Kichay leenaykipaq

Índice nisqaman riy

 6 T’AQA

¡Paraisoqa chayamushanñan!

¡Paraisoqa chayamushanñan!

Allpapi imaymana mana allin sucedesqanmi rikuchin Paraíso chayamunanña kasqanta. Bibliaqa willaranña manaraq Paraíso chayamushaqtin sasachakuy tiempo kananmanta. Kunanmi chay tiempopi kawsashanchis. Bibliaqa willaranña kaykuna kananta:

Hatun guerrakuna. “Llaqtakunan huk llaqtakuna contra maqanakunqa, suyukunapas suyukuna contran sayarinqa.” (Mateo 24:7.) Chay profeciaqa hunt’akushan 1914 watamanta pacha. Chay watamanta pachan rikukuran iskay hatun guerrakuna huk guerrakunapas. Chaykunapin waranqa-waranqanpi runakuna wañuran.

Mast’arikuq onqoykuna. “Kayneqpi chayneqpi [...] onqoykuna” kanqa (Lucas 21:11). ¿Hunt’akunñachu kay profecía? Arí. Waranqa-waranqanpin runakuna wañun cáncer onqoywan, sonqo onqoywan, tuberculosis onqoywan, chukchu onqoywan, sida onqoywan, hukkunawanpas.

Yarqaykuna. Teqsimuyuntinpin runakunapaq mikhuna pisiyashan. Sapa watan waranqa-waranqanpi runakuna yarqaymanta wañunku. Kay profeciaq hunt’akusqanmi rikuchillantaq Paraíso chayamunanña kasqanta. Biblian nin: “Yarqaykuna [...] kanqa”, nispa (Marcos 13:8).

 Pacha chhaphchiykuna. “Kallanqataqmi askha cheqaskunapi [...] pacha chhaphchiykunapas.” (Mateo 24:7.) Kay profeciapas hunt’akullantaqmi tiemponchispi. Yaqa huk millón runakunañan wañunku pacha chhaphchiykunapi 1914 watamanta pacha.

Millay runakuna. Runakuna kanqa “qolqe sonqokuna”, “kikinkuta munakuqkuna”. “Dios munakunankutaqa aycha kusichiyllapin puriyta munanqaku.” Wawakunapas kanqaku “tayta-mamankuta mana kasuqkuna” (2 Timoteo 3:1-5). Chhaynatan runakunaqa kunan kawsashanku. Manañan Diosta respetankuchu, Diosmanta yachay munaqkunatapas sasachakuyman churanku.

Mana allin ruwaykuna. ‘Mana allin ruwaqkuna sinchita askhayanqa’ (Mateo 24:12). Repararankichá kay watakunallapi mana allin ruwaykuna sinchi yapakusqanta. May llaqtapipas runakunataqa suwallanku, q’otunku, ñak’arichinku ima.

Chaykunan rikuchin Diospa Reinon chayamunanña kasqanta. Biblian nin: “Kaykuna hunt’akusqanta rikuspaykichisqa Diospa qhapaqsuyun [“reinon”, NM] qayllaykamushasqanta yachankichis”, nispa (Lucas 21:31). ¿Imataq Diospa Reinonri? Diospa gobiernonmi, chay gobiernon kay Allpata paraisoman tukuchinqa. Llapa kamachikuqkunata ñut’uspataq kay Allpata kamachinqa (Daniel 2:44).