Kichay leenaykipaq

Índice nisqaman riy

 47 CAPÍTULO

Armagedón guerran chayamushan

Armagedón guerran chayamushan

¿IMATAN nikun “señal” nispa?... 46 capitulopin yacharanchis Jehová Dios jatun parawan runakunata manaña wañuchinanpaq k’uychita juj señalta jina churasqanta. Apostolkunapas juj señaltan Jesusmanta mañakuranku. ¿Imapaq? Kutimusqanta yachanankupaq, kay pachaq tukukuynin chayamushasqanta yachanankupaq ima (Mateo 24:3).

Chay tiempopaqqa janaq pachapiñan Jesusqa espíritu cuerpopi kanan karan. Chaymi kamachikuy qallarisqanta yachanankupaq señalkunata rikunanku karan. Chaymi Jesusqa qatikuqninkunaman willaran imakunachus kay allpapi pasananta. Chay señalkunata rikuspan yachananku karan Jesuspa kutimusqanta, janaq pachapi kamachikuyta qallarisqantapas.

Jesusmi munaran chay p’unchayta makilla suyanankupaq.  Chaymi paykunata niran: “Qhawariychis higos sach’ata, llapa wakin sach’akunatapas. Raphichankunaq ch’ijchimusqanta rikuspaykichismi qankunaqa yachankichis paray tiempo cercapiña kashasqanta ¿riki?”, nispa. Sach’akunata qhawarispan yachanchis paray tiempo cercapiña kashasqanta. Jesuspa willasqankuna junt’akusqanmi rikuchiwallanchistaq armagedón guerra cercapiña kashasqanta (Lucas 21:29, 30).

¿Imatan Jesús yachachiran higos sach’amanta rimaspa?

Kay paginapi qatimuq paginapiwan dibujokunan rikuchiwanchis Diospa gobiernon  cercapiña kashaqtin imakuna pasananta. Chay señalkuna junt’akuqtinmi rey Jesucristo llapa gobiernokunata chinkachipunqa, chaytan yacharanchis 46 capitulopi.

Allinta qhaway ñaupaq paginakunapi dibujokunata, chaykunamantan kunan rimasunchis. Mateo 24:6-14; Lucas 21:9-11 textokunapin chaykunamanta willashan. Sapanka dibujoq ladonpin kashan juj número, chay numerokunan qatimuq parrafokunapi numerokunawan tupashan. Kunanqa yachasun Jesuspa willasqan señalkuna kay tiemponchispi junt’akusqanmanta.

1) Jesusmi niran: “Tukuyneqpi guerrakuna kasqanmantan uyarinkichis [...]. Juj nacionmi juj nación contra jatarinqa”, nispa. ¿Uyarirankichu noticiakunapi guerrakuna kasqanmanta?... Primera guerra mundial nisqan karan 1914-1918 watakunapi, chay qhepamantaq segunda guerra mundial karan 1939-1945 watakunapi. ¡Manan jayk’aqpas chhayna guerrakuna karanchu! Kunanpas allpantinpin guerrakuna kashan. Sapa p’unchaymi televisionpi, radiopi, periodicokunapipas guerrakunamanta uyarinchis.

2) Jesusmi nillarantaq: “Kayneqpi chayneqpin kanqa yarqaypas”, nispa. Yaqapaschá yachanki wakin nacionkunapi mijuy mana aypasqanta. Chay llaqtakunapin sapa p’unchay waranqanpi runakuna yarqaymanta wañushanku.

3) Jesusmi nillarantaq: ‘Kayneqpi chayneqpin kanqa mast’arikuq millay onqoykuna’, nispa. ¿Imaynan chay onqoykuna?... Chay onqoykunaqa askha runakunatan wañuchin. Jujninmi karan gripe española nisqa onqoy. Chaymi 20 millón runakunata juj watallapi wañuchiran. Yaqapaschá sida onqoywan aswan askha wañunqaku. Jinaspapas sapa watanmi waranqanpi runakuna wañushanku cáncer onqoywan, sonqomanta onqoykunawan, juj onqoykunawanpas.

 4) Jesusmi nillarantaq: ‘Kayneqpi chayneqpin kanqa terremotokuna’, nispa. ¿Imaynan juj terremoto?... Allpan kuyurispa wasikunata thunin chay ukhupi kaqkunatataq wañuchin. 1914 watamantapachan sapa wata terremotokuna karan. ¿Uyarirankichu chaykunamanta rimaqta?...

5) Jesusmi nillarantaq tukukuy p’unchaykunapi ‘mana allin kausay yapakunanta’. Kunanqa nishutan yapakushan suwakuna mana allinkunata ruwaqkunapas. Pachantinpi runakunan manchasqa kashanku wasinkuta suwanankumanta. Manan jayk’aqpas kunan tiempopi jinaqa karanchu mana allin ruwaykuna wañuchinakuykunapas.

6) Jesusmi nillarantaq: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa. Chayqa juj importante señalmi karan (Mateo 24:14). Sichus ‘allin willakuykunata’ cheqaqpaq qhawarinki chayqa, jujkunamanmi chayta willanayki. Chayta ruwaspan qanpas yanapakunki chay profeciaq junt’akusqanpi.

Wakin runakunan ninku: “Jesuspa willasqanqa ñaupa tiempomantapachan rikukuran”, nispa. Ichaqa kay tiempopin Jesuspa willasqan llapallan junt’akushan, allpantinpitaqmi rikukushan. ¿Imatan rikuchiwanchis chay señalkunaq junt’akusqan?... Millay runakuna tukupuqtin, sumaq kausay qallarinanpaq pisillaña tiempo kasqantan.

Chay señalkunamanta rimashaspan Jesusqa nillarantaq: ‘Diosmanta mañakushallaychis ayqenaykichis p’unchay ama chiri tiempopichu kananpaq’, nispa (Mateo 24:20). ¿Imatan chaywan nisharan?...

 Sichus juj runa juj terremotomanta otaq imamantapas sinchi chiri tiempopi ayqekunman chayri, ¿iman pasanman?... Sasatan ayqenman otaq mana ayqeyta atinmanchu. Imaymanawan afanakuspa chiri tiempopi ayqekusqanraykun qasa otaq rit’i jap’iqtin wañunman. Chayqa may llakikunapaqmi kanman ¿riki?...

¿Imatan Jesús yachachiran chiri tiempopi ayqekuymanta rimaspa?

¿Imatan Jesús yachachisharan chiri tiempopi ayqekuymanta rimaspa?... Armagedón guerra cercapiña kasqanrayku Jehová Diosta servinanchis kasqantan. Chayta ruwaspan Dios munakusqanchista rikuchisun. Sichus tiempoq pasananta suyasunman chayqa, manañan tiempo kanmanchu salvakunanchispaq. Noepa tiemponpi runakuna jinachá kasunman. Paykunaqa uyarirankun Noepa willasqanta ichaqa manan arcaman jaykurankuchu.

Qatimuq capitulopin yachasunchis armagedón qhepaman imaynachus kausay kananmanta. Chaypin yachasunchis Diosta serviqkunapaq imatachus Jehová Dios ruwananmanta.

Kay textokunan rikuchillantaq armagedón guerra cercapiña kasqanta 2 Timoteo 3:1-5; 2 Pedro 3:3, 4.