Kichay leenaykipaq

Índice nisqaman riy

 17 CAPÍTULO

Diospa munakuynillanpi kashaychis

Diospa munakuynillanpi kashaychis

“Ch’uyay-ch’uya iñiyniykichispi wiñaychis [...] paypa munakuynillanpi kashanaykichispaq” (JUDAS 20, 21)

1, 2. ¿Imatan ruwananchis Diospa munakuynillanpi kashananchispaq?

LLAPANCHISMI munanchis qhalilla kayta. Chaymi allinta alimentakunchis, ejerciciota ruwanchis, cuerponchistapas cuidanchis. Chayta ruway sasaña chaypas allinninchispaq kasqanta reparaspan ruwashallanchis. Ichaqa iñiyninchispipas fuerten kananchis, chaymantan kaypi yachasun.

2 Allin iñiyniyoq kananchispaqqa Jehová Diostan reqsishanallanchis. Chaymi Judas llapa cristianokunata niran: ‘Diospa munakuynillanpi kashaychis’, nispa. Willaranmi imaynata chayta ruwanankupaq, niranmi: “Ch’uyay-ch’uya iñiyniykichispi wiñaychis”, nispa (Judas 20, 21). Chhaynaqa, ¿imatan ruwasunman iñiyninchispi wiñananchispaq?

IÑIYNIYKIPI WIÑASHALLAY

3-5. a) ¿Imayna piensanaykitan Satanás munan Diospa kamachikuyninkunamanta? b) ¿Imaynatan qhawarinki Diospa kamachikuyninkunata yachachikuyninkunatapas?

3 Jehová Diosta kasukuyqa allinniykipaqmi, chaymantan seguro kashanayki. Satanasqa khayna piensanaykitan munan: “Diospa kamachikuyninkunaqa sasa  junt’aymi, noqallamanta allin kaqta mana allin kaqta decidispaymi kusisqa kasaq”, nispa. Adán Evaq tiemponmantapachan chayta creechiyta munaran (Génesis 3:1-6). Kunankamapas chaytan creechiyta munan.

4 ¿Allinchu Satanaspa piensasqan? ¿Sasachu Diospa kamachikuyninkunata kasukuy? Manan. Kaypi piensay, juj sumaq parquepi purishaqtiyki reparanki chay parqueq juj parten mallawan wisq’asqa kasqanta. Jinan ninki: “¿Imapaqmi wisq’aranku?”, nispa. Chayllamanmi ichaqa leonpa qaparimusqanta uyarinki, chayraqchá agradecekunki chay mallata churasqankumanta, mana jinaqa leonmi mijusunkiman karan. Chay malla jinan Jehová Diospa yachachikuyninkunaqa, Satanastaq león jina. Biblian niwanchis: “Allin yuyaywanpuni imatapas ruwaychis, allintapunitaq cuidakuychispas. Enemigoykichis Saqraqa qaparishaq león jinaraqmi purishan pillatapas millp’uruyta munaspa”, nispa (1 Pedro 5:8).

5 Jehová Diosqa kusisqa kausananchistan munan. Manan munanchu Satanaspa engañawananchista, chaypaqmi qowaranchis kamachikuyninkunata yachachikuyninkunata, chaykunata kasukuspan allin cuidasqa kusisqa ima kausanchis (Efesios 6:11). Santiagon qelqaran: “Pipas tukuy yuyaywan qhawan kacharichisqa kayman apaq junt’asqa kamachikuy simita, jinaspa chayman jina purin chayqa, [...] tukuy ima ruwasqanpin kusisqa kanqa”, nispa (Santiago 1:25).

6. ¿Imaynapin yachanchis Diospa kamachikuyninkuna allinpuni kasqanta?

6 Diosta kasukuspan aswan allinta kausanchis, astawantaq payta munakunchis. Ejemplopaq, sapa kuti  Diosmanta mañakuspan kusisqa sientekunchis (Mateo 6:5-8; 1 Tesalonicenses 5:17). Kusisqan kausanchis juñunakuykunapi Diosta adoraspa, jujkunawan kallpachanakuspa, tukuy tiemponchiswan predicaspa, jujkunata yachachispapas (Mateo 28:19, 20; Gálatas 6:2; Hebreos 10:24, 25). Chaykuna allinninchispaq kasqanta reparaspan Diospi astawan iñinchis, reparanchistaq payta kasukuy allinninchispaq kasqanta.

7, 8. ¿Iman yanapawasun ima pruebapipas tarikuqtinchis ama nishuta llakikunanchispaq?

7 Yaqapaschá manchakusunman iñiyninchis probasqa kananmanta. Chhayna sientekunki chayqa, yuyariy Jehová Diospa nisqanta: “Noqan Diosniyki Señor Diosqa kani, noqan allinniykipaq yachachiyki, noqan purinayki ñantapas pusayki. Kamachikuyniykunallata uyariwaq karan, thaj kayniykiqa mayu jinan junt’a kanman karan, chanin kayniykipas lamar-qochaq  phoqchiqesqan jinaraqmi kanman karan”, nispa (Isaías 48:17, 18).

8 Diosta kasukuqtinchisqa thaj kayninchismi mayu jina phawashallanqa, chanin kayninchistaq qochaq phoqchiqesqan jina mana tukukuq kanqa. Imapiña tarikuspapas atinchismi Diospaq junt’aq kayta. Biblian nin: “Diosman llakipakuyniykikunata saqey, paymi qaqata sayachisunki, manan jayk’aqpas chanin runataqa urmachisqa kananta munanqachu”, nispa (Salmos 55:22).

‘KALLPACHAKUY IÑIYNIYKIPI ALLIN POQOSQA KANAYKIPAQ’

9, 10. ¿Imaynan iñiyninpi allin poqosqa cristiano?

9 Jehová Dioswan amigontin kanaykipaq kallpachakunki chayqa, ‘iñiyniykipin allin poqosqa kanki’ (Hebreos 6:1). ¿Imaynan iñiyninpi allin poqosqa cristiano?

10 Manan kuraq runa kasqanchisraykuchu iñiyninchispi allin poqosqa cristianoqa kasun, aswanpas Dioswan amigontin kaspa pay jina imatapas piensaspan (Juan 4:23). Apóstol Pablon qelqaran: “Aychaq munasqanman jina kausaqqa aychaq munaynillanmanmi yuyayninta churan, espirituq munayninman jina kausaqmi ichaqa espirituq munayninman yuyayninta churan”, nispa (Romanos 8:5). Iñiyninpi allin poqosqa cristianoqa manan sonqonpa munasqantachu ruwan, nitaq qhapaq kaytachu maskhan, aswanpas Dios serviytan ñaupaqman churan, allin yuyaywantaq imatapas decidin (Proverbios 27:11; leey Santiago 1:2, 3). Manan jujkunaq mana allin ruwasqanta ruwanchu. Yachantaqmi imachus allin kasqanta.

11, 12. a) ¿Imaynan ‘yuyayninta allinta llank’achiq’ cristiano? b) ¿Ima ejemplon yanapawasunman allin poqosqa cristiano kananchispaq?

 11 Allin poqosqa cristiano kanapaqqa kallpachakunanchismi. Apóstol Pablon qelqaran: “Wiñasqa kaqkunan ichaqa khamuna mijunataña mijunku; paykunaq yuyayninkuqa allin preparasqan kashan allin kaqta mana allin kaqtapas reparanankupaq, yuyayninkuta allinta llank’achisqankurayku”, nispa (Hebreos 5:14). Chayta entiendenapaq rimasun carrerapi phawananpaq preparakuq runamanta.

12 Payqa tiempotan necesitan preparakunanpaq. Manan allin phawaqñachu naceran. Chayllaraq nacespaqa manan yacharanchu makinta chakinta utilizayta, wiñasqanman jinan ichaqa yacharan cosaskuna jap’iyta puriytapas. Allinta preparakuspataq allin phawaq kapun. Chhaynallataqmi allin poqosqa cristiano kanapaqqa tiempotan necesitanchis preparakunanchistaqmi.

13. ¿Iman yanapawasunman Jehová Dios jina piensananchispaq?

13 Kay libropin yacharanchis Jehová Dios jina piensayta, kamachikuyninkuna munakuytapas. Chaymi imatapas decidinapaq tapukunanchis: “¿Ima kamachikuykuna yachachikuykunan yanapawanman kay situacionpi? ¿Imaynatan chayman jina ruwayman? ¿Ima ruwanaytan Dios munan?”, nispa (leey Proverbios 3:5, 6; Santiago 1:5).

14. ¿Imatan ruwananchis iñiyninchispi wiñashanallapaq?

14 Jehová Diospi iñisqanchistaqa wiñachishanallanchismi. Allinta alimentakuspaqa fuerten kasun, Diosmanta yachaypas yanapawasunmi iñiyninchispi fuerte kananchispaq. Bibliata estudiaspan yacharanchis  Diosmanta kamachikuyninkunamantawan. Ichaqa necesitanchismi sasa yachachikuykunatapas entiendeyta. Apóstol Pablo niran: “Wiñasqa kaqkunan ichaqa khamuna mijunataña mijunku”, nispa. Yachasqanchisman jina kausaspataq yachayniyoq kasun. Biblian nin: “Yachayqa tukuy imamantapas ancha chaniyoqmi”, nispa (Proverbios 4:5-7; 1 Pedro 2:2).

15. ¿Imaraykun Jehová Diosta, hermanonchiskunatapas munakunanchis?

15 Allin saludniyoq runaqa cuidakushanallanmi. Allin poqosqa cristianopas cuidakushanallanmi Dioswan amigontin kashanallanpaq. Apóstol Pablon niwanchis: “Qankuna kikiykichista allinta t’aqwikuychis allinchus iñiypi kashankichis icha manachus chayta yachanaykichispaq, allintataq qhawarikuychis imayna runachus kashankichis chayta”, nispa (2 Corintios 13:5). Chaymantapas Jehová Diosta hermanonchiskunatapas munakusqanchismi astawanraq yapakunan. Pablon niran: “Imatapas allinta yachayman, iñiyniypas orqokunata juj ladoman astanaypaq jinaraq kanman, ichaqa manataq munakuyniy kanmanchu chayqa, manan imapaschu kayman”, nispa (1 Corintios 13:1-3).

SUYAKUYNIYKIPI PIENSASHALLAY

16. ¿Imayna piensananchistan Satanás munan?

16 “Diostaqa manan jayk’aqpas kusichiyta atiymanchu, problemaykunataqa manan allichayta atiymanchu” chhayna piensananchistan Satanasqa munan. Manataqmi munanchu hermanonchiskunapi confiananchista ni kusisqa kausananchistapas (Efesios 2:2). Satanasqa yachanmi mana allin piensaykuna afectawasqanchista, Diosmantapas t’aqawasqanchista.  Diosmi ichaqa mana allin piensaykunata atipanapaq juj yanapayta qowanchis, chayqa suyakuyninchismi.

17. ¿Imaraykun allinpuni suyakuyninchispi piensay?

17 1 Tesalonicenses 5:8 texton suyakuyninchista comparan soldadokunaq umanta protegeq cascowan. Chay cascotan nikun: ‘Salvasqa kananchispaq suyakuyninchis’, nispa. Diospa promesankunapi piensaspaqa mana allin piensaykunamantan protegekushanchis.

18, 19. ¿Imaynatan Jesusta suyakuynin kallpacharan?

18 Jesustaqa suyakuyninmi kallpacharan. Wañunanpaqña kashaqtinmi imaymana llakipi tarikuran. Juj amigonmi traicionaran, juj kaqtaq payta negaran, wakintaq payta saqerparispa ayqekuranku. Llaqtamasinkunapas pay contra jatarispan mana khuyapayaspa niranku: “¡Wañuchun!”, nispa. ¿Iman Jesusta yanaparan chaykunata aguantananpaq? “Qhepaman kusikunanta  yachaspan ñak’arina k’aspita aguantaran, manataqmi p’enqakuranchu chhayna p’enqay wañuytapas, chaymi kunanqa Diospa paña ladonpi tiyashan” (Hebreos 12:2).

19 Jesusqa yacharanmi kasukuspa Taytanta jatunchananta, Satanás llulla kasqanta rikuchinantapas. Chaypi piensaspan kusikuran, jinaspapas yacharanmi pisi tiempollamanta Taytanwan kuska cielopi kananta. Chaypi piensaypas kallpacharanmi aguantananpaq. Noqanchispas Jesús jinan suyakuyninchispi piensananchis, chaymi kallpachawasun problemakuna kaqtin aguantananchispaq.

20. ¿Iman yanapasunki Diospa promesankunamanta ama iskayanaykipaq?

20 Diosqa rikumushanmi paypi iñisqaykita aguantasqaykitapas (Isaías 30:18; leey Malaquías 3:10).  Payqa ‘sonqoykiq munasqantan’ qosunki (Salmos 37:4). Chhaynaqa piensashallay suyakuyniykipi. Satanasqa manan munanchu suyakuyniykipi piensanaykita. Aswanpas Diospa promesankuna cumplikunanmanta iskayanaykitan munan. Sichus iskayashanki chayqa Jehová Diospa yanapayninta mañakuy. Yuyariy Filipenses 4:6, 7 textoq nisqanta: “Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista. Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa”

21, 22. a) ¿Imatan Dios munan kay allpapaq? b) ¿Imata ruwanaykipaqmi decidisqa kashanki?

21 Piensashallay paraisopi kausanaykimanta. Pisi tiempollamantan llapa runakuna Jehová Diosta adorasunchis (Apocalipsis 7:9, 14). ¡Mosoq pachapi kausayqa ancha sumaqpunin kanqa! Satanaspas supaykunapas manañan kanqachu. Manañan onqoypas, nitaq wañuypas kanqañachu. Sapa p’unchaymi kallpayoq rijch’arisunchis, kusisqataqmi kausasunchis. Llapanchismi llank’asunchis kay pachata sumaq paraisoman tukuchinanchispaq. Jinaspapas allintan mijusunchis thajpi iman tiyasunchis. Manañan millay runakuna kanqachu, aswanpas runakunaqa sumaqtan kausasunchis. Tiempowantaqmi llapa runakuna “Diospa wawankuna jina libre kapunqaku” (Romanos 8:21).

22 Jehová Diosqa amigonchis kaytan munan. Kallpachakuy Diosta kasukunaykipaq sapa p’unchay astawan munakunaykipaqpas. ¡Llapanchispas atinchismi Diospa munakuynillanpi wiñaypaq kayta! (Judas 21.)