Kichay leenaykipaq

Índice nisqaman riy

 7 T’AQA

Wananapaq ejemplo

Wananapaq ejemplo

Jehová Diosqa millay runakunataqa manan haykuchinqachu Paraisoman. Diospa amigonkunallan chaypiqa tiyanqaku. ¿Iman sucedenqa millay runakunata? Chayta yachanapaq Noemanta willakuykunata qhawarisun. Noeqa ñawpa tiempokunapin kawsaran. Allin runan karan, Jehová Diospa munayninta ruwaspallapunin kawsaran. Wakin runakunan ichaqa millayta kawsaranku. Chaymi Jehová Diosqa Noeta niran: millp’uq parawan millay runakunata wañuchisaq, nispa. Kamachirantaq arcata ruwananpaq, hinaspa Millp’uq para unu chayamuqtin Noepas familianpas qespichisqa kanankupaq (Génesis 6:9-18).

Noeqa familiantin arcata ruwaran. Noeqa willaranmi Millp’uq para unu chayamunanmanta, ichaqa manan pipas uyarikuranchu. Runakunaqa mana allin kaqllatan ruwasharanku. Arcata tukuspataq Noeqa animalkunata arcaman haykuchiran, chaymantataq Noepas familiantin haykuranku. Chay qhepamantaq Jehová Diosqa sinchi wayrantin parata chayachimuran. Tawa chunka p’unchayta, tawa chunka tutatawan parachimuran, unutaq Allpata millp’uran (Génesis 7:7-12).

 Millay runakunaqa wañurankun, Noetaq familiantin qespiran. Jeho­vá Diosqa Millp’uq para unu pasanankama Noeta waqaycharan, chay qhepamantaq mana allinkunamanta limpiasqan Allpaman churaran (Génesis 7:22, 23). Bibliaq nisqan hina, chayamushanñan tiempo Jehová Dios mana chanin runakunata wakmanta wañuchinanpaq. Allin runakunaqa manan wañunqakuchu. Wiñaypaqmi kawsanqaku kay Allpa Paraisoman tukuqtin (2 Pedro 2:5, 6, 9).

Kunanpas runakunaqa mana allinkunata ruwashan. Kay pachaqa mana allin ruwaykunawan hunt’a kashan. Jehová Diosqa yapa yapamantan runakunaman willachishan Testigonkunawan, chaywanpas yaqa llapanmi mana uyarikuyta munankuchu. Manan kawsayninkuta t’ikrayta munankuchu, manallataqmi Diostapas kasukuyta munankuchu. ¿Iman chay runakunata sucedenqa? ¿T’ikranqakuchu kawsayninkuta? Wakinqa manan hayk’aqpas t’ikranqakuchu. Chayamushanñan mana allin runakunaq wañunan p’unchay (Salmo 92:7).

Kay Allpaqa manan thunisqachu ­kanqa; paraisomanmi tukupunqa. Diospa amigonkunaqa wiñaypaqmi kawsanqaku kay Allpa paraisoman tukuqtin (Salmo 37:29).