qhepamanmi alman juj ladopi kausasharan”, nispa. Bibliaqa manan chaytachu yachachin. Aswanmi willan Jehová Dios ñut’u allpamanta Adanta kamasqan qhepaman, ‘kausayniyoq’ kapusqanta. Willallantaqmi juchallikusqanrayku wañupusqantapas. Wañupuspaqa manañan  imatapas yacharanchu, aswanmi allpaman tukupuran. Bibliaqa willallantaqmi Adanpa juchallikusqanrayku llapa wawankuna juchayoq nacesqanchista wañupusqanchista ima (Génesis 2:7; 3:17-19; Romanos 5:12).

¿Manchakunanchischu wañupuq runakunata?

Wakin runakunaqa manchakunkun wañupuqkunata. Chaymi tutaqa mana cementerioq ladonta pasayta munankuchu. Ninkun: “Wañupuqkunaq almanmi purishan, qhayqaruwasunmanmi”, nispa. ¿Cheqaqtachu wañupuqkuna ima dañotapas ruwawasunman?... Manan ¿riki?

Wakin runakunan ninku: “Wañupuqkunaq almanmi visitamuwasun, mijunata paykunapaq churapusun”, nispa. Chaykunata ruwaq runakunaqa manan Jehová Diospa nisqanpi creenkuchu. Diospi creeq runakunan ichaqa mana manchakunkuchu wañupuqkunata. Aswanmi kausay qowasqanchismanta Diosta “gracias” nispa, paypa nisqanta ruwanku.

Ichaqa tapukushankipaschá: “¿Kausarichinqachu Dios wañupuq wawakunata?”, nispa. Chaymantan qatimuq capitulopi yachasun.

Wañupuqkuna imaynapi tarikusqankuta yachanapaq kay textokunatawan leesun Salmo 115:17; 146:3, 4; Génesis 2:7.