Kichay leenaykipaq

Índice nisqaman riy

 44 CAPÍTULO

Amigonchiskunaqa Diostan munakunanku

Amigonchiskunaqa Diostan munakunanku

LLAPALLANCHISMI kusikunchis amigonchiskunawan parlaspa, pujllaspa otaq imatapas ruwaspa. Ichaqa allintan amigonchiskunata ajllananchis. ¿Pitaq cheqaq amigonchis kanman?... Jehová Diosmi.

¿Atisunmanchu Diospa amigon kayta?... Arí, atisunmanmi, ñaupa tiempopi kausaq Abrahán runapas ‘Jehová Diospa amigonmi’ karan (Santiago 2:23). ¿Imaraykun Diospa amigon karan?... Diosta kasukusqanrayku. Arí, sasa ruwaykunataña Dios kamachiran chaypas payqa kasukuranmi. Noqanchispas Jehová Diospa amigon kanapaqqa Abrahán jinan kasukuq kananchis. Chaytan Jesuspas ruwaran (Génesis 22:1-14; Juan 8:28, 29; Hebreos 11:8, 17-19).

¿Imaraykun Abrahán “Diospa amigon” karan?

 Jesusmi apostolninkunata niran: “Kamachikuyniykunatachus kasukunkichis chayqa, amigoykunan kankichis”, nispa (Juan 15:14). Jesusqa Diospa kamachikusqantan jujkunaman kamachiran. Jesusta kasukuqkunaqa Jehová Diostan kasukusharanku. Jesuspa amigonkunaqa Diostan munakuranku.

Jesuspa amigonkunaqa karan apostolkunan, paykunan 75 paginapi kashanku. Jesuswan kuska paykunaqa juj llaqtakunata viajaranku predicamunankupaq. Kuskan mijuranku, Diosmanta rimaranku, juj ruwaykunatapas ruwaranku. Ichaqa askhan karan Jesuspa amigonkunaqa. Paykunawanmi mayninpi juñukuq juj rato kusirikunankupaq.

Betania llaqtapin juj familia tiyaran, chayqa tarikuran Jerusalén qayllallapin. Chay familiawanmi Jesusqa mayninpi juñukuq. ¿Pikunan karanku?... María, Marta, Lazaropiwan. Lazaroqa Jesuspa amigonmi karan (Juan 11:1, 5, 11). Chay familiaqa  Jehová Diostan munakuran, chaymi Jesuspas paykunata munakuran, kusikurantaqmi paykunawan juñukuspa.

¿Imaraykun Jesús kay familiata visitallaqpuni Jerusalenta rispa? ¿Yachankichu sutinkuta?

Jesusqa Jehová Diosta mana serviq runakunatapas sumaqtan rikuran. Chaymi mayninpi paykunaq wasinpi mijuran. Chayta rikuspan jujkuna niranku: “Impuesto cobraqkunaq juchasapakunaq amigonmi”, nispa (Mateo 11:19). Jesusqa manan chay runakunaq kausayninta allinpaq qhawarisqanraykuchu wasinkuta riran, aswanpas Diosmanta yachachinanpaqmi. Yanapaytan munaran millay kausayninkuta saqepuspa Diosta servinankupaq.

¿Imaraykun Zaqueo juj sach’aman seqaran?

Juj kutinmi Jesusqa Jericó llaqtaman riran. Jinan Zaqueo runa Jesusta rikuyta munaran, ichaqa manan atiranchu askha runakuna Jesuspa ladonpi kasqanrayku. Jinaspapas juch’uy runallan karan. Jinan payqa juj sach’aman seqaruran Jesusta rikunanpaq.

Zaqueota rikuspan Jesusqa niran: “Zaqueo, usqhaylla uraykamuy, kunan p’unchaymi wasiykipi qhepakunay”, nispa. Zaqueoqa qhapaq runan  karan, mana allinkunatataqmi ruwaranpas. ¿Imaraykun Jesús chhayna runaq wasinta riran?...

Diosmantan yachachiyta munaran. Zaqueoqa imaymanatan ruwaran Jesusta rikunanpaq. Chaypin Jesusqa repararan Diosmanta yachay munasqanta. Chayraykun Jesusqa yachachiyta munaran imaynatachus Dios munan kausananchista chayta.

¿Imaraykun Jesús Zaqueota visitaran? ¿Imatan Zaqueo prometeran?

¿Iman chay qhepaman pasaran?... Jesuspa yachachisqanmi Zaqueoq sonqonman chayaran. Chaymi runakunata engañasqanmanta pesapakuspa suwakusqan qolqeta kutichipunanpaq prometeran. Chaytan dibujopi rikushanchis. Chaymantataq Jesuspa qatikuqnin kapuran. Chayraqmi Zaqueoqa Jesuspa amigon kapuran (Lucas 19:1-10).

¿Imatan noqanchispas Jesús jina ruwananchis?... Arí, Diosta mana serviq runakunatan visitananchis. Ichaqa manan paykunaq ruwasqanta allinpaq qhawarisqanchisraykuchu, nitaq paykunawan kuska mana allinkunata ruwananchispaqchu. Aswanpas Diosmanta willananchispaqmi visitananchis.

 Kusikunchismi munakusqanchis amigonchiskunawan kaspaqa. Ichaqa cheqaq amigonchiskuna kanankupaqqa Jehová Diostan munakunanku. Wakin amigonchiskunaqa manapaschá Diosta reqsinkuchu, ichaqa Diosmanta yachayta munanku chayqa, yachachisunmanmi. Sichus paykunapas Diosta munakunqaku chayqa, cheqaq amigonchiskunan kapunqaku.

¿Iman yanapawasunman cheqaq amigota ajllakunapaq? Kaykunatan qhawarinayki: ¿Mana allintachu jujkunata tratan? Chay ruwasqanqa manan allinchu ¿riki?... ¿Mana allinkuna ruwasqanmantachu sapa kutilla sasachakuypi tarikun? Manan munasunmanchu pay jina ima sasachakuypipas tarikuytaqa ¿riki?... ¿Pakallapichu mana allinkunata ruwan? Manaña jujkuna rikunkumanchu chaypas, Diosqa rikushanmi ruwasqantaqa ¿riki?... ¿Allinchu kanman chhayna runakunawan amigontin kay?...

Biblian willan amigonchiskuna allin otaq mana allin ruwayman tanqawasqanchista. Bibliaykipi maskhay 1 Corintios 15 capitulota, 33 versiculota. ¿Tarirunkiñachu?... Chaypin nin: “Aman piwanpas engañachikunkichischu. Mana allin runakunawan juñukuspaqa allin ruwaykunatan qonqapunkichis”, nispa. Arí, mana allin runakunawan juñukuspaqa mana allinkunatan ruwasun, allin runakunawan juñukuspan ichaqa allinkunata ruwasun.

Manan qonqananchischu Jehová Dios aswan importante amigonchis kasqanta. Manan munasunmanchu imapas Diosmanta t’aqawananchistaqa ¿riki?... Chaymi Diosta munakuq runakunallawan amigontin kananchis.

Cheqaq amigokunata ajllakuyqa allinpunin, chaypaq leesun Salmo 119:115; Proverbios 13:20; 2 Timoteo 2:22; 1 Juan 2:15.