Kichay leenaykipaq

Índice nisqaman riy

 15 CAPÍTULO

¿Imaynatan tariwaq cheqaq religionta?

¿Imaynatan tariwaq cheqaq religionta?

1. ¿Pillan niwasunman imaynatachus Diosta adorananchis kasqanta?

YAQA llapa religionkunan ninku: “Cheqaqtan Diosmanta yachachiyku”, nispa. Chayqa manan cheqaqchu, manan kaqllatachu Diosmanta yachachinku nitaq imaynata adoranamantapas. Chhaynaqa, ¿imaynapin yachasunman mayqen religión cheqaqta yachachisqanta? Jehová Diospa willasqanta uyarispa, payllan niwasunman imaynatachus adorananchis kasqanta.

2. ¿Imatan ruwanayki imaynatachus Diosta adorana kasqanta yachanaykipaq?

2 Jehová Diosmi Bibliata qowaranchis imaynatachus adorananchis kasqanta yachananchispaq. Chaymi Bibliata estudianayki, chhaynapin Diosqa yanapasunki yachachisqanta entiendenaykipaq chayman jina kausanaykipaqpas (Isaías 48:17).

3. ¿Ima ruwananchistan Dios munan?

3 Wakin runakunan ninku: “Diosqa llapa religionkunatan aceptan”, nispa. Jesusqa manan chaytachu niran aswanmi niran: “Manan llapa ‘Señor, Señor’ niwaqniychu janaq pacha gobiernomanqa jaykunqa, aswanpas janaq pachapi kaq Yayaypa munayninta ruwaqllan”, nispa. Chhaynaqa yachananchismi imachus Diospa munaynin kasqanta, chayman jinataqmi kausananchis. Mana chayqa Jesuspa nisqan jina, ‘mana allin kaqta ruwaqkunan’ kasunman (Mateo 7:21-23).

4. ¿Imatan Jesús willaran Diospa munaynin ruwaymanta?

 4 Jesusmi willaran Diospa munayninta ruwayqa mana facilchu kananta, chaymi niran: “K’illku punkunta jaykuychis, ama jatun punkuntaqa; chayninta jaykuq anchollaña jatun ñanqa wañuymanmi apan, askhataqmi chaynintaqa rishanku; k’illku punkunta jaykuq ñañu ñanmi ichaqa kausayman apan, pisillataqmi chaytaqa tarinku”, nispa (Mateo 7:13, 14). Ñañu ñanqa cheqaq religiontan representan kausaymantaqmi apan, jatun ñantaq pantasqa religionta representan wañuymantaq apan. Jehová Diosqa manan munanchu pipas wañunanta, chaymi tiempota qoshan paymanta yachanankupaq (2 Pedro 3:9).

CHEQAQ RELIGIONTA TARINAPAQ YANAPAYKUNA

5. ¿Imaynatan reqsisunman cheqaq religionta?

5 Jesusmi willaran cheqaq religiontaqa creesqankupi ruwasqankupi reqsinanchista, niranmi: “Paykunataqa imachus ruwasqankupin reqsinkichis”, nispa. Nillarantaqmi: ‘Allin sach’aqa allin rurutan rurun’, nispa (Mateo 7:16, 17). Diosta adoraqkuna pantaq runakunaña kanku chaypas, kallpachakunkun allin kaqta ruwanankupaq. ¿Imaynan kanan cheqaq religión? Chayta kunan yachasun.

6, 7. a) ¿Imaraykun cheqaq religión Bibliaq nisqanman jina yachachin? b) ¿Imatan Jesuspa ejemplonmanta yachanchis?

6 Cheqaq religionqa Bibliaq nisqanman jinan yachachin. Bibliapin nin: “Diospa simin qelqapi qelqasqa kaqqa llapanmi Diospa yuyaychasqan, chaymi chaykunaqa allinpuni yachachinapaq, anyanapaq, imatapas allinyachinapaq, chanin kaywan wanachinapaqpas; chhaynapi Diosta serviq runaqa allin  preparasqa kananpaq, arí, tukuy allin ruwaykunapaq allin-allin preparasqa kananpaq”, nispa (2 Timoteo 3:16, 17). Apóstol Pablopas niranmi: “Noqaykumanta Diospa siminta chaskishaspaykichisqa manan runaq siminta jinachu chaskirankichis, aswanmi Diospa siminta jinapuni”, nispa (1 Tesalonicenses 2:13). Cheqaq religionqa Bibliaq nisqanman jinan yachachin, manan runaq piensasqanman jinachu.

7 Jesusqa Diospa siminmantan yachachiran (leey Juan 17:17). Sapa kutillanmi niq: “Qelqasqan kashan”, nispa (Mateo 4:4, 7, 10). Cheqaq cristianokunapas Jesuspa ejemplonta qatikuspan Bibliaq nisqanman jinapuni yachachinku.

8. ¿Imatan Jesús niran Dios adoraymanta?

8 Jehová Diosllatan adorananchis. Salmos 83:18 textopin nin: “Ancha jatun Dios kasqaykita reqsichunku”, nispa. Romanos 10:13 textotaq willashan Diospa sutinqa Jehová kasqanta. Jesusqa reqsichiytan munaran pichus cheqaq Dios kasqanta, chaymi runakunaman Diospa sutinta willaran (leey Juan 17:6). Jinaspapas niranmi: “Qelqasqan kashan: ‘Jehová Diosniykitan adoranki, pay sapallantataqmi servinkipas’”, nispa (Mateo 4:10). Noqanchispas Jesús jinan Jehová Diosllata adoranchis. Jinaspapas sutinta jujkunaman willanchis imatachus noqanchispaq ruwananmantawan.

9, 10. ¿Imaynatan jujkuna-jujkunawan munanakusqanchista rikuchinchis?

9 Jujkuna-jujkunawan munanakunanchis. Jesusmi discipulonkunata yachachiran paykunapura munanakunankupaq (leey Juan 13:35). Munakusqanchismi jujllachawanchis maymantaña kaqtinchispas, qhapaqña wajchaña kaqtinchispas (Colosenses 3:14).  Chayraykun mana guerraman rinchischu nitaq pitapas wañuchinchischu. Bibliapin nin: “Pipas mana chaninta kausaqqa, wayqentapas mana munakuqqa manan Diosmantachu jamun. Chaywanmi sut’ita yachakun pikunachus Diospa wawankuna kasqanta, pikunataqchus Saqraq wawankuna kasqantapas”, nispa. Nillantaqmi: “Jujkuna-jujkunawanmi munanakunanchis. Manan Satanasmanta jamuq Caín jinachu kananchis, paymi mana khuyapayaspa wayqenta wañuchiran”, nispa (1 Juan 3:10-12; 4:20, 21).

10 Jinaspapas tiemponchista qospa kaqninchista utilizaspa iman yanapanakunchis kallpachanakunchispas (Hebreos 10:24, 25). Chaymantapas ‘lliupaqmi allinta ruwapunchis’ (Gálatas 6:10).

11. ¿Imaraykun Jesusta kasukunanchis?

11 Jesustan kasukunanchis salvaqninchis kasqanrayku. Bibliapin nin: “Payllan salvawaqninchisqa; kay pachapiqa manan pitapas Diosqa ajllaranchu salvawananchispaq, aswanpas payllatan ajllaran”, nispa (Hechos 4:12). 5 capitulopin yacharanchis Jehová Dios Jesusta kay allpaman noqanchisrayku wañunanpaq kachamusqanta (Mateo 20:28). Jehová Diosmi Jesusta ajllaran rey kananpaq. Chhaynaqa wiñaypaq kausayta munanchis chayqa Jesustan kasukunanchis (leey Juan 3:36).

12. ¿Imaraykun politicapi mana participanchischu?

12 Manan politicapi participananchischu. Jesusqa manan politicapiqa participaranchu, chaymi Pilatota niran: “Gobiernoyqa manan kay pachamantachu”, nispa (leey Juan 18:36). Noqanchispas Jesús jinan Diospa gobiernollanta apoyanchis, chaymi maypiña tiyaspapas mana politicapiqa participanchischu.  Bibliapin ichaqa kamachiwanchis ‘autoridadkunata kasunanchista’ (Romanos 13:1). Autoridadkunaq churasqan leykunataqa kasukunchismi, ichaqa Diospa kamachisqan contra kaqtinqa apostolkuna jinan ninchis: “Kamachikuq Diostan ñaupaqtaqa kasukunayku, runakunata kasukunaykumantaqa”, nispa (Hechos 5:29; Marcos 12:17).

13. ¿Imatan Diospa gobiernonmanta willanchis?

13 Diospa gobiernollanmi problemanchiskunata tukuchinqa, chaytan willananchis. Jesusmi niran: “Diospa gobiernonmanta allin willakuykunan pachantinpi willasqa kanqa”, nispa (leey Mateo 24:14). Manan mayqen gobiernopas atinchu problemanchiskuna allichaytaqa (Salmos 146:3). Jesusmi yachachiwaranchis khaynata mañakunapaq: “Gobiernoyki jamuchun. Munayniyki kay pachapi ruwakuchun imaynan janaq pachapipas ruwakun jinata”, nispa (Mateo 6:10). Diospa gobiernonmi llapa gobiernokunata chinkachispa wiñaypaq kashallanqa (Daniel 2:44).

14. Qhawarisqaykiman jina, ¿mayqenmi cheqaq religión kanman?

14 Qhawarisqaykiman jina, ¿pikunan Bibliaq nisqanman jina yachachinku, Diospa sutinta reqsichinku, jujkuna-jujkunawan munanakunku? ¿Pikunan creenku Jesusta salvawananchispaq Dios kachamusqanpi? ¿Pikunan politicapi mana participankuchu, jinaspa willanku Diospa gobiernollan problemanchiskunata allichananta? Jehová Diospa testigonkunallan (Isaías 43:10-12).

¿IMATAN RUWANAYKI?

15. ¿Imatan ruwananchis adorasqanchista Dios aceptananpaq?

15 Manan “Diosqa kanmi” nispallachu ninanchis,  supaykunapas creenkun Dios kasqantaqa ichaqa manan kasukunkuchu (Santiago 2:19). Adorasqanchista Dios aceptananpaqqa kasukunanchismi kamachisqanta.

16. ¿Imaraykun pantasqa religionmanta lloqsipunanchis?

16 Adorasqanchista Dios aceptananpaqqa pantasqa religionmantan lloqsipunanchis. Profeta Isaiasmi niran: “Lloqsiychis, jinaspa ch’uyanchakuychis”, nispa (Isaías 52:11; 2 Corintios 6:17). Chaymi pantasqa religionpa ruwayninkunata mana ruwananchischu.

17, 18. a) ¿Iman “Jatun Babilonia”? b) ¿Imaraykun usqhaylla lloqsipunayki?

17 Pantasqa religionqa manan Bibliaq nisqanman jinachu Dios adorayta yachachin. Llapa pantasqa religionkunatan Biblia sutichan: “Jatun Babilonia”, nispa (Apocalipsis 17:5). ¿Imaraykun chhaynata sutichan? Jatun para kasqan qhepaman Babilonia llaqtapi askha llulla yachachikuykuna rijurisqanrayku. Jinaspan chay yachachikuykuna mundontinman ch’eqeriran. Ejemplopaq, Babiloniapin adoraqku jujllapi kinsa dioskunata. Kunanpas askha religionkunan yachachinku: “Diosqa Trinidadmi”, nispa. Biblian ichaqa willan Jehová Dioslla cheqaq Dios kasqanta, Jesustaq Churin kasqanta (Juan 17:3). Jinaspapas creeqkun wañupuq runaq espiritun kausashasqanpi, infiernopi ñak’arishasqanpipas. Chayqa manan cheqaqchu (qhaway 14, 17, 18 willakuykunata).

18 Diosmi willaranña llapa pantasqa religionkuna pisi tiempollamanta chinkachisqa kananta (Apocalipsis 18:8). Chaymi pantasqa religionmanta usqhaylla lloqsipunayki. Diospas munanmi usqhaylla lloqsipunaykita (Apocalipsis 18:4).

Diosta servinaykipaq decidikunki chayqa jatun familiatan Diosqa qosunki

19. ¿Imaynatan Dios yanapasunki payta servinaykipaq decidikuqtiyki?

 19 Diosta servinaykipaq pantasqa religionta saqepuqtiykiqa yaqapaschá familiaykikuna, amigoykikunapas qanwan phiñakunkuman otaq p’enqachisunkikuman. Jehová Diosmi ichaqa mana saqesunkichu, payqa anchata munanakuq jatun familiatan qosunki, jinaspapas jamuq tiempopin wiñay kausayta qosunki (Marcos 10:28-30). Yaqapaschá qhepamanqa Diosta servinaykita jark’akuq familiaykikuna amigoykikunapas decidinkuman Biblia estudiayta.

20. ¿Imaraykun decidikunayki cheqaq religionpi kanaykipaq?

20 Pisi tiempollamantan tukuy millay ruwaykunata Diosqa tukuchipunqa, gobiernontaq kay allpata kamachimunqa (2 Pedro 3:9, 13). ¡Chayqa sumaq tiempon kanqa! Llapallankun Jehová Diosta paypa munasqanman jina adoranqaku. Chaymi kunan decidikunayki cheqaq religionpi kanaykipaq.