Kichay leenaykipaq

Índice nisqaman riy

 5 CAPÍTULO

Jesusmi noqanchisrayku sacrificakuran

Jesusmi noqanchisrayku sacrificakuran

1, 2. a) ¿Imayna regalon astawan gustawanchis? b) ¿Imaraykun Jesuspa sacrificakusqan Diospa aswan sumaq regalon?

¿IMA regalon astawan gustarasunki? Juj regalo gustawananchispaqqa manan askha qolqewan rantisqaraqchu kanan. Sichus chay regalo kusichiwanchis otaq serviwanchis chayqa agradecekunchismi ¿riki?

2 Diosqa imaymanatan regalawaranchis, aswan sumaq regalonqa noqanchisrayku sacrificakunanpaq Churinta kachamusqanmi. Chhaynapin wiñaypaq kausayta atisun (leey Mateo 20:28). Churinta kachamuspan Jehová Diosqa may tukuyta munakuwasqanchista rikuchiran. Chaymantan kay capitulopi astawan yachasun.

JESUSPA SACRIFICAKUNANTA NECESITARANCHIS

3. ¿Imaraykun wañunchis?

3 Jesuspa sacrificakusqanwanmi Diosqa wañuymanta juchamantawan kacharichiwanchis (Efesios 1:7). ¿Imaraykun necesitaranchis Jesuspa sacrificakunanta? Chayta entiendenapaqqa ñaupaqtan yachananchis Adanwan Evawan imachus pasasqanta. Paykunaqa juchallikusqankuraykun wañuranku. Noqanchispas Adán, Evaq wawanmi kanchis chaymi juchayoq kapunchis (qhaway 9 willakuyta).

4. ¿Pin karan Adán? ¿Imaynan Adán karan manaraq juchallikushaspa?

 4 Diospa ñaupaq kaq kamasqan runaqa Adanmi karan. Paytaqa mana juchayoqtan kamaran, chayraykun piensasqanpipas cuerponpipas perfecto karan. Chaymi mana onqonanchu, machuyananchu nitaq wañunanpaschu karan. Jehová Diosqa papanmi karan payta kamasqanrayku (Lucas 3:38). Chaymi Diosqa sapa kutilla Adanwan rimaran, chaymantapas sumaq llank’anatan qoran (Génesis 1:28-30; 2:16, 17).

5. ¿Imapin Adán ‘Diosman rijch’akuran’?

5 Diosqa payman ‘rijch’akuqtan’ Adanta kamaran (Génesis 1:27). ¿Imapin rijch’akuran? Munakuyninpi, yachayninpi, atiyninpi, chanin kaq ruwayninpipas. Adanqa manan máquina jinachu karan, atirantaqmi allin kaqta mana allin kaqta decidiyta. Diosta kasukunman karan chayqa wiñaypaqmi paraisopi tiyanman karan.

6. a) ¿Iman Adanta pasaran Diosta mana kasukusqanrayku? b) ¿Imaynatan afectawaranchis Adanpa juchallikusqan?

6 Diosta mana kasukusqanraykun Adanqa wañunanpaq juchachasqa karan. Manañan Diospa amigonchu karan, Edén huertamantapas qarqochikamuranmi (Génesis 3:17-19). Biblian nin: “[Adanwanmi] juchaqa kay pachapi rijuriran, wañuytaq jucharayku rijuriran; chhaynapin wañuyqa llapa runaman chayaran llapallanku juchallikusqankurayku”, nispa (Romanos 5:12). Adanpa juchanraykun juchaq ‘kamachin’ wañuypa kamachin kanchis (Romanos 7:14). Adanpaq Evapaqpas manañan ima suyakuypas karanchu, noqanchispaqmi ichaqa kashan.

7, 8. ¿Ima iskay ruwaytan junt’an Jesuspa sacrificakusqan?

 7 ¿Imakunatan lograran Jesuspa sacrificakusqan? Ñaupaqtaqa Adanpa juchanmanta librasqa kananchispaq pagakuran, iskaypitaq jayk’achus valesqanta pagakuran.

8 Adanpa juchanmanta kacharichisqa kanapaqqa manan pi runapas pagayta atinmanchu. Diosmi ichaqa Jesusta kachamuran noqanchisrayku sacrificakuspa juchamanta wañuymantawan kacharichiwananchispaq. ¿Imakunatan ruwakuran kacharichisqa kananchispaq? ¿Imakunapin allinninchispaq karan? Chaymanta yachasun.

¿IMAYNATAN KACHARICHISQA KARANCHIS?

9. ¿Imayna sacrificiotan necesitaranchis?

9 Wañuymanta juchamantawan kacharichisqa kananchispaqqa ‘necesitakusqan preciotan pagakunan’ karan (1 Timoteo 2:6). Chaymi necesitakuran Adán jina perfecto kausayniyoq runata. Yachasqanchis jina manan pipas chaytaqa ruwayta atiranchu llapanchispas juchayoq kasqanchisrayku (Salmos 49:7, 8).

10. ¿Imatan Dios ruwaran juchamanta wañuymantawan kacharichiwananchispaq?

10 ¿Imatan Dios ruwaran juchamanta wañuymantawan kacharichiwananchispaq? Ancha munakusqan Churin Jesustan kay allpaman kachamuran (1 Juan 4:9, 10). Jesuspas munaranmi jamuyta, chaymi Papanta saqesparaq jamuran (Filipenses 2:7). Diosmi Jesuspa vidanta Mariaq wijsanman astamuran. Chaymi Jesusqa mana juchayoq perfecto runa naceran (Lucas 1:35).

Diosmi munakusqan Churinta qoran kacharichiwananchispaq

11. ¿Imaynapin juj runalla llapa runata wañuymanta kacharichiyta atiran?

 11 Yachasqanchis jina Adanmi Diosta mana kasukuspa perfecto kausayta chinkachiran. Ichaqa, ¿atinmanchu juj runalla llapa runata wañuymanta kacharichiyta? Arí. Biblian Romanos 5:19 (leey) textopi chayta nin. Jesusqa manan jayk’aqpas juchallikuranchu, chaymi payqa Adanpa llapa mirayninta wañuymanta kacharichiyta atiran (1 Corintios 15:21, 22, 45).

12. ¿Imaraykun Jesús sinchita ñak’ariran?

12 Biblian willan wañunan p’unchaypi Jesusqa sinchita ñak’arispa wañusqanta. Mana khuyapayaspan soq’aranku, k’aspipi clavaranku, unayta ñak’arispataq wañupuran (Juan 19:1, 16-18, 30; qhaway 15 willakuyta). ¿Imaraykun chhaynaniraqta ñak’ariran? Satanasmi niran: “Jatun pruebapi tarikuspaqa manan pipas Diostaqa kasukunmanchu”, nispa. Jesusmi ichaqa kasukusqanwan rikuchiran sinchita ñak’arispapas perfecto runaqa kasukuyta atisqanta. ¡Diosqa anchatachá kusikuran kasukusqanta rikuspaqa! (Proverbios 27:11.)

13. ¿Imakunatan ruwakuran kacharichisqa kananchispaq?

13 ¿Imaynatan pagakuran kacharichisqa kananchispaq? Ñaupaqtaqa 33 wata 14 nisán p’unchaypin Jehová Dios jinallata qhawaran Jesusta enemigonkuna wañuchinankuta (Hebreos 10:10). Kinsa p’unchay qhepamantaq Diosqa espíritu cuerpopi Jesusta kausarichiran. Chay qhepamanmi Jesusqa janaq pachaman kutispa runakunarayku sacrificakusqanta Papanman presentaran (Hebreos 9:24). Chayraqmi juchamanta wañuymantawan kacharichisqa kayta atiranchis (leey Romanos 3:23, 24).

 ¿IMAKUNAPIN BENEFICIAWANCHIS?

14, 15. ¿Imatan ruwananchis Jehová Dios perdonawananchispaq?

14 Jesuspa sacrificakusqanqa imaymanapin beneficiawanchis. Kunan yachasun imaynata kay tiempopi jamuq tiempopipas beneficiawasqanchismanta.

15 Juchanchismantan perdonasqa kasunman. Juchayoq kasqanchisraykun rimasqanchispipas ruwasqanchispipas pantanchis. ¿Imatan ruwananchis Dios perdonawananchispaq? Sonqomantan pesapakunanchis juchanchismanta, jinaspa Diosta valekunanchis perdonawananchispaq. Chayta ruwasun chayqa perdonawasunmi (Colosenses 1:13, 14; 1 Juan 1:8, 9).

16. ¿Imatan ruwananchis allin concienciayoq kanapaq?

16 Allin concienciayoqmi kasunman. Conciencianchis imapipas pantasqanchismanta juchachawaqtinchisqa mana valeqpaqmi qhawarikunchis manataqmi allinchu sientekunchis. Ichaqa ama pisipasunchu, allin concienciayoq kanapaqqa Diostan rogakunanchis perdonawananchispaq, jinan payqa perdonawasun (Hebreos 9:13, 14). Chaymantapas Diosmanmi problemanchiskunata imapi pisipasqanchistapas willakunanchis, payqa munanmi chay ruwananchista (Hebreos 4:14-16).

17. ¿Ima bendicionkunatan suyakushanchis Jesuspa sacrificakusqanrayku?

17 Wiñaypaqmi kausasunman. ‘Juchaq pagayninqa wañuymi, Diospa qokuyninmi ichaqa wiñay kausay Cristorayku’ (Romanos 6:23). Jesuspa sacrificakusqanraykun suyakushanchis mana onqospa wiñaypaq kausayta (Apocalipsis 21:3, 4). ¿Imatan ruwananchis chay bendicionkunata chaskinanchispaq?

 JESUSPA SACRIFICAKUSQANMANTA AGRADECEKUSUN

18. ¿Imaraykun seguro kashanchis Jehová Dios munakuwasqanchismanta?

18 ¿Imaynan sientekunchis sumaq regalota chaskispa? Kusisqan ¿riki? Aswan valorniyoq regaloqa Jesuspa sacrificakusqanmi, chaytaqa Diosmi regalawaranchis, chaymi payta agradecekunanchis. Juan 3:16 textopin nin: “Diosqa anchatapunin runakunata munakuran, chaymi sapallan Churinta kachamuran”, nispa. Jesuspas anchatan munakuwanchis chaymi noqanchisrayku wañunanpaq listo kasharan (Juan 15:13). Chaywanmi yachanchis Diospas Jesuspas sapankanchista munakuwasqanchista (Gálatas 2:20).

Jehová Diosta reqsispan astawan munakunki amigontaq kankipas

19. ¿Imatan ruwanayki Diospa amigon kanaykipaq?

19 Ichaqa, ¿imatan ruwawaq Diospa amigon kanaykipaq? Jehová Diostan reqsinayki. Mana reqsisqanchis runataqa manan munakusunmanchu ¿riki? Juan 17:3 textopin willashan Diosta reqsiyta atisqanchista. Diosta reqsispaqa astawanmi munakunki, kusichinki, amigontaq kankipas. Chhaynaqa Bibliata estudiashallay Jehová Diosmanta yachanaykipaq (1 Juan 5:3).

20. ¿Imaynatan rikuchiwaq Jesuspa sacrificakusqanpi iñisqaykita?

20 Jesuspa sacrificakusqanpi iñiy. Biblian nin: “Churipi iñiqqa wiñay kausayniyoqmi kanqa”, nispa (Juan 3:36). ¿Imaynatan Churipi iñinchis? Jesuspa yachachisqanta kasukuspa (Juan 13:15). Manan “Jesuspiqa iñinin” nispallachu ninanchis, aswanpas ruwayninchiswanmi rikuchinanchis sacrificakusqanpi iñisqanchista. Santiago 2:26 texton nin: ‘Manachus allin kaqkunata ruwasunman chayqa, wañusqan iñiyninchisqa kashan’, nispa.

21, 22. a) ¿Imaraykun sapa wata rinanchis Jesuspa wañupusqanta yuyarinapaq juñunakuyman? b) ¿Imamantan yachasun 6, 7 capitulokunapi?

 21 Jesuspa wañupusqanta yuyarinapaq juñunakuyman riy. Jesusmi discipulonkunata kamachiran wañupusqanta yuyarinankupaq. Chaytan kasukunchis Jesuspa wañupusqanta yuyarinapaq juñunakuyman rispa, chaytan nikullantaq “Señorpa cenan” nispa (1 Corintios 11:20; Mateo 26:26-28). Jesusqa munanmi sacrificakusqanta yuyarinanchista, chaymi niran: “Kaytaqa ruwallankichispunin noqata yuyariwanaykichispaq”, nispa (leey Lucas 22:19). Chay juñunakuyman rispan Diostapas Jesustapas agradecekunchis anchata munakuwasqanchismanta (qhaway 16 willakuyta).

22 Jesuspa sacrificakusqanqa ancha valorniyoqmi (2 Corintios 9:14, 15). 6, 7 capitulokunapin yachasun imaynata Jesuspa sacrificakusqan millón-millonninpi wañuqkunatapas beneficiasqanta.