Kichay leenaykipaq

Índice nisqaman riy

 APÉNDICE

¿Imaninmi Biblia divorciakuymanta t’aqanakuymantapas?

¿Imaninmi Biblia divorciakuymanta t’aqanakuymantapas?

Jehová Diosqa munanmi casarakuqkuna casarakusqanku p’unchaypi compromiso ruwasqankuwan hunt’anankuta. Ñawpaq warmi qharita hukllachashaspan kayta niran: “Runaqa [...] warminman hukllachaykakapunqa, huk aychallataq kapunqaku”, nispa. Waranqa-waranqa watakuna qhepamanmi chay simikunata Jesús runakunaman yuyarichiran, kaytataq yapaykuran: “Chayrayku, runaqa Diospa hukllachasqantaqa  ama t’aqachunchu”, nispa (Génesis 2:24; Mateo 19:3-6). Rikusqanchis hina Jehová Diospas Jesuspas manan munankuchu pisi tiempollapaq casarakunankuta, aswanmi munanku wañukapunankukama kuska tiyanankuta (1 Corintios 7:39). Casarakuyqa Diospa kamachikusqanmi chaymi divorciakuytaqa mana pukllakunapaq hinallachu qhawarina. Hinaspapas, Jehová Diosqa cheqnikunmi yanqapas qasi divorciakuytaqa (Malaquías 2:15, 16).

¿Ima kallaqtinmi casarasqakuna divorciakapunkuman? Jehová Diosqa cheqnikunmi runakuna qhelli huchapi purisqanta (Génesis 39:9; 2 Samuel 11:26, 27; Salmo 51:4). Sinchitan cheqnikun, chaymi Bibliapi qelqachiran qhelli huchapi pipas urmaqtin munaqqa divorciakapunanpaq. (9 capitulopi, 7 parrafopi willan iman qhelli hucha kasqanta.) Mana huchallikuq runan qhawarinan divorciakunanta mana divorciakunantapas, Jehová Diospa nisqan hina (Mateo 19:9). Divorciakapunqa chayqa manan huchallikunqachu. Ichaqa manan mayqen cristianopas tanqananchu divorciakunanpaq. Huchallikuq warmi otaq qosa huchallikusqanmanta pesapakun chayqa munaspaqa tiyakapullankumanmi. Chaypiqa mana huchallikuqmi qhawarinan divorciakunanta mana divorciakunantapas, paymantañan kanqa ima ruwasqanpas (2 Corintios 5:10).

Mayninpin ichaqa sinchi sasachakuy kaqtin wakin cristianokuna otaq cristianakuna mana wasanchay kashaqtin t’aqakapunku otaq divorciakapunkupas. Chaykuna kaqtinqa t’aqanakapuqtan Biblia nin: “Ama hukwanqa casarakuchunñachu, qosayoq kayta munaspaqa qosanwan kutinakapuchun”, nispa (1 Corintios 7:11). Chaypi nisqan hina t’aqanakapuqqa manan hukwan casarakuyta atinmanchu (Mateo 5:32). ¿Imarayku wakin cristianokuna t’aqakapunku? Chaymanta kunan yachasun.

Familianta mana uywaqtin. Wakin qosakunaqa manan familiankuta uywankuchu, ichaqa manan mana atisqankuraykuchu aswanmi mana munasqankurayku. Chhayna kasqankuwanmi familiankuta ñak’arichinku. ¿Imaninmi Biblia chhayna runakunamanta? “Pipas [...] familianta mana uywanchu  chayqa, cheqaq iñiymantan t’aqakapun, mana iñiyniyoq runamantapas aswan millayraqmi kapun”, nispan nin (1 Timoteo 5:8). Sichus huk qosa mana cambianqachu chayqa, wawankunaq allinninta paypa allinnintawan qhawarispan warmi decidenan t’aqanakunanta mana t’aqanakunantapas. Huk cristiano familianta mana uywanqachu chayqa umalliqkunan chayta allinta qhawarinanku, cheqaqtapuni mana uywashanchu chayqa yaqapaschá Diospa llaqtanmanta qarqosqa kanman.

Nishuta maqaqtin. Wakin qosakunaqa sinchi millaymi kanku, mayninpin warminkuta onqonankama maqanku otaq wañuchiytaraq munanku. ¿Chay maqakuq qosa cristiano kanman chayri? Diospa llaqtanpiqa qarqosqan kanku k’araq sonqo runakunaqa, chaymi umalliqkuna chayta allinta qhawarinanku (Gálatas 5:19-21).

Iñiyninpaq sinchi sasapuni kaqtin. Wakin runakunaqa sinchitan hark’akunku warminku otaq qosanku Diospa munaynin ruwananta otaq tanqanku Diospa kamachikuyninkunata mana kasukunankupaq. Chhayna kaqtinqa cristianon otaq cristianan qhawarinan t’aqanakapuspallachus ‘Diosta ñawpaqta kasukunqa’ chayta (Hechos 5:29).

Chhaynapi tarikuq iñiqmasinchistaqa manan tanqananchischu t’aqanakapunanpaq nitaq kuskalla tiyanankupaqpas. Umalliqkunapas iñiyninpi poqosqa cristianokunapas yanapankumanmi yuyaychankumantaqmi Bibliaq nisqanman hina, ichaqa Jehová Diosllan allinta yachan imaynapi kawsasqankuta. Sichus huk cristiano otaq cristiana t’aqanakunanrayku yapa-yapayuspa imatapas willakunman chayqa manan casarakusqantapas Jehová Diostapas respetashanmanchu. Diosqa sut’itan yachan runakuna sonqonkupi tukuy mana allin yuyaykusqankuta. Arí, “Diosmanmi cuentata qosunchis. [...] Qayllanpiqa manan [imapas] pakasqachu, aswanpas lliwmi rikhurin, sut’itaq kashanpas” (Hebreos 4:13). Sichus huk cristiano sinchi ñak’ariypi tarikusqanrayku t’aqakapun chayqa manan pipas mana allinta qhawarinanchu. Kayta ama qonqasunchu “llapallanchismi Diospa ñawpaqenman asuykusun juzgasqa kananchispaq” (Romanos 14:10-12).