Kichay leenaykipaq

Índice nisqaman riy

 1 TAPUY

¿Yachanichu imayna runa kasqayta?

¿Yachanichu imayna runa kasqayta?

KAYTAN YACHANAYKI:

Imayna kasqaykita yachay, imapichus creesqaykita yuyariymi yanapasunki sasapi tarikuspa allin kaqta ruwanaykipaq.

¿IMATAN RUWAWAQ?

Karen sutiyoq sipaschamanta yachasunchis. Paysi juj ratolla juj fiestapi kasharan, chayllamansi qhepanmanta amigan Rosaqa nin:

“Karen, ¿imatan ruwashanki?”, nispa.

Paytaqsi kutirispa chay amiganta rikusqa iskay botella cerveza jap’ishaqta. Jinas Rosaqa jujnin botellata Karenman jaywaspa nin: “Manañan wawachu kanki ¿riki?”, nispa.

Chaysi Karenqa iskayaspa sonqollanpi nin: “Mana chaskikusaqchu chayqa, ‘imachá kayqa’ niwanqachá riki. Chaymantapas payqa allin amigaymá riki. Paypas tomashantaq chayqa, manachá juchachu kanman pisillata tomaqtiyqa. ¿Acaso drogatachu tomasaq?”, nispa.

Karen jina tarikuwaq chayri, ¿imatan ruwawaq?

¡ÑAUPAQTA PIENSAYKUY!

Chhaynapi tarikuspa allin kaqta ruwanaykipaqqa yuyarinaykin imakunapichus creesqaykita, chaymantapas ñan allintaña reqsikunayki imayna runachus kasqaykita. Chhaynapin valorta jap’inki ama jujkunaq munasqanman jinachu imatapas ruwanaykipaq (1 Corintios 9:26, 27).

Chaypaqmi qatiqninpi tapuykunapi allinta piensanayki.

 1. ¿IMAKUNAPIN ALLIN KANI?

Imakunapi allin kasqaykita yuyariymi yanapasunki imatapas confianzawan ruwanaykipaq.

BIBLIAQ WILLASQAN: Apóstol Pablon niran: “Manapaschá kusa rimaqchu kani, ichaqa allin yachayniyoqmi kani”, nispa (2 Corintios 11:6). Bibliamanta allinta yachasqanraykun Pabloqa mana manchakuranchu contranpi rimaqkunata, manan pisiparanchu wakinkunaq mana allin rimasqankuwanpas (2 Corintios 10:10; 11:5).

QHAWARIKUY IMAYNA KASQAYKITA. Qelqay ima ruwaytachus allinta yachanki chayta.

Imayna kasqaykimanta qelqay (¿imaynan kanki? ¿Sumaq sonqochu? ¿Qoykukuqchu? ¿Puntualchu? Chaykunamanta qelqay).

2. ¿IMAPIN PISI KALLPA KANI?

Imaynan cadenapas ratolla p’itikunman ima partechanpas mana allin kaqtin, chhaynallataqmi noqanchispas ratolla mana allinpi rikukusunman sonqonchispa munasqanwan dominachikusunman chayqa.

BIBLIAQ WILLASQAN: Pabloqa yacharanmi imapichus pisi kallpa karan chayta, chaymi niran: “Noqaqa maytapunin sonqoypi kusikuni Diospa kamachikuyninwan; cuerpoypin ichaqa waj kamachikuyta reparani, chay kamachikuyqa juchaq kamachikuyninmi, chay kamachikuymi yuyayniypi kaq kamachikuy contra kashan, ima munasqantataq noqawan ruwan”, nispa (Romanos 7:22, 23).

QHAWARIKUY IMAYNA KASQAYKITA. ¿Imakunapin allinyanayki kashan? Jujninmanta kaypi qelqay.

 3. ¿YACHANICHU IMA RUWANAYTA?

Taximan seqaspa, ¿niwaqchu choferta: “Kay calleta kuti t’ijraykunki gasolinayki tukukunankama”, nispa? Manan ¿riki?

Chhaynaqa yachanaykin maymanchus rishanki chayta. Kaqllataqmi kanman ima ruwasqanchiswanpas, yachananchismi imatachus ruwananchis chayta, imaynatachus chayta ruwasunman chaytapas.

BIBLIAQ WILLASQAN: Pablon niran: “Noqaqa manan yanqapas phawashayman jinachu phawashani”, nispa (1 Corintios 9:26). Payqa yacharanmi imatachus ruwananta, chaymi chayman jina imatapas ruwaran (Filipenses 3:12-14).

QHAWARIKUY IMAYNA KASQAYKITA. ¿Imakunatan kay jamuq watapi ruwayta munawaq? Chaykunamanta kinsata qelqay.

4. ¿ALLIN DECIDISQACHU KASHANI?

Sichus allin kaqta ruwanaykipaq decidisqa kashanki chayqa, allin saphichasqa sach’a jinan kanki. Chhaynapin mana imapas urmachisunkichu

Manachus allin decidisqachu kashanki allin kaqta ruwanaykipaq chayqa, camaleón qalaywa jinan kanki. Chay qalaywachaqa maypichus tarikusqanman jinan colorninta cambian. Kaqllataqmi qanpas jujkunaq munasqanman jinalla imatapas ruwanki.

Chayrayku allinta decidikuy allin kaqtapuni ruwanaykipaq.

BIBLIAQ WILLASQAN: Waynachallaraq kashaspapas, familianmanta karupi kashaspapas profeta Danielqa allintan “yuyaykukuran” Diospa kamachikuyninkunata kasukunanpaq (Daniel 1:8). Chhaynata decidikusqanraykun payqa allin kaqtapuni ruwaran tukuy tiempo.

QHAWARIKUY IMAYNA KASQAYKITA. ¿Allin convencesqachu kashanki imakunapi creesqaykimanta? ¿Creenkichu Diospi? ¿Iman convencesunki cheqaqpuni Dios kasqanmanta?

¿Convencesqachu kashanki Diospa kamachikuyninkuna allinniykipaq kasqanmanta? ¿Iman convencesunki?

¿Wayraq apakachasqan raphi jinachu kayta munawaq, icha allin sayaq sach’a jinachu? Sichus allinta decidikunki allin kaqllata ruwanaykipaq, chayman jinataq kausankipas chayqa, allin sayaq sach’a jinan kanki. Chhaynapin imapichus creesqaykiman jina kausanki.