Kichay leenaykipaq

Índice nisqaman riy

 18 CAPÍTULO

¿Gracias ninkichu?

¿Gracias ninkichu?

¿MIJURANKIÑACHU?... ¿Pin mijunata wayk’uran?... Mamaykipaschá wayk’uran. Chaywanpas, ¿imanaqtinmi Diosta agradecekunayki mijunamanta?... Diosmi imaymana clase plantakunata wiñachin, chaykunawanmi wayk’unchis. Ichaqa manan Diosllatachu gracias nina. Mijuna wayk’uqtapas, serviqtapas gracias ninanchismi.

Mayninpin ichaqa qonqanchis gracias niyta. Yaqapaschá jujkuna yanapawaranchis otaq imallatapas ruwapuwaranchis, ichaqa manapaschá gracias niranchischu. Juj kutinmi lepra onqoyniyoq runakuna Jesusta mana agradecekurankuchu.

¿Yachankichu lepra onqoyniyoq runa imayna kasqanta?... Lepra onqoyniyoq runaqa nishutan ñak’arin, aychanmi urmapuyta qallarin. Jesuspa tiemponpi leprayoq runakunaqa manan runakunaman qayllaykunanchu karan. Sichus pipas payman achhuykuq chayqa, willananmi karan onqosqa kasqanta, chhaynapi mana contagiakunanpaq.

Jesusqa khuyapayaranmi lepra onqoyniyoq runakunata. Juj kutinmi Jerusalenman rishaspa juj juch’uy llaqtaman jaykuran. Chay llaqtapi kashaspan lepra onqoyniyoq chunka runakuna payman riranku. Paykunaqa uyarirankun Diospa atiyninwan imaymana onqoyniyoq runakunata Jesús qhaliyachisqanta.

Chay runakunaqa manan Jesusmanqa achhuykurankuchu, aswanmi karullapi sayaranku. Ichaqa iñirankun Jesuspa qhaliyachinanpi. Chaymi Jesusta rikuspa jina wajakuranku: “¡Jesús, yachachikuq, khuyapayaykuwayku!”, nispa.

 ¿Khuyapayankichu lepra onqoyniyoq runakunata?... Jesusqa khuyapayaranmi. Yacharanmi ñak’arisqankuta. Chaymi Jesusqa paykunata niran: “Phaway riychis, jinaspa sacerdotekunawan qhawachikamuychis”, nispa (Lucas 17:11-14).

¿Ima niranmi Jesús lepra onqoyniyoq runakunata?

¿Imarayku chayta niran? Diosmi lepra onqoyniyoq runakunapaq juj kamachikuyta qoran. Chay kamachikuy nisqanman jinaqa sacerdoten lepra onqoyniyoq runaq aychanta qhawarinan karan, chay onqoy chinkanchus icha manachus chayta ninanpaq. Chayraqmi qhali runakunawan tiyayta atiranku (Levítico 13:16, 17).

Ichaqa chay runakunaq lepra onqoyninqa manaraqmi chinkaranchu. Chaywanpas, ¿rirankuchu sacerdoteman?... Arí,  usqhayllan riranku. Iñirankun Jesuspa qhaliyachinanpi. ¿Iman chay qhepaman pasaran?

Ñanta purishaqtinkun aychanku allinman tukupuran. Arí, lepra onqoyninkun chinkapuran. Jesuspi iñisqankurayku onqoyninkumanta qhaliyachisqa karanku. ¡Anchatachá paykunaqa kusikuranku! Ichaqa, ¿imaynatan rikuchinkuman agradecekusqankuta? ¿Imatan qan ruwawaq karan?...

¿Imatan kay runa ruwashan?

Chunkantin runakunamantan jujlla kutimuran Jesuspa kasqanman. Jinan Diosta jatuncharan. Chay ruwasqanqa allinpunin karan, ¿imarayku? Diospa atiyninwanmi Jesusqa chay runata qhaliyachiran. Jinaspapas chay runaqa Jesuspa ñaupaqenpi qonqorikuspan Jesusta gracias niran. Anchatan agradecekuran onqoyninmanta qhaliyachisqanta.

Ichaqa, ¿iman pasaran isqon runakunawan? Jesusmi chay runata tapuran: ‘¿Manachu chunka runakuna qhaliyachisqa karanku? Chhaynaqa, ¿maytaq wakinkunari? ¿Qanllachu kutimuranki Diosta jatunchaq?’, nispa.

 Chunkantin runakunamantan jujlla kutimuran Diosta jatunchaq, Jesustapas gracias niran qhaliyachisqanmanta. Chay runaqa Samaria llaqtamantan karan. Isqon runakunan ichaqa mana agradecekurankuchu Diostapas Jesustapas (Lucas 17:15-19).

¿Mayqen runa jinan kayta munanki? Samaria llaqtayoq runa jinan kayta munawaq ¿riki?... Chhaynaqa, pipas yanapasuqtiyki, otaq imallatapas qosuqtiyki, ¿imatan ninayki?... Gracias ninaykin. Wakin runakunaña qonqanku gracias niyta chaypas, qanqa gracias ninaykin. Chayta ruwaqtiykiqa Jehová Diosta Jesustawanmi kusichinki.

¿Imaynapin agradecekuq runa jina kawaq?

Jujkunaqa imaymanatan qanpaq ruwaranku. ¿Jayk’aqllapas onqorankichu?... Manapaschá chay chunka runakuna jinachu nishuta onqoranki. Ichaqa yaqapaschá gripewan otaq wijsa nanaywan karanki. ¿Pitaq chhaynapi tarikuqtiyki cuidarasunki?... Yaqapaschá ima jampillatapas qorasunkiku otaq sumaqta atienderasunkiku. ¿Kusikurankichu qhaliyanaykipaq yanapasqasuykikumanta?...

Samaritano runaqa Jesustan gracias niran qhaliyachisqanmanta. Jesusqa kusikuranmi chayta uyarispa. Sichus mamaykita otaq papaykitapas gracias ninki imaymana ruwasqankumanta chayqa, ¿kusikunqakuchu icha manachu?... Riki, kusikunqakun.

¿Imanaqtinmi mana qonqanachu gracias niyta?

 Askha runakunan qanpaq imaymanata ruwanku. Yaqapaschá paykunaq obligacionnin chaykunata ruway, kusisqataqchá chaykunata ruwanku. Ichaqa manapaschá gracias ninkichu chaykunamanta. Profesoraykipas kallpachakunchá yachachinasuykipaq. Sichus payta gracias ninki chayqa anchatan kusikunqa.

Wakin runakunaqa imallapipas yanapawanchismi. ¿Pillapas punkuta kicharasunkichu wasiman jaykunaykipaq? ¿Pillapas mijunata jaywarasunkichu? Allinmi kanman chaykunamanta gracias niyqa.

Sichus yanapawaqninchis runakunata gracias nisun chayqa, manan qonqakusunchu Jehová Diosta gracias niytapas. ¡Imaymanamantan Diostaqa gracias ninanchis! Paymi kausayta qowanchis, kausanapaq tukuy imaymanatapas. Chayraykun sapa p’unchay Jehová Diosninchista gracias ninanchis.

Gracias niyta yachanapaq leesun Salmo 92:1; Efesios 5:20; Colosenses 3:17; 1 Tesalonicenses 5:18.