Kichay leenaykipaq

Índice nisqaman riy

 20 CAPÍTULO

¿Ñaupaqllapichu kayta munanchis?

¿Ñaupaqllapichu kayta munanchis?

WAKIN wawakunaqa ancha allinpaqmi qhawarikunku. ¿Reqsinkichu chhayna wawakunata?... Colapi kaspapas jujkunata tanqarparispan ñaupaqman churakunku. ¿Rikurankichu chayta?... Jesuspa tiemponpipas karanmi ñaupaq tiyanakunapi kayta munaq runakuna. Chayta rikuspan Jesusqa phiñakuran. Chaymanta kunan yachasun.

¿Rikurankichu ñaupaqpi kayta munaq erqekunata?

Juj kutinmi juj religioso runa Jesusta invitaran wasinpi jatun mijuyman. Wasiman chayaqtinmi Jesús rikuran wakin invitadokuna allin asientokuna ajllakusqankuta. Chaymi paykunaman juj willakuyta willaran. ¿Munawaqchu yachayta?...

 Jesusmi niran: “Pipas casarakuy fiestaman invitasunki chayqa, ama ñaupaq kaq tiyanapiqa tiyankichu”, nispa. ¿Imaraykun chayta nisharan?... Kay dibujopi rikusqayki jina, juj importante invitado jamuqtinsi ñaupaqpi tiyaq runata wasiyoq ninman: ‘‘Kay runaman qoy chay tiyanata”, nispa. Chayta niqtin, ¿imaynan sientekunqa chay runa?... Sinchi p’enqasqan qhepanqa.

Arí, Jesús nisqan jina, manan allinchu ñaupaq tiyanakunata maskhayqa. Paymi niran: ‘Pipas invitasunki chayqa, qhepa tiyanapi tiyaykuy, chhaynapin invitaqniyki nisunki: “Amigolláy, kay ñaupaqman jamuy”, nispa. Jinan llapa invitasqakunaq ñaupanpi allin qhawarisqa kanki’, nispa (Lucas 14:1, 7-11).

¿Imatan Jesús yachachisharan ñaupaqpi kayta munaq runamanta willaspa?

¿Imatan chaywan Jesús yachachisharan?... Astawan entiendenaykipaq kaypi piensay. Viajasqayki carropin runakuna junt’a rishan. Ichaqa, ¿imatan ruwanki asiento karuqtin? ¿Usqhayllachu chaypi tiyanki kuraq runakuna ladoykipi sayashaqtin?... ¿Imatan Jesús nisunkiman chayta rikuspa?...

Wakinqa ninmanpaschá: “Manan Jesusqa rikuwanchischu”, nispa. ¿Cheqaqchu chay? ¿Ima ninkin qan?... Jesusqa qhawasharanmi invitasqanku wasipi allin tiyanakunata ajllakuq runakunata. Kunanqa janaq pachapin kashan, llapa runakunatan rikumushan. Chhaynaqa, ¿manachu rikunqa ruwasqaykita?...

Jujkunapas manan allinpaqchu qhawarinku ñaupaqpi kayta munaq runakunata. Wakin wawakunaqa carroq punkunta  kichaqtinku jinan, ventana ladopi tiyayta munaspa tanqa-tanqaraq carroman seqanku. ¿Iman pasanman qanpas chayta ruwaqtiyki?... Llapa runakunan qanpaq phiñakunkuman.

Arí, ñaupaqpi kayta munayqa sasachakuytan apamun. Chaymi pasaran apostolkunawanpas. Soqta capitulopi yachasqanchis jina, paykunaqa pichus aswan importante kasqankumantan discutiranku. Ichaqa, ¿imatan Jesús ruwaran?... Sumaqllatan paykunata aconsejaran. Qhepamanmi ichaqa yapamanta kaqllamantataq discutiranku. ¿Imaynapin chay pasaran?

Jesusmi qatikuqninkunawan Jerusalén llaqtata viajasharanku. Ñanpin Jesusqa paykunawan rimaran Diospa gobiernonmanta. Chaymi Santiagowan wayqen Juanpiwan janaq pachapi Jesuswan kuska reykuna kanankumanta  rimaranku. Salomé mamankutapas chaymantan rimapayaranku (Mateo 27:56; Marcos 15:40). Jinan Salomeqa Jesusman achhuykuspa ladonpi qonqorikuspa valekuran.

Jesusmi tapuran: “¿Imatan munanki?”, nispa. Jinan Salomeqa niran: “Valekuykin kay iskay wawaykuna gobiernoykipi qanwan kuska tiyanankupaq, jujnin paña ladoykipi jujnintaq lloq’e ladoykipi”, nispa. ¿Imaynan sientekuranku chunka apostolkuna chayta yacharuspa?...

¿Imatan Salomé Jesusta valekuran? ¿Iman chay qhepaman pasaran?

 Arí, sinchitan phiñakuranku Santiagopaq Juanpaqwan. Chaymi Jesusqa llapankuta rimapayaran. Niranmi: ‘Nacionkunapi kamachikuqkunaqa ancha atiyniyoq ancha importanten creekunku. Jujkunatan kamachiyta munanku. Qankuna ukhupin ichaqa mana chhaynachu kanan [...], mayqenniykichispas ñaupaqpi kayta munaqqa kamachiykichismi kanan’, nispa (Mateo 20:20-28).

¿Imaynan juj kamachi runa?... Kamachi runaqa jujkunatan servin, manan paychu servichikun. Qhepallapin sayan. Manan importante runapaqchu creekun, aswanpas pisipaqmi qhawarikun. Jinaspapas Jesusmi niran ñaupaqpi kayta munaqqa jujkunata kamachi jina servinan kasqanta.

¿Imatan chaymanta yachanchis?... Juj kamachi runaqa patronnintan ñaupaqpi tiyachin. Patronninmanmi ñaupaqta mijunatapas jaywan. ¿Chhaynachu icha manachu?... Arí, kamachi runaqa patronninpa munasqantan ñaupaqta ruwan, chaytan Jesuspas niran (Lucas 17:7-10).

Chhaynaqa, ¿imatan ruwananchis?... Kamachi runakuna jinan kananchis. Arí, Jujkunata aswan importantepaq qhawarispan paykunata servinanchis. ¿Imaynatan chayta ruwawaq?... Chaypaq qhawasun 40, 41 paginakunata. Chaypin rikusun imakunapin jujkunata serviwaq chayta.

¿Yuyashankichu wañupunan tuta apostolninkunawan kashaqtin Jesuspa ruwasqanta? Payqa toallata cinturanman wataspan amigonkunaq chakinta maqchiran. Chhaynatan payqa jujkunata serviran. Sichus noqanchispas jujkunata servisun chayqa, Jesusmi kusikunqa jinallataq Jehová Diospas.

Jujkunata aswan allinpaq qhawariyqa allinpunin, chaypaq leesun Lucas 9:48; Romanos 12:3; Filipenses 2:3, 4.