Kichay leenaykipaq

Índice nisqaman riy

 5 WILLAKUY

¿Imatan Dios munan kay Hallp’apaq?

¿Imatan Dios munan kay Hallp’apaq?

1. ¿Imapaqmi Dios Hallp’ata kamarqan?

Jehová Diosmi kay Hallp’ata kamarqan runakuna chaypi tiyanankupaq. Adán Evata kamaspaqa manan hanaq pachapi tiyanankupaqchu kamarqan, chaypi tiyanankupaqqa angelkunatan kamarqan (Job 38:4, 7). Diosmi runata Edén sutiyoq sumaq huertaman churarqan (Génesis 2:15-17). Hinaspapas, munarqanmi Adanpas wawankunapas Hallp’api wiñaypaq kusisqa kawsanankuta.​—Leey Salmo 37:29; 115:16.

Edén huertaqa huch’uyllan karqan. Adanwan Evawanqa wawakunayoq kaspan Hallp’aman hunt’ananku karqan, pisi-pisimantataq paraisoman tukuchinanku karqan (Génesis 1:28). Hallp’aqa runaq tiyananpaqpunin kanqa, manan hayk’aqpas chinkanqachu.​—Leey Salmo 104:5.

Qhaway ¿Imapaqmi Dios kay pachata kamaran? nisqa videota

2. ¿Imaraykun kay Hallp’a mana paraisochu kashan?

Adanwan Evawanqa Diosta mana kasukusqankumantan Edén huertamanta qarqochikurqanku. Chaymi Paraisoqa chinkapurqan, manataqmi pipas kutichimuyta atirqanñachu. Biblian willan Hallp’a millay runakunaq makinpi kapusqanta (Job 9:24).​—Leey Génesis 3:23, 24.

Chhaynaqa, ¿manachu Dios hunt’ayta atinqa runakunapaq qallariypi munasqanta? Manan, payqa tukuy atiyniyoqmi, hunt’anqapunin tukuy munasqantapas (Isaías 45:18). Hamuq tiempopin Diosqa qallariypi munasqanman hina sumaq kawsayta apamunqa.​—Leey Salmo 37:11, 34.

3. ¿Imaynapin kay Hallp’a hukmanta paraíso kapunqa?

Jesusmi Diospa Gobiernonpi Reyqa, paymi kay Hallp’ata paraisoman tukuchipunqa. Angelkunawan kuskan Armagedón guerrapi Diospa enemigonkunata wañuchinqa. Adán Evata huchallichiq Saqratataq 1.000 watapaq wisq’anqa.  Diosta serviqkunan ichaqa mana wañunqakuchu. Jesusmi paykunata pusanqa pakaykunqapas, Paraisopi wiñay kawsaytataq qonqa.​—Leey Apocalipsis 20:1-3; 21:3, 4.

4. ¿Hayk’aqmi ñak’ariykuna tukupunqa?

¿Hayk’aqmi Dios millay kawsayta tukuchipunqa? Jesusmi willarqanña chay p’unchay qayllaykamushaqtin pachantinpi ‘imakunatachus rikukunanta’. Kay tiempopi runaq kawsayninta peligroman churaq ruwaykuna sucedesqanmi rikuchin ‘kay tiempo p’uchukapunanpaqña kashasqanta’.​—Leey Mateo 24:3, 7-14, 21, 22.

Hanaq pachamanta 1.000 wata kamachikamuspan Jesusqa imakunachus runakunata ñak’arichin, chaykunata pisi-pisimanta chinkachipunqa (Isaías 9:6, 7; 11:9). Hinaspapas uma sacerdoten kanqa, chaymi Diosta munakuqkunaq huchanta pichapunqa. Chhaynapin Diosqa Jesuspa makinpi chinkachinqa onqoykunata, machuyayta, wañuytapas.​—Leey Isaías 25:8; 33:24.

5. ¿Pikunan Paraisopi tiyanqaku?

Testigokunaq huñunakunanku wasipin reqsinki Diosta kusichiyta munaq, pay munakuq runakunata

Diosta kasukuqkunan Paraisopiqa tiyanqaku (1 Juan 2:17). Jesusmi qatikuqninkunata kamachirqan allin sonqoyoq runakunata maskhaspa Diosmanta yachachinankupaq. Kay tiempopipas waranqanpi runakunatan Jehová Dios llaqtanpi yachachishan Paraisopi tiyanankupaq (Sofonías 2:3). Jehová Diospa testigonkuna ukhupiqa askha familiakunan huk nisqalla Diosta servinku. Huñunakunanku wasikunapin Bibliapi allin willakuykunata yachanku, chaypin allin qosa, allin esposa, allin tayta-mama kaytapas yachanku.​—Leey Miqueas 4:1-4.