Kichay leenaykipaq

Índice nisqaman riy

 25 CAPÍTULO

¿Cambiankumanchu millay runakuna?

¿Cambiankumanchu millay runakuna?

MAY allinchá kanman llapanchispas allin kaqllata ruwasunman chayqa ¿riki?... Ichaqa llapallanchismi mana allinkunata ruwanchis. ¿Imarayku?... Juchayoq runa kasqanchirayku. Wakin runakunan ichaqa aswan millaykunata ruwanku. Runamasinkuta sinchita cheqnikuspan k’irinku. ¿Cambiankumanchu chhayna runakuna?...

Rikushankichu Saulo waynata, payqa Estebanta rumiwan ch’aqeqkunaq p’achantan qhawashan. Hebreo rimaypiqa Saulon sutinqa karan, Roma llaqtapitaq reqsiranku Pablo sutiwan. Sauloqa kusikushanmi Estebanta wañuchisqankumanta. Qhawarisunchis imaraykun Saulo millay runa karan chayta.

Sauloqa fariseo religionmantan karan. Chay religionpi kaqkunaqa Diospa qelqantan jap’iranku, ichaqa umallikunaq nisqantan kasukuqku. Chaymi Sauloqa millay runa karan.

Sauloqa Jerusalenpin kasharan Estebanta juzgashaqtinku. Chaypin wakin fariseokunapas kasharanku. Estebanmantan imaymana millaykunata nisharanku, chaywanpas Estebanqa manan manchakuranchu. Chaymi mana manchakuspa juezkunaman Jehová Diosmanta Jesusmantawan willaran.

Chayta uyarispan juezkunaqa phiñakuranku. Paykunaqa yacharankun Jesusmanta, ichaqa yanqamanta tumpaspan wañuchiranku. Jehová Diosmi ichaqa Jesusta kausarichispa janaq pachaman apapuran. Chay juezkunaqa manapunin cambiarankuchu.  Chaymi qhepaman Jesuspa qatikuqninkunatañataq qatikachayta qallariranku.

Chay juezkunan Estebanta jap’ispa jawa llaqtaman aparanku, chaypin rumiwan ch’aqespa wañuchiranku. Chaytan Saulo qhawasharan kay dibujopi rikusqayki jina. Payqa allinpaqmi qhawariran Esteban wañuchisqankuta.

¿Imaraykun Saulo kusikuran Estebanta wañuchiqtinku?

¿Imaraykun Saulo chhayna karan?... Payqa unay tiempoñan fariseo religionpi karan, chaymi allinpaq qhawariran chay religionpi umalliqkunata. Payqa paykuna jinan kayta munaran (Hechos 7:54-60).

¿Imatan Saulo ruwaran Estebanta wañuchisqanku qhepaman?... Sauloqa Jesuspa qatikuqninkunatan chinkachiyta munaran. Chaymi payqa wasinkuta jaykuspa qharitapas warmitapas aysaspa orqomuq, jinaspa carcelpi wisq’achiq. Chaymi Jesuspa qatikuqninkunaqa juj llaqtakunaman ayqekuranku. Paykunaqa chay llaqtakunapipas predicashallarankun (Hechos 8:1-4).

 Chayta yachaspan Sauloqa astawan phiñakuran. Chaymi sacerdotekunaq jefenwan parlaq riran. Chay sacerdoten autorizaran Damasco llaqtapi kaq cristianokunata jap’imunanpaq. Sauloqa chay cristianokunatan Jerusalenman apayta munaran castiganankupaq. Ichaqa ñanta rishaqtinmi admiranapaq pasaran.

¿Pin Saulowan rimashan? ¿Imata ruwananpaqmi kamachishan?

Qonqayllan cielomanta juj k’anchay payman k’anchaykamuran, jinan Sauloqa kayta uyariran: “Saulo, Saulo, ¿imanaqtinmi qatikachawashanki?”, nispa. ¡Jesusmi cielomanta rimamusharan! Chay k’anchaymi Saulota ñausayachiran. Chaymi paywan viajaqkuna Damasco llaqtaman aparanku.

Kinsa p’unchay qhepamanmi Jesusqa Damasco llaqtapi Ananías qatikuqninman rijuriran. Paytan kamachiran Saulota visitaspa ñawinta qhawarichimunanpaq Jesusmanta willananpaq ima. Chay qhepamanmi Sauloqa qhawaripuran. Jinan kausayninta cambiaspa Diosta serviran (Hechos 9:1-22).

¿Imaraykun Saulo mana allinkunata ruwaran?... Pantasqa yachachikuykunapi creesqanraykun. Payqa pantasqa religionpin karan, Diosta mana kasukuq runakunawantaqmi juñukuran. Chhaynaqa, ¿iman payta yanaparan kausayninta cambiananpaq Diosta servinanpaqpas?... Diosmanta cheqaq yachachikuyta uyarikusqanmi. Payqa manan Diostaqa cheqnikuranchu, chaymi cheqaq yachachikuyta yacharuspa cambiapuran.

¿Iman chay qhepaman pasaran?... Sauloqa Jesuspa apostolninmi kapuran, Pablo sutiwantaq reqsiranku. Paymi Bibliapi tarikuq askha cartakunata qelqaran.

Askha runakunan Saulo jina kanku, chaywanpas atinkumanmi cambiayta. Ichaqa manan facilchu. Juj millay angelmi runakunata tanqashan mana allinkunata ruwanankupaq. ¿Pin chay  ángel?... Damasco llaqtaman rishaqtinmi Saulota Jesús niran: ‘Noqan kachasayki runakunaq ñawinkuta kicharinaykipaq, tutayaqmanta k’anchayman kutirichimunaykipaq, Satanaspa makinmanta Diosman kutirichimunaykipaqwan’, nispa (Hechos 26:17, 18).

Arí, Satanasmi llapa runakunata tanqashan mana allinkunata ruwanankupaq. ¿Facilchu qanpaq allin kaqta ruway?... Manan facilchu ¿riki? Satanasmi imaymanata ruwan mana allinkunata ruwananchispaq. Ichaqa, ¿imaraykun sasa kallanmantaq allin kaqta ruway?... Juchayoq runa kasqanchisraykun.

Chhaynaqa, ¿imatan ruwananchis?... Kallpachakunanchismi allin kaqta ruwananchispaq. Sichus chayta ruwasun chayqa, Jesusmi munakuwasun yanapawasun ima.

Jesusqa munakuranmi millay kausayninkuta cambiaq runakunata. Yacharanmi allin kaqta ruway sasa kasqantapas. Chay tiempopin wakin warmikuna askha qharikunawan puñuqku. Chay ruwayqa juchan. Chaymi Bibliapi chay warmikunata nikun: “Qhelli kausaypi puriq warmikuna”, nispa.

¿Imaraykun Jesús kay juchallikuq warmita perdonaran?

 Juj kutinmi Jesusqa juj fariseoq wasinpi kasharan. Chaymanmi qhelli kausaypi puriq warmi riran. Chay warmiqa Jesuspa chakinpin waqaykuran, chujchanwan chakinta ch’akichispataq sumaq perfumewan jich’aykuran. Juchanmanta sinchita pesapakusqanraykun Jesusqa perdonaran. Chay ruwasqantan fariseoqa mana allinpaq qhawariran (Lucas 7:36-50).

¿Ima nispan Jesús juj kutipi niran juj fariseokunata?... Niranmi: ‘Qhelli kausaypi puriq warmikunan qankunaq ñaupaykichistaraq Diospa gobiernonman rishanku’, nispa (Mateo 21:31). ¿Imaraykun chayta niran? Chay warmikuna paypi creespa cambiasqankuraykun. Fariseokunan ichaqa Jesuspa qatikuqninkunata qatikachashallaranku.

Sichus Bibliata leespa reparasun mana allinkuna ruwasqanchista chayqa cambiananchismi. Diospa tukuy kamachiwasqanchistan sonqomanta kasukunanchis. Chhaynapin Jehová Diosta kusichisun wiñay kausaytapas chaskisun.

Allinkunata ruwanapaq kay textokunatawan leesun Salmo 119:9-11; Proverbios 3:5-7; 12:15.