Kichay leenaykipaq

Índice nisqaman riy

 APÉNDICE

¿Hayk’aqmi warmikuna umankuta qatakunanku, imarayku?

¿Hayk’aqmi warmikuna umankuta qatakunanku, imarayku?

Pablon Diospa yuyaychasqan kaspa willaran cristianakuna Jehová Diospa munayninta ruwanankupaq mayninpi umanku qatakunanku kasqanta. ¿Hayk’aqmi umankuta qatakunanku, imarayku qatakunanku? 1 Corintios 11:3-16 textopin willashan Diosta hatunchanankupaq ima ruwanankumanta, chayta t’aqwirisun. Chaypin Pablo riman kay kinsa ruwaykunamanta: 1) imachus ruwasqankuman hina umanku qatakunankumanta; 2) pikunawan kaspanku, maypi tarikusqankuman hina qatakunankumanta; 3) imarayku qatakunankumantawan.

Imachus ruwasqankuman hina. Pablon willan iskaymanta: mañakuymanta profetizaymantawan (4, 5 versiculokuna). Mañakuyqa Jehová Diosta hatunchaymi, profetizaytaq cristianokuna cristianakunapas Bibliamanta hukkunaman yachachisqan. ‘Cristianakunaqa Diosmanta mañakuspapas Bibliamanta yachachispapas umankutan qatakunanku’, ¿nispachu Pablo nisharan? Manan. Chayqa kanqa pikunawan kaspanku, maypi tarikusqankuman hinan.

Pikunawan kaspanku, maypi tarikusqankuman hina. Pablon willallantaq iskaymanta: familia ukhupi kashaspa iñiqmasikunawan kashaspapas qatakuymanta. Kayta qelqaran: ‘Qharin esposanpa uman [...]. Pi warmipas uman mana qatasqa mañakun  otaq profetizan chayqa, qosantan pisichan’, nispa (3, 5 versiculokuna). Jehová Diosmi qosata churan warminta umallinanpaq. Chayrayku, ¿allinchu kanman familia ukhupi qosanpa rantinpi warmikunaq umallisqan? Manan allinchu kanman, qosan umalliq kasqanta mana respetaspaqa p’enqaymanmi churanman. Ejemplokunata qhawarisun. Huk cristianan qosanpa ñawpaqenpi estudiota qonqa. Chaypiqa umantan qatakunan qosanta respetasqanrayku. Qosan bautizasqaña kanman manaña chaypas respetananmi umallin kasqanrayku. * ¿Huk cristiana bautizasqa sullk’a wawanpa ñawpaqenpi mañakunan kanman otaq yachachinan kanman chayri? Chay wawan manaña familiapi umalliqchu chaypas mamaqa qatakunanmi umanta. ¿Imarayku? Diospa llaqtanpi bautizasqa qharikuna umalli kanankupaq churasqa kasqankuta respetasqanrayku.

Iñiqmasikunawan kashaspa warmikuna umanku qatakunankumantan Pablo kayta nillarantaq: “Pipas chaymanta churanakuyta munan chayqa, manan ñoqaykupas Diospa iglesiankunapas [otaq iñiq t’aqakunapas] huk-hina costumbretaqa reqsiykuchu”, nispa (16 versículo). Jehová Diosmi llaqtanpi bautizasqa qharikunata umalli kananpaq churan (1 Timoteo 2:11-14; Hebreos 13:17). Chaymi iñiq t’aqa ukhupiqa qharikunalla churasqa kanku umalli kanankupaq yanapakuq kanankupaqpas (Hechos 20:28). Mayninpin ichaqa warmikuna ruwanku bautizasqa qharikunaq ruwananta. Yachanapaq, mayninpiqa manapaschá kanmanchu predicacionpaq huñunakuyta umallinanpaq hina huk cristiano, chhayna kaqtinqa huk cristianan umallinman. Chay huñunakuypipas Diospa Simintan yachachikun chaymi qharikuna umallinan. Kaqllataqmi bautizasqa qhariq ñawpaqenpi Bibliamanta estudiota qoypas. * Chayraykun warmikuna umankuta qatakunanku qharikunaq ruwananta ruwaspanku.

Ichaqa manan Diosta yupaychananpaq tukuy ruwasqanpichu  umanta qatakunan. Huñunakuypi tapuykunaman kutichispa, wasin-wasinta qosanwan otaq huk bautizasqa cristianowanpas predicaspa, mana bautizasqa wawankunawan Diosmanta mañakuspa otaq yachachispapas manan umanta qatakunanchu. ¿Huk ruwaykunapi tarikuspa qatakunanmanta mana qatakunanmantapas iskayanman chayri? Chhayna kaqtinqa allintan t’aqwinan chaymanta willaq huk qelqakunata. * Sichus iskayashallanman otaq conciencianpas tanqanman umanta qatakunanpaq chayqa qatakullanmanmi, fotopi rikukusqan hina.

Imarayku qatakuna. 10 versiculopi willan imarayku qatakunankuta, kayta nin: “Warmiqa umanpi apanan atiypi kasqan señalta, angelkuna hawa”, nispa (MR). Ñawpaqtaqa qatakunan “atiypi kasqan señalta” apananrayku. Arí, umanta qatakusqanwanmi cristiana warmi rikuchin Jehová Diospa churasqan bautizasqa qharikuna respetasqanta. Chaywantaqmi rikuchillantaq Dios munakusqanta kasukusqantapas. Iskaypitaq, “angelkuna hawa”. ¿Imapin atiyniyoq angelkunata yanapanman warmikuna umankuta qatakusqan?

Angelkunaqa qhawashankun Diospa hanaq pachapi kaq llaqtanta kay Hallp’api kaq llaqtantapas, makillataqmi qhawashanku Jehová Diospa kamachikusqankunata kasukushanchischus manachus chayta. Huchasapa runakunaq kasukusqanqa yanapanmi paykunata. Angelkunapas kasukunallankutaqmi Jehová Diosta, manan qallariypi mana kasukuq angelkuna hinachu kananku (Judas 6). Cristianaqa kasukuqmi kanan, aswan yachaqña allin yuyayniyoqña kanman chaypas. Bautizasqa cristianokunata sonqomanta kasukuspan angelkunaman allin ejemplota qon. Hanaq pachapaq akllasqa cristianakunaq kasukusqanmi  angelkunataqa astawanraq yanapan. ¿Imarayku? Chay cristianakuna Cristowan kuska hanaq pachamanta paykunatapas llapa runakunatapas kamachikamunankuta yachasqankurayku. Arí, warmikunaqa hatun saminchaytan chaskinku. Hunt’aq kasqankuwan tukuy sonqomanta kasukuq kasqankuwan iman huch’uyyaykukuq kayta kasukuq kaytawan angelkunaman yachachinku.

^ párr. 3 Bautizasqa qosan upayapunman otaq imapas kanman chayllan cristiana warmiqa kunkawan mañakunman, chaykuna mana kaqtinqa manan.

^ párr. 1 Sichus huk cristiana estudiota qonman manaraq bautizasqa predicaqwan kuska, manataq qosanchu kanman chayqa manan necesariochu umanta qatakunan.

^ párr. 2 Astawan yachanaykipaq qhaway La Atalaya revistata kay fechakunapi temakunata: 2015 wata 15 febrero pág. 30; 2002 wata 15 julio págs. 26, 27; 1977 wata 15 julio págs. 445-448.