Kichay leenaykipaq

Índice nisqaman riy

 18 CAPÍTULO

Diosman prometekuspa bautizakuy

Diosman prometekuspa bautizakuy

1. ¿Imatan yaqapas tapukuwaq kay librota estudiasqayki qhepaman?

KAY librowan Bibliata estudiaspan yacharanki wiñay kausayta Dios prometesqanmanta, wañupuqkuna imaynapi tarikusqankumanta, kausarimpuymanta, juj importante yachachikuykunamantawan (Eclesiastés 9:5; Lucas 23:43; Juan 5:28, 29; Apocalipsis 21:3, 4). Jinaspapas rishankipaschá Jehová Diospa  testigonkunaq juñunakuyninman, creenkitaq paykuna cheqaq religión kasqankuta (Juan 13:35). Yaqapaschá Dioswanpas amigontinña kashanki, jinaspa decidisqa kashanki payta servinaykipaq. Chhayna kaqtinqa tapukurankichá: “¿Imatan ruwanay Diosta servinaypaq?”, nispa

2. ¿Imaraykun Etiopía llaqtayoq runa bautizakuyta munaran?

2 Chaytan tapukuran Jesuspa tiemponpi tiyaq Etiopía llaqtayoq runa. Jesuspa kausarimpusqan qhepamanmi discípulo Felipe chay runaman predicaran. Felipeqa sut’itan rikuchiran Jesús Mesías kasqanta. Jinan chay runaqa chayta yachaspa niran: “¡Qhawariy! ¡Unu! ¿Atiymanñachu bautizasqa kayta, icha imatawanraqchu ruwanay?”, nispa (Hechos 8:26-36).

3. a) ¿Imatan Jesús discipulonkunaman kamachiran? b) ¿Imaynatan juj runata bautizakunan?

3 Bibliaqa sut’itan willan Diosta servinapaq bautizakunanchis kasqanta. Jesusmi discipulonkunata kamachiran: ‘Llapa runakunata yachachimuychis discipuloykuna kanankupaq, bautizamuychistaq’, nispa (Mateo 28:19). Pay kikinmi bautizakuspa ejemplota qowaranchis. Chaypaqmi ichaqa llapa cuerpon unuman chinkaykuran, manataqmi pisi unuwanchu umanmanta ch’allaykuranku (Mateo 3:16). Kunanpas juj cristiano bautizakunanpaqqa llapa cuerponmi unuman chinkaykunan.

4. ¿Imatan jujkunaman rikuchinki bautizakuspayki?

4 Bautizakusqaykiwanmi jujkunaman rikuchinki Diospa amigon kasqaykita payta serviyta munasqaykitapas (Salmos 40:7, 8). Chhaynaqa tapukunkipaschá: “¿Imakunatan ruwanay bautizakunaypaq?”, nispa.

 DIOSTAN REQSINANCHIS, IÑIYNIYOQTAQ KANANCHIS

5. a) ¿Imatan ñaupaqta ruwanayki bautizakunaykipaq? b) ¿Imaraykun importante juñunakuykunaman riy?

5 Bautizakunaykipaqqa ñaupaqtan Jehová Diosta Jesustawan reqsinayki. Bibliata estudiaspaqa ñan chay ruwayta qallarirankiña (leey Juan 17:3). Ichaqa astawanmi yachanayki. Biblian willan Diospa munayninmanta allinta yachanaykita (Colosenses 1:9). Jehová Diospa testigonkunaq juñunakuyninmi yanapasunki Dioswan amigontin kanaykipaq. Chayraykun juñunakuyman riyqa importante (Hebreos 10:24, 25).

Bautizakunaykipaqqa Bibliataraqmi estudianayki

6. ¿Imakunatan Bibliamanta yachananchis bautizakunanchispaq?

6 Bautizakunaykipaqqa manan llapantaraqchu Bibliamanta yachanayki. Etiopía llaqtayoq runapas manan llapantaraqchu yacharan bautizakunanpaqqa, Diosqa manan chaytachu mañawanchis (Hechos 8:30, 31). Diosmantaqa wiñay-wiñaypaqmi yachashallasun (Eclesiastés 3:11). Ichaqa manaraq bautizakushaspan yachananchis aceptananchistaq Bibliapi kaq importante yachachikuykunata (Hebreos 5:12).

7. ¿Imaynatan Biblia estudiasqayki yanaparasunki?

7 Biblian nin: “Manachus iñisunman chayqa manapunin Diospa sonqonpaq jinachu kasunman”, nispa (Hebreos 11:6). Chaymi bautizakunapaqqa iñiyniyoq kananchis. Ñaupaq tiempopi Corinto llaqtayoq runakunapas Jesuspa discipulonkunata uyarispan iñipuranku jinaspa bautizakuranku (Hechos 18:8). Qantapas Bibliata estudiasqaykin yanaparasunki Diospa promesankunapi Jesuspa sacrificakusqanpipas iñinaykipaq, chay sacrificion juchamanta wañuymantawan salvawasunman (Josué 23:14; Hechos 4:12; 2 Timoteo 3:16, 17).

 JUJKUNAMAN YACHASQAYKITA WILLAY

8. ¿Iman tanqasunki yachasqaykimanta jujkunaman willanaykipaq?

8 Sichus Bibliamanta astawan yachanki reparankitaq chay yachasqayki vidaykipi yanapasqasuykita chayqa, iñiyniykin astawan yapakunqa. Chaytaq tanqasunki yachasqaykimanta jujkunaman willanaykipaq (Jeremías 20:9; 2 Corintios 4:13). Ichaqa, ¿pikunamanmi willawaq?

Iñisqaykin tanqasunki creesqaykimanta jujkunaman willanaykipaq

9, 10. a) ¿Pikunamanmi Bibliamanta yachasqaykita willawaq? b) ¿Imatan ruwanayki hermanokunawan kuska predicanaykipaq?

9 Yaqapaschá familiaykikunaman, amigoykikunaman, vecinoykikunaman, llank’anapi compañeroykikunamanpas willawaq. Ichaqa sumaqllata respetowan willanayki. Qhepamanqa iñiq t’aqapi hermanokunawanmi predicawaq. Sichus chayta ruwanaykipaq listoña kashanki chayqa, Bibliamanta yachachiqniykimanmi willawaq hermanokunawan predicayta munasqaykita. Sichus yachachiqniyki reparanña predicanaykipaq listo kasqaykita, Bibliaq kamachisqanman jina kausasqaykitapas chayqa, iskayniykichismi iñiq t’aqapi iskay umalliqkunawan juñukunkichis rimanaykichispaq.

10 Chay juñunakuypin umalliqkuna qhawarinqaku Bibliapi kaq importante yachachikuykunata entiendenkichus, creenkichus, Bibliaq kamachisqanta kasukushankichus manachus chayta. Jinaspapas asegurakunqakun Jehová Diospa testigon kay munasqaykita. Umalliqkunaqa llapa hermanokunapin interesakunku, qantapas munakusunkikun, chaymi mana manchakuspa paykunawan rimawaq (Hechos 20:28; 1 Pedro 5:2, 3). Juñunakusqaykichis qhepamanmi umalliqkuna willasunkiku hermanokunawan kuska predicawaqñachus manachus chayta.

11. ¿Imaraykun hermanokunawan predicanaykipaq vidaykita cambianayki?

 11 Yaqapaschá umalliqkuna nisunkiman vidaykipi cambianaykiraq kasqanta hermanokunawan kuska predicanaykipaq. ¿Imaraykun chayta ruwanayki? Predicaspaqa Jehová Diostan representashanchis. Chaymi vidanchisqa payta jatunchananpaq jina kanan (1 Corintios 6:9, 10; Gálatas 5:19-21).

PESAPAKUNANCHISMI, KUTIRIKUNANCHISTAQ

12. ¿Imaraykun llapanchis pesapakunanchis?

12 ¿Imatawanmi ruwanayki bautizakunaykipaq? Apóstol Pedro niran: “Juchaykichismanta pesapakuychis, jinaspa Diosman kutirikuychis juchaykichiskuna pichasqa kananpaq”, nispa (Hechos 3:19). Juchanmanta pesapakuqqa sinchitan llakikun mana allin kaqta ruwasqanmanta. Sichus qhelli juchapi kausaranki chayqa pesapakunaykin. Allinta kausanaykipaq kallpachakurankiña chaypas pesapakunaykin. ¿Imarayku? Llapanchis juchayoq kasqanchisrayku, chaymi necesitanchis Dios perdonawananchista (Romanos 3:23; 5:12).

13. ¿Iman Diosman kutirikuy?

13 ¿Imatawanmi ruwana mana allin ruwasqanchismanta pesapakusqanchis qhepaman? Apóstol Pedro niran: “Diosman kutirikuychis”, nispa. ¿Imataq Diosman kutirikuyri? Chayqa mana allin ruwaykunata saqepuspa allin kaqta ruwaymi. Kaypi piensay, sichus mana reqsisqayki llaqtata viajashaspa reparawaq pantashasqaykita chayqa, kutirimuspachá maynintachus rinayki ñanta viajawaq. Kaqllataqmi vidaykiwanpas kanan, Bibliata estudiaspan reparanki vidaykipi cambianaykiraq kasqanta. Chaymi mana allin ruwaykunata saqepuspa allin kaqkunata ruwanayki.

 DIOSMAN PROMETEKUY SERVINAYKIPAQ

¿Prometekurankiñachu Diosta servinaykipaq?

14. ¿Imaynatan Diosman prometekunchis?

14 Jinaspapas bautizakunaykipaqqa ñaupaqtan Diosman prometekunayki servinaykipaq. ¿Imaynatan chayta ruwanki? Sapallaykipi kashaspan Diosman mañakuypi prometenki: “Kunanmantaqa qanllatan adorasayki munayniykitataq ñaupaqta ruwasaq”, nispa (Mateo 4:10).

15, 16. ¿Imaraykun Diosman prometekunchis servinanchispaq?

15 Imayna juj qhari juj warmita munakuspa wañupunankama munakunanpaq prometen, chhaynan Jehová Diosta servinaykipaq prometekusqaykiqa. Chayta ruwananpaqqa ñaupaqtan qhariqa warmita reqsin, astawan reqsispataq astawan munakun. Jinan paywan casarakuyta munan. Chay decidisqan jatun responsabilidadña chaypas chay warmita munakusqanraykun chaytaqa ruwan.

16 Jehová Diosta astawan reqsispaykin astawan payta munakunki serviytataq munankipas. Jinan payman prometekunki servinaykipaq. Jesusmi discipulonkunata niran: “Pipas qhepayta jamuyta munaqqa pay kikinta negakuchun”, nispa (Marcos 8:34). Pay kikinta negakuqqa Jehová Diostan tukuypi kasukun. Chaymantapas manan munasqantachu ruwan aswanpas Diospa munasqanta (leey 1 Pedro 4:2).

ATILLANKIN JUNT’AYTA

17. ¿Imaraykun wakin runakuna Diosta servinankupaq mana prometekuyta munankuchu?

17 Wakinqa manan Diosman prometekuyta munankuchu rimasqankuwan mana junt’anankupaq piensaspa. Manapaschá Diosta llakichiyta munankuchu otaq  ninku: “Mana prometekuqtiyqa Diosqa manan cuentata mañawanqachu imachus ruwasqaymanta”, nispa.

18. Diosman promesa ruwayta mana manchakunaykipaq, ¿iman yanapasunki?

18 Diosta munakunki chayqa manan Diosman promesa ruwayta manchakunkichu, jinaspapas Diosman prometekusqaykita junt’anaykipaqmi yanapasunki (Eclesiastés 5:4; Colosenses 1:10). Jinan mana sinchi sasapaqchu qhawarinki Diospa munaynin ruwayta. Apóstol Juanmi niran: “Diosta munakuyqa kamachikuyninkunata kasukuymi; kamachikuyninkunaqa manataqmi sasa junt’aychu”, nispa (1 Juan 5:3).

19. ¿Imaraykun mana manchakunanchischu Diosman prometekuyta?

19 Diosman prometekunapaqqa manan mana pantaq perfecto runaraqchu kana. Payqa manan jayk’aqpas mana atinanchistaqa mañawasunmanchu (Salmos 103:14). Jinaspapas Diosmi yanapawasun allin kaqta ruwananchispaq (Isaías 41:10). Sichus tukuy sonqonchiswan Diospi confiasun chayqa, allin ñanninta pusawasun (Proverbios 3:5, 6).

IÑISQAYKIMANTA ‘JUJKUNAMAN WILLAY’

20. Diosman prometekusqayki qhepaman, ¿imapaqmi listoña kashanki?

20 Qhawarikusqaykiman jina, ¿listoñachu kashanki Jehová Diosman prometekunaykipaq? Diosta servinaykipaq prometekusqayki qhepamanqa listoñan kashanki bautizakunaykipaq.

21, 22. ¿Imaynatan Diospi iñisqaykita jujkunaman willanki?

21 Iñiq t’aqapi umalliqman willay Diosman prometekusqaykita, bautizakuyta munasqaykitapas. Jinan umalliqkunaqa qanwan repasanqaku Bibliamanta  importante yachachikuykuna yachasqaykita. Bautizakunaykipaq listoña kasqaykita reparaspaqa willasunkikun Jehová Diospa testigonkunaq jamuq asambleanpi bautizakunaykita. Chay asambleapin juj discursopi explicakunqa imachus bautismo kasqanta. Discursota qoq hermanon iskay tapuykunata ruwanqa llapa bautizakuqkunata. Chay tapuykunaman kutichispan  Diospi iñisqaykita ‘jujkunaman willashanki’ (Romanos 10:10).

22 Chay qhepamantaq bautizasqa kanki. Chaypaqmi ichaqa llapa cuerpoyki unuman chinkaykachisqa kanqa. Bautizakusqaykiwanmi llapankuman rikuchinki Jehová Diosta servinaykipaq prometekusqaykita, Jehová Diospa testigon kasqaykitapas.

 ¿IMATAN REPRESENTAN BAUTISMOYKI?

23. ¿Iman Yayaq, Churiq, santo espirituq sutinpi bautizakuy?

23 Jesusmi discipulonkunata kamachiran Yayaq, Churiq, santo espirituq sutinpi bautizamunankupaq (leey Mateo 28:19). Yayaq sutinpi bautizakuspaqa Diospa autoridadnintan reconocenchis, Churiq sutinpi bautizakuspataq valoranchis Diospa munaynin junt’akunanpaq Jesuspa ruwasqanta, santo espirituq sutinpi bautizakuspataq reconocenchis Diosqa munayninta junt’ananpaq santo espiritunta utilizasqanta (Salmos 83:18; Mateo 28:18; Gálatas 5:22, 23; 2 Pedro 1:21).

Bautizakuspaykin rikuchinki Diospa munaynin ruway munasqaykita

24, 25. a) ¿Imatan representan bautizakusqayki? b) ¿Imamantan qatimuq capitulopi yachasun?

24 Bautizakushaspa unuman chinkaykusqaykiqa representan ñaupa kausasqaykipaq wañupusqaykitan. Unumanta lloqsimusqaykitaq representan Jehová Diospa munayninta ruwanaykipaq kausarimpusqaykita. Chaymantapachan Diosta servinaykipaq kausanki. Manan juj runamanchu, juj organizacionmanchu, nitaq juj llank’anamanchu prometekunki, aswanpas Jehová Diosmanmi.

25 Diosta servinaykipaq prometekusqaykin yanapasunki Dioswan amigontin kanaykipaq (Salmos 25:14). Ichaqa manan nisunmanchu bautizakuspaqa salvasqañan kapuni nispaqa. Apóstol Pablo niran: “Llank’ashaychis salvasqa kayman chayanaykichispaq”, nispa (Filipenses 2:12). Bautizakuspaqa chayraqmi salvasqa kanapaq ñanta puririshanchis. Chhaynaqa, ¿imakunatan ruwashanallayki Diospa amigon kanaykipaq? Qatimuq capitulopin chay tapuyta kutichisun.