Kichay leenaykipaq

Índice nisqaman riy

 3 TAPUY

¿Imaynatan tayta-mamaywan sumaqta parlayman?

¿Imaynatan tayta-mamaywan sumaqta parlayman?

KAYTAN YACHANAYKI:

Tayta-mamaykiwan sumaqta kausanki chayqa, kusisqan kausanki.

¿IMATAN RUWAWAQ?

Jorgemanta yachasunchis. Payqa 17 watanpin kashan. Juj kutinsi wasinpi ruwanankunata tukuspa samakuyta munasharan. Chaysi sumaq tiyananpi tiyaykuspa televisionta jap’ichikun.

Chayllamansi papan phiña uyantin jaykumun, jinaspa Jorgeta nin:

“¡Yau Jorge! ¿Televisionta qhawanaykitaqa manachu wayqechaykita yanapawaq tareankunawan? ¿Imanaqtinmi chhayna kanki?”, nispa.

Chaysi Jorgeqa “ay, uma nanay” nispa bajochallata rimapakun.

Jinas papanqa “¡¿ima ninkin, erqe?!” nispa nin.

Chaysi Jorgeqa ñawinta tarwiyachispa nin: “Manan imatapas ninichu”, nispa.

Chaywansi papanqa phiñasqa nin: “¡Allinta rimanki, erqe, paqtataq!”, nispa.

Jorge kawaq chayri, ¿imatan ruwawaq karan papaykita mana phiñachinaykipaq?

¡ÑAUPAQTA PIENSAYKUY!

¿Imatan ruwawaq carreterapi juj jatun rumita rikuspa? Waj ladontan carroykita purichiwaq ¿riki? Chhaynallataqmi tayta-mamaykiwan sumaqta parlanaykipaqpas maskhanayki imaynatachus mana phiñachispalla rimawaq chayta.

 ¿IMA NIWAQTAQ KAYMANTARI?

Luisa sutiyoq sipasmi nin: “Sasan papaywan parlayqa. Payqa manan ratollachu uyariwan. Mayninqa unaychataña rimashaqtiymi cuentata qokun payta rimapayashasqayta”, nispa.

¿IMATAN LUISA RUWANMAN?

  1. ¿Qaparinanchu?

    ¿“¡Manachu imapas qokusunki, uyariwayyá!” nispachu ninan?

  2. ¿Manañachu imatapas willanan?

    ¿“Jinapas kachun” nispachu manaña papanta rimapayanan?

  3. ¿Suyakunanchu jujpiña rimananpaq?

    ¿Allinchu kanman jujpiña papanwan rimay otaq juj cartapipas problemanta willay?

¿Imatan qan ruwawaq Luisa kaspa?

KAYPI PIENSAY: Luisaq papanqa distraesqataq kashan chayqa, manan yachanchu imaynapis ususin tarikushan chayta. Sichus Luisa papanta qapariykunman chayqa, mana imamantapas qaparishanman jinan kanman, manataq papantapas respetashanmanchu. (Efesios 6:2). Chhaynaqa yanqapaqmi kanman chay qaparisqanqa.

Ama imawanpas jark’achikuychu tayta-mamaykiwan sumaqta rimanaykipaq. Kallpachakuy mana phiñachispalla parlanaykipaq

Sichus manaña problemanmanta willanmanchu chayqa, yanqapaqmi kallanmantaq. Mana imatapas willaspaqa manan Luisaqa yanapachikuyta atinqachu, papanpas manan yachanqachu imayna yanapayta.

Chhaynaqa, ¿imatan Luisa ruwanman? Juj kutipiñan papanwan rimanman, chhaynapin payqa papanwan sumaqta rimananpaq juj ñanta maskhashanman. Otaq chay ratopipas juj cartata qelqanman, jinaspa chayta papanman qonman.

Cartata qelqaspaqa allintan Luisaqa problemanta willayta atinqa. Papanpas chayta leespaqa entiendenqan imatachus ususin willayta munasharan chayta. Chhaynaqa chay ruwayqa allinpunin kanqa Luisapaq papanpaqwan. Chhaynapin Luisaqa Bibliaq nisqanman jina ruwashanqa, chaypin nin: “Tukuy atisqanchista ruwasun jujkunawan sumaqta kausananchispaq”, nispa (Romanos 14:19).

¿Imatawanmi Luisa ruwanman?

¿Ima niwaqtaq? ¿Imatawanmi Luisa ruwanman? ¿Imapin chay ruwasqan tukunman?

ALLINTA ENTIENDECHIY IMA NISQAYKITAPAS

Tayta-mamaykiqa jujta nishanaykipaqmi piensankuman ima nisqaykimantapas. Manan chayta qonqanaykichu.

¿IMATAN ENTIENDENKUMAN?

“¿Imanaqtintaq phiñasqari kashanki?”, nispa papayki nisuqtiyki, “manan chaymanta rimayta munanichu” nispa niwaq chayri, ¿imatan pay piensanman?

Chay nisqaykiqa: “Manan qanpi confianichu, chaymi mana willaykimanchu. Aswan amigoykunallaman imatapas willasaq, paykunallan entiendewanku”, nispapas nishawaq jinan paypaqqa kanman.

Ima sasachakuypipas tarikushaqtiyki papayki nisunkiman “yanapasaykin” nispa, qantaq ichaqa niwaq “ama llakikuychu, noqañan imatapas ruwasaq” nispa chayri:

  • ¿Imatan papayki piensanman?

  • Chayta mana piensananpaq, ¿imatan aswan niwaq?