Kichay leenaykipaq

Índice nisqaman riy

 21 CAPÍTULO

¿Alabakuqchu kananchis?

¿Alabakuqchu kananchis?

¿IMATAQ alabakuq kayri? ¿Yachankichu?... ¿Yaqachu juj p’unchay pelotata jayt’ashaqtiyki otaq bicicletata manejashaqtiyki juj compañeroyki nirasunki: “Noqan aswan allintaqa yachani”, nispa?... Chhaynata rimaqqa alabakushanmi.

¿Kusisqachu kanki chhayna erqekunawan juñukuspa?... Sichus qanpas chay erqekuna jina kawaq chayri, ¿ima ninmanmi jujkuna qanmanta?... ¿Allinchu jujkunata “noqan aswan allinqa kani” niy?... ¿Ima ninmi Jehová Dios chhayna runakunamanta?...

Jesús kay allpapi kashaqtinpas karanmi chhayna runakuna. Paykunaqa jujkunamanta aswan allinpaq creekuspan runakunata pisichaqku. Chaymi Jesusqa juj willakuyta willaran. Chaypin rikuchiran alabakuq kay mana allinchu kasqanta. Chaymanta kunan yachasun.

Jesusmi willaran juj fariseo runamanta impuestota cobraq runamantawan. Fariseokunaqa religioso runakunan karanku. Ichaqa aswan allin runakunapaqmi creekuqku. Chay runas templota risqa Diosmanta mañakuq.

¿Piqpa mañakusqantan Dios uyariran? ¿Imarayku?

Impuesto cobraqpas templotas risqa Diosmanta mañakuq. Runakunaqa manan allinpaqchu qhawariqku impuesto cobraqkunata. Wakinqa manan honradochu karanku. Chaymi impuesto cobraqkunata niqku: “Paykunaqa suwakunan kanku”, nispa.

Fariseon khaynata mañakusqa: ‘Diosníy, graciastan qoyki. Manan wakin runakuna jinachu kani suwakuq, mana allinkunata  ruwaq. Manallataqmi kay impuesto cobraq runa jinapaschu kani. Noqaqa semanapin iskay kutita mana mijunichu qanpi piensanaypaq. Tukuy adquirisqaymantan diezmotapas qoni’, nispa. Chay runaqa juj runakunamanta aswan allinpaqmi creekuran ¿riki?... Jinaspapas Jehová Diosmanraqmi tukuy chaykunata willakusharan.

Impuesto cobraqmi ichaqa jujnirayta mañakusqa. Payqa manan janaq pachallatapas qhawarisqachu, aswansi karullapi sayaykusqa, jinas k’umuykuspa Diosmanta mañakusqa. Juchanmanta sinchita pesapakuspan qhasqonta takakusqa. Manataqsi payqa alabakusqachu allinkuna ruwasqanmanta. Aswansi Diosta nisqa: ‘Diosníy, khuyapayaykuway noqa juchasapa runata’, nispa.

¿Piqpa mañakusqantan Jehová Dios uyarinman karan? ¿Allinman tukuq fariseoq mañakusqantachu icha juchanmanta pesapakuspa impuesto cobraqpa mañakusqantachu?...

Arí, impuesto cobraq runatan uyariran. ¿Imarayku? Jesusmi niran: ‘Jatunchakuqqa k’umuchisqan kanqa, k’umuykukuqtaq jatunchasqa kanqa’, nispa (Lucas 18:9-14).

¿Imatan Jesús chaywan yachachisharan?... Juj runakunamanta aswan allinpaq creekuyqa mana allinchu kasqantan. Yaqapaschá ninchis: “Noqaqa manan alabakunichu”, nispa. Ichaqa imapas ruwasqanchispin  rikuchisunman alabakuq kasqanchista. ¿Yaqachu jayk’aqllapas alabakuranki ima ruwasqaykimantapas?... Apóstol Pedropas alabakuranmi, chaymanta kunan yachasun.

Jesusmi apostolninkunata niran: ‘Kunan tutan llapallaykichis saqerpariwankichis’, nispa. Chaymi Pedroqa alabakuspa niran: ‘Llapankuña saqesunkiku chaypas, noqaqa manapunin saqesaykichu’, nispa. Pedroqa alabakusharanmi chayta nispa. Chay qhepallamanmi Jesusta saqeran. Ichaqa mana allin ruwasqanmanta pesapakuspan kutimpuran. 30 capitulopin chaymanta astawan yachasun (Mateo 26:31-33).

Kunanqa kaypi piensay. Yaqapaschá juj p’unchay qantapas compañeroykitapas profesor tapusunkichis. Jinaspa qan allinta kutichinki. Kusikunkichá allin kutichisqaykimantaqa. Ichaqa, ¿chayraykuchu ninayki: “Noqan compañeroymantaqa aswan allinta yachani”, nispa?... ¿Allinchu kanman mana yachasqanrayku compañeroykita p’enqayman churay?...

Chaytan fariseo runa ruwaran. Payqa impuesto cobraqmanta aswan allinpaqmi creekuran. Ichaqa Jesusmi niran chhayna piensasqan mana allinchu kasqanta. Yaqapaschá noqanchispas imatapas allinta ruwasunman, ichaqa manan chayraykuchu aswan allinpaq creekunanchis.

¿Astawan yachaqkunachu jujkunamanta aswan allin kanku?

Imatapas aswan allinta yachasunman chayri, ¿alabakunachu?... A ver niway, ¿pin ñosqhonninchista ruwaran?... Diosmi ¿riki? Jinaspapas ima yachasqanchistapas jujkunan yachachiwaranchis otaq juj libropi leeranchis. Noqallanchismanta yacharanchis chaypas, ¿imaynapin yacharanchis?... Diosmi ñosqhonta qowaranchis chaykunata yachanapaq.

Sichus pipas kallpachakun imatapas allinta ruwananpaq chayqa, “allinmi ruwasqayki” ninaykin. Ichaqa imapas faltanmanraq  chayqa, yanapariy allinta ruwananpaq. Qanpas munawaqmi yanapanasuykita ¿riki?...

¿Imaraykun mana alabakunachu aswan kallpayoq kaspa?

Wakinqa jujkunamanta aswan kallpayoqmi kanku. Sichus qan sullk’aykimanta otaq kuraqniykimanta aswan kallpayoq kashanki chayqa, ¿alabakunaykichu?... Manan ¿riki? Mijuspanchismi kallpayoq kanchis. ¿Pin mijuykunata wiñachin?... Arí. Jehová Diosmi parata, ruphayta qowanchis mijuykuna wiñananpaq. Chaymi aswan kallpayoq kaspaqa Diosta “gracias” ninanchis (Hechos 14:16, 17).

Manan pipas munanchischu alabakuq runakunawan kaytaqa ¿riki?... Jesusmi niran: “Imaynatachus runakuna ruwanasuykichista munankichis, chhaynallatataq qankunapas paykunata ruwaychis”, nispa. Jesuspa nisqanta kasukusun chayqa, manan alabakuq fariseo jinachu kasun (Lucas 6:31).

Juj kutinmi juj runa Jesusta niran: “Allin yachachikuq”, nispa. ¿Ima niranmi Jesús? ¿“Arí, allin runan kani” niranchu?... Manan chaytachu niran.  Aswanmi niran: “Manan pipas allinqa kanchu, aswanpas Diosllan”, nispa (Marcos 10:18). Jesusqa allin yachachikuqmi karan. Ichaqa manan alabakuranchu, aswanmi papanta alabaran.

Chhaynaqa, ¿pitan noqanchispas alabananchis?... Arí, Jehová Diostan. Tardenta inti sumaqta chinkaykuqtin otaq Diospa sumaq kamasqankunata rikuspan nisunman: “¡Jehová Diosninchismi chaytaqa ruwaran!”, nispa. Jinaspapas llapa runamanmi willananchis Diospa sumaq ruwasqanmanta jamuq tiempopi ruwananmantapas.

¿Pitan kay wawa alabashan?

¿Ima ninmi Biblia jatunchakuq kaymanta? ¿Imatan ruwasunman mana jatunchakuq kanapaq? Chaypaq leesun Proverbios 16:5, 18; Jeremías 9:23, 24; 1 Corintios 4:7; 13:4.