Kichay leenaykipaq

Índice nisqaman riy

 17 CAPÍTULO

May munaymi Diosmanta mañakuyqa

May munaymi Diosmanta mañakuyqa

“Janaq pachatapas kay pachatapas kamaq” Diosqa uyariytan munawanchis (Salmos 115:15)

1, 2. a) ¿Imaraykun Diosmanta mañakuy may sumaqpuni? b) ¿Imaraykun allinta yachananchis mañakuymanta Bibliaq nisqanta?

JANAQ pachatapas kay pachatapas kamaq Jehová Diospaqqa jatun nacionkunaqa unu sut’uy jinallan (Salmos 115:15; Isaías 40:15). Sinchi juch’uyña Diospaq kanchis chaypas, Bibliapin nin: ‘Jehová Diosqa llapa wajakuqninkunaq cercallanpin kashan, jayk’an cheqaq sonqowan wajakuqninkunaq qayllallanpin kashan. Manchakuqninkunaq munasqantan junt’an, wajakusqankutan uyarin, paykunatan salvan’, nispa (Salmos 145:18, 19). ¡May munaymi chayqa! Tukuy atiyniyoq Jehová Diosmi amigonchis kayta munan, jinaspapas mañakusqanchistan uyariyta munan.

2 Ichaqa mañakusqanchista Jehová Dios uyarinanpaqqa, paypa munasqanman jinan kanan. Chayta yachananchispaqmi Biblia yanapawasun.

¿IMARAYKUN DIOSMANTA MAÑAKUNAYKI?

3. ¿Imaraykun Jehová Diosmanta mañakunayki?

3 Jehová Diosmi invitawanchis paywan rimananchispaq otaq mañakunanchispaq. Filipenses 4:6, 7 (leey) textopin chayta niwanchis. Tukuyta kamaq Diosqa anchatan munakusunki, chaymi munan ima problemaykitapas imayna sientekusqaykitapas willakunaykita.

4. ¿Imata ruwaspan Dioswan amigontin kasunman?

 4 Diosmanta mañakuspaqa astawanmi paywan amigontin kanki. Sichus amigoykiwan sapa kutilla rimankichis imachus piensasqaykichismanta, llakichisqasuykichismanta imayna sientekusqaykichismantapas chayqa, astawanmi munanakunkichis ¿riki? Chay jinan Jehová Diosninchiswanpas, payqa Bibliapin willasunki ima piensasqanta, imayna sientekusqanta, jamuq tiempopi imachus ruwanantapas. Sichus qanpas imayna sientekusqaykita sapa kutilla llapanta willakunki chayqa astawanmi Dioswan amigontin kanki (Santiago 4:8).

¿IMAKUNATAN RUWANA MAÑAKUSQANCHISTA UYARINANPAQ?

5. Diosqa manan llapa runaq mañakusqantachu uyarin, ¿imaynapin chayta yachanchis?

5 ¿Llapa runaq mañakusqantachu Dios uyarin? Manan. Profeta Isaiaspa tiemponpin Diosqa Israel runakunata niran: “Anchataña mañakuwaqtiykichispas,  manan uyarisqaykichischu. Qankunaqa runa wañuchiqkunan kankichis”, nispa (Isaías 1:15). Sichus Diospa cheqnikusqanta ruwasun chayqa, Jehová Diosqa manan mañakusqanchista uyarinqachu.

6. a) ¿Imaraykun iñiyniyoq kananchis? b) ¿Imaynatan Diospi iñisqanchista rikuchisunman?

6 Jehová Dios mañakusqanchista uyarinanpaqqa, paypin iñinanchis (Marcos 11:24). Apóstol Pablo niran: “Manachus iñisunman chayqa manapunin Diospa sonqonpaq jinachu kasunman; pipas Diosman achhuykuqqa creenanmi Diosqa cheqaqpuni kasqanta, payta tukuy sonqowan maskhaqninkunamanpas premiota qoq kasqantawan”, nispa (Hebreos 11:6). Ichaqa paypi iñisqanchistaqa rikuchinchis sapa p’unchay Diosta kasukuspan (leey Santiago 2:26).

7. a) ¿Imaraykun respetowan k’umuykukuspa Diosmanta mañakuna? b) ¿Imaynatan rikuchinchis sonqomanta mañakusqanchista?

7 Diosmanta mañakuspaqa respetowanmi k’umuykukuspan mañakunanchis. ¿Imarayku? Juj presidentewan rimananchis kanman chayqa respetowanmi rimasunman. Jehová Diosqa tukuy atiyniyoqmi chaymi paywanqa aswan respetowanraq rimananchis (Génesis 17:1; Salmos 138:6). Jinaspapas sonqonchispi kaqtan llapanta willakunanchis, manataqmi kaq simikunallatachu repetinanchis (Mateo 6:7, 8).

8. ¿Imatan ruwananchis Diosmanta mañakusqanchis qhepaman?

8 Chaymantapas kallpachakunanchismi mañakusqanchisman jina ruwananchispaq. Sichus kausananchispaq necesitasqanchista mañakunchis chayqa, manan “Diosqa qowanqan” nispachu jinalla kananchis. Aswanmi ima ruway atisqanchispipas llank’ananchis (Mateo 6:11; 2 Tesalonicenses 3:10). Mana allin ruwayta  saqepunapaq yanapayta mañakunchis chayqa, cuidakunanchismi chay juchaman apaq tentacionkunamanta (Colosenses 3:5). Kunanqa yachasunchis mañakuymanta juj tapuykunata.

MAÑAKUYMANTA TAPUYKUNA

9. a) ¿Pimanmi mañakunanchis? b) ¿Imatan Juan 14:6 texto yachachiwanchis mañakuymanta?

9 ¿Pimanmi mañakunanchis? Jesusmi apostolninkunaman khaynata yachachiran: “Yayayku janaq pachapi kaq”, nispa (Mateo 6:9). Chhaynaqa Jehová Diosllamanmi mañakunanchis. Jesusqa nillarantaqmi: “Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa”, nispa (Juan 14:6). Chaymi Jesuspa sutinpi mañakunanchis. ¿Imarayku? Yachasqanchis jina Jesusqa kay allpamanmi jamuran juchamanta wañuymantawan salvawananchispaq (Juan 3:16; Romanos 5:12). Jinaspapas uma sacerdote, juez kananpaqmi Diosqa Jesusta nombraran (Juan 5:22; Hebreos 6:20).

Imay ratopipas mañakusunmanmi

10. ¿Qonqorikuspallachu Diosmanta mañakunanchis? Explicay.

10 ¿Qonqorikuspallachu Diosmanta mañakuna? Manan. Jehová Diosqa manan chaytachu nin. Bibliapin yachachiwanchis tiyaspa, k’umuykuspa, qonqorikuspa otaq sayaspa mañakunanchista (1 Crónicas 17:16; Nehemías 8:6; Daniel 6:10; 1 Reyes 8:22, 23). Jehová Diospaqqa respetowan sonqomanta mañakusqanchismi aswan importante, manan imayna formapi mañakusqanchischu. Jinaspapas mañakusunmanmi alto kunkawan, ch’inllapas, maypipas, p’unchaypipas, tutapipas. Jehová Diosqa uyarinmi mañakusqanchista jujkuna manaña uyarishaqtinpas (Nehemías 2:1-6).

11. ¿Imakunamantan mañakusunman?

 11 ¿Imakunamantan mañakusunman? Diospa munasqanman jina kaqtinqa imamantapas mañakusunmanmi. Biblian nin: ‘Diospa munayninman jina mañakusunchis chayqa, Diosqa uyariwasunmi’, nispa (1 Juan 5:14). Imaynan confiasqayki amigoman imachus piensasqaykita sientesqaykitapas willakunki, chhaynatan Jehová Diosmanpas willakuwaq (Salmos 62:8). Mañakusunmanmi santo espiritunta allin kaqta ruwanapaq, allinta decidinapaqtaq yachayta, problemakunata atipanapaqtaq kallpata (Lucas 11:13; Santiago 1:5). Mañakunanchismi juchanchista perdonawananchispaq (Efesios 1:3, 7). Jinaspapas mañakunanchismi familianchispaq, iñiq t’aqapi hermanokunapaq, juj runakunapaqpas (Hechos 12:5; Colosenses 4:12).

12. ¿Imakunan aswan importante kanan mañakusqanchispi?

12 ¿Imakunan aswan importante kanan mañakusqanchispi? Jehová Dios, paypa munaynin ima. Sonqomantan agradecekunanchis noqanchisrayku tukuyta ruwasqanmanta (1 Crónicas 29:10-13). Jesusmi chayta yachachiran discipulonkunaman mañakuyta yachachishaspa (leey Mateo 6:9-13). Ñaupaqtaqa Diospa sutin ch’uyapaq jap’isqa kananpaqmi mañakuna. Chaymantataq Diospa gobiernon jamunanpaq, kay pachapi Diospa munaynin ruwakunanpaqpas. Chay qhepamanñan imachus necesitasqanchistaqa mañakunanchis. Chhaynata mañakuspan rikuchinchis imachus noqanchispaq aswan importante kasqanta.

13. ¿Jayk’a tiempon mañakunanchis?

13 ¿Jayk’a tiempon mañakunanchis? Bibliaqa manan ninchu jayk’a tiempo mañakunanchista. Necesitasqanchisman jinan kanman pisi tiempo otaq askha  tiempopas. Mijunanchispaqqa pisi tiempollan mañakusunman. Jehová Diosta agradecekunapaq otaq ima llakikuyninchistapas willakunapaqmi ichaqa unay tiempo mañakusunman (1 Samuel 1:12, 15). Jujkuna qhawariwananchispaq jina unayta mañakuyqa manan allinchu. Jesuspa tiemponpin wakin runakuna chayta ruwaranku (Lucas 20:46, 47). Diosqa manan chay jina mañakuytaqa chaskinchu payqa sonqomanta mañakunanchistan munan.

14. a) ¿Jayk’a kutitan mañakunanchis? b) ¿Imatan chay yachachiwanchis Jehová Diosmanta?

 14 ¿Jayk’a kutitan mañakunanchis? Diosqa sapa kutilla mañakunanchistan munan. Bibliapin niwanchis: “Mañakushallaychispuni”, nispa (Mateo 26:41; Romanos 12:12; 1 Tesalonicenses 5:17). Jehová Diosqa liston kashan uyariwananchispaq. Chaymi sapa p’unchay agradecekunanchis munakuwasqanchismanta, tukuyta qowasqanchismantapas. Mañakusunmanmi allin yuyayta, kallpata qowananchispaqpas. Sichus ancha allinpaq mañakuyta qhawarinchis chayqa, sapa kutinmi Dioswan rimasun.

15. Mañakuyta tukuspa, ¿imaraykun “amén” nispa ninanchis?

15 Mañakuyta tukuspa, ¿imaraykun “amén” nispa  ninanchis? “Amén” palabraqa “chhayna kachun” “chhaynapunin” ninantan nin. “Amén” nispa mañakuyta tukuspaqa rikuchishanchis sonqomanta mañakusqanchistan (Salmos 41:13). Chaymantapas askha runaq qayllanpi mañakuyta uyarishaspa “amén” nispa nisqanchiswanmi rikuchinchis chay mañakuywan acuerdopi kasqanchista. Chaytaqa ch’inllapas otaq alto kunkawanpas nisunmanmi (1 Crónicas 16:36; 1 Corintios 14:16).

¿IMAYNATAN DIOS KUTICHIMUN?

16. ¿Kutichimunchu Dios mañakusqanchisman? Explicay.

16 ¿Kutichimunpunichu Dios mañakusqanchisman? Arí. Biblia willan Diosqa mañakusqanchista uyarispa kutichimusqanta (Salmos 65:2; Isaías 30:19). Jehová Diosqa millonninpi runaq mañakusqantan kutichimun imaymana formamanta.

17. ¿Imaynatan Jehová Dios utilizan angelninkunata serviqnin runakunatapas mañakusqanchisman kutichimunanpaq?

17 Jehová Diosqa angelkunawan serviqnin runakunawan iman mañakusqanchista kutichimun (Hebreos 1:13, 14). Askha runakunan mañakuranku Bibliata entiendenankupaq, jinan chay qhepallaman Testigokuna visitaranku. Bibliaqa willanmi allpantinpi ‘allin willakuykunata’ predicakusqanpi angelkuna yanapakusqankuta (leey Apocalipsis 14:6). Noqanchispas mañakuranchischá Diospa yanapayninta problemapi tarikuspa otaq imatapas necesitashaspa, jinaspa iñiq t’aqapi hermanonchiskuna yanapawaranchis (Proverbios 12:25; Santiago 2:16).

Jehová Diosqa serviqninkunawanmi mañakusqanchisman kutichimunman

18. ¿Imaynatan Jehová Dios utilizan santo espiritunta Bibliatapas mañakusqanchisman kutichimunanpaq?

18 Diosqa santo espirituntan utilizallantaq mañakusqanchisman  kutichimunanpaq. Juj problemata atipanapaq yanapayta mañakuqtinchisqa, santo espiritunwanmi yuyayta qowasunman otaq kallpata qowasunman (2 Corintios 4:7). Bibliawanpas yanapawanchismi allinta imatapas decidinapaq. Bibliata leespan tarisunman yanapawananchispaq jina textokunata. Juñunakuypipas Diosqa pitapas kallpachanmanmi imatachus necesitasqanchismanta comentananpaq, otaq iñiq t’aqapi umalliwan Bibliaq nisqanman jina consejota qowasunman (Gálatas 6:1).

19. Mañakusqanchisman Jehová Dios mana kutichimunanpaq piensaqtinchis, ¿imatan yuyarinanchis?

19 Mayninqa niranchispaschá: “Diosqa manachus jina kay mañakusqayman kutichimunchu”, nispa. Chhayna kaqtinqa kaytan mana qonqananchischu: Diosqa yachanmi imachus necesitasqanchista, chaymi yachan jayk’aqta imaynata kutichimuytapas. Mayninqa askha kutipipaschá mañakunanchis kanqa, chhaynapin rikuchisun Diospi confiasqanchista chay mañakusqanchis importante kasqantapas (Lucas 11:5-10). Jinaspapas mayninqa manan munasqanchisman jinachu kutichimunqa. Yaqapaschá juj problemata chinkachinanpaq mañakuranchis ichaqa chinkachinanmantaqa aswanpas kallpata qowaranchis aguantananchispaq (leey Filipenses 4:13).

20. ¿Imaraykun mañakushanallanchis?

20 ¡May sumaqmi Diosmanta mañakuyqa! Noqanchisqa seguron kashanchis Diospa uyariwasqanchismantaqa (Salmos 145:18). Sichus sapa kutilla sonqonchispi kaqta willakusun chayqa, astawanmi Jehová Dioswan amigontin kasun.