Kichay leenaykipaq

Índice nisqaman riy

 19 CAPÍTULO

Jehová Diosta munakushallay

Jehová Diosta munakushallay

1, 2. ¿Pin pakaykuwaqninchis? ¿Imatan chaypaq ruwananchis?

PURISHAQTIYKIN qonqaylla cielota yana phuyu junt’aykun, llifllikachamuspataq parayta qallarin. Chhaynapi tarikuspa, ¿imatan ruwanki? Usqhayllan pakakunata maskhanki, chayta tariruspaqa thajchá sientekunki.

2 Kay tiempopi kausaypas chhaynan kashan. Tukuy ladopin millay ruwaykuna yapakushan. Chayta rikuspaqa tapukunkichá: “¿Imaynatan chaykunamanta pakaykusqa kayman?”, nispa. Salmos librota qelqaqmi niran: ‘Diostan nini: Qanqa yanapaykuwaqniymi, pukaraymi, jap’ipaykukunay Diosmi kanki’, nispa (Salmos 91:2). Diosqa yanapawasunmi problemanchiskunata atipananchispaq, jinaspapas sumaq suyakuytan jamuq tiempopaq qowanchis.

3. ¿Imatan ruwananchis Jehová Dios yanapawananchispaq?

3 ¿Imaynatan Dios pakaykuwanchis? Ima problemanchistapas atipananchispaq yanapawaspanchismi. Jinaspapas tukuy atiyniyoq kasqanraykun ima mana allin pasawasqanchistapas jamuq tiempopi allichapunqa. Biblian niwanchis Diospa ‘munakuynillanpi kashananchispaq’ (Judas 21). Problemanchiskunapi Jehová Dios yanapawananchispaqqa, paywanmi amigontin kashanallanchis. Ichaqa, ¿imatan chaypaq ruwasunman?

 DIOSTA AGRADECEKUY

4, 5. Jehová Diosqa anchatan munakuwanchis, ¿imaynatan chayta rikuchiran?

4 Jehová Diosta munakushanallanchispaqqa allintan yachananchis may tukuyta Dios munakuwasqanchista. Diosqa anchatapunin munakuwanchis chaymi kay munay allpata qowaranchis chaypi tiyananchispaq, jinaspapas qowaranchismi imaymana clase plantakunata, animalkunata, sumaq mijuykunata, unutapas. Chaymantapas Bibliapin yachachiwaranchis sutinta, imayna kasqanta. Astawanqa ancha munasqa Churintan noqanchisrayku wañunanpaq kachamuran (Juan 3:16). Chaywanmi sumaq suyakuyniyoq kanchis.

5 Jinaspapas Diosqa janaq pachapin juj gobiernota churaran. Chay gobiernon pisi tiempomanta tukuy sufrimientota tukuchispa kay allpata sumaq paraisoman tukuchinqa, jinan chaypi kusisqa tiyasunchis (Salmos 37:29). Chaymantapas allinta kausananchispaqmi yachachiwanchis, invitawanchistaq payman mañakunanchispaq, tukuy chaykunata ruwaspan rikuchiwanchis anchata munakuwasqanchista.

6. ¿Imatan ruwananchis Jehová Dios tukuyta noqanchisrayku ruwasqanmanta?

6 Noqanchisqa anchatan Diosta agradecekunanchis noqanchisrayku tukuyta ruwasqanmanta. Askha runakunan ichaqa mana agradecekunkuchu, chaymi Jesuspa tiemponpipas pasaran. Juj kutinmi qhaliyachiran lepra onqoyniyoq chunka runakunata, ichaqa jujllan agradecekuran (Lucas 17:12-17). Noqanchispas chay agradecekuq runa jinan kayta munanchis. Diostaqa tukuy imaymana ruwasqanmantan agradecekunanchispuni.

7. ¿Imaynatan Diosta munakunanchis?

 7 Jinaspapas Jehová Diosta munakusqanchistan rikuchinanchis. Jesusmi discipulonkunata niran Jehová Diosta tukuy sonqonkuwan, tukuy almankuwan, tukuy yuyayninkuwan munakunanku kasqanta (leey Mateo 22:37).

8, 9. ¿Imaynatan Jehová Dios munakusqanchista rikuchinchis?

8 ¿Simillawanchu “Diostaqa munakunin” nispa ninanchis? Manan. Ruwayninchiswanmi Jehová Diosta tukuy sonqonchiswan, almanchiswan yuyayninchiswan munakusqanchistaqa rikuchinanchis (Mateo 7:16-20). Biblian sut’ita willan Diosta munakuspaqa kamachikuyninkunata kasukunanchis kasqanta. Kamachikuyninkunaqa manataqmi sasa junt’aychu (leey 1 Juan 5:3).

9 Jehová Diosta kasukuspaqa kusisqan kausanchis (Isaías 48:17, 18). Ichaqa, ¿iman yanapawasun Diospa amigon kashanallapaq? Chaymanta yachasun.

JEHOVÁ DIOSTA ASTAWAN MUNAKUSHALLAY

10. ¿Imaraykun Diosmanta yachashanallayki?

10 ¿Imaynapin Dioswan amigontin kapuranki? Bibliata estudiaspan Jehová Diosta allinta reqsiranki chhaynapin paytaqa munakuranki jinaspa amigontin kapuranki. Diosta munakuyqa nina jinan, nina mana wañunanpaqqa llant’atan yapashanallanchis. Diosta munakusqanchis mana chiriyananpaqpas paymantan yachashanallanchis (Proverbios 2:1-5).

Diosta munakusqanchis nina jina raurashanallanpaqqa paymantan yachashanallanchis

11. ¿Imaynan sientekunki Bibliapi yachachikuykunata entiendespa?

11 Bibliata estudiashallanki chayqa, imaymanatan yachanki jinan kusisqa sientekunki. Jesuspa iskay discipulonkunapas chhaynan sientekuranku Jesús  wakin profeciakunata explicaqtin. Paykunan niranku: “¿Manachu ñanpi rimapayawaspanchis Diospa simin qelqaq nisqanta llapanta entiendechiwashaqtinchisqa sonqonchisraq llanllariran?”, nispa (Lucas 24:32).

12, 13. a) ¿Iman pasanman Diosta munakusqanchiswan? b) ¿Imatan ruwananchis munakuyninchis ama chiriyananpaq?

12 Jesuspa yachachisqanqa discipulonkunaq sonqontan kusichiran. Qanwanpas chaychá pasaran Bibliamanta yachayta qallarishaqtiykiqa. Chhaynapin Diosta reqsiranki munakuranki ima. Ichaqa manachá munankichu munakuyniyki chiriyanantaqa (Mateo 24:12).

13 Jehová Diosta munakushanallaykipaqqa yachashanallaykin Diosmanta Jesusmantapas, jinaspapas piensanaykin yachasqaykipi imaynata ruwayman churanaykipipas (Juan 17:3). Bibliata leespa otaq estudiaspan tapukunayki: “¿Imatan Jehová Diosmanta yachachiwan?  ¿Imaynatan yanapawan Diosta astawan munakunaypaq?”, nispa (1 Timoteo 4:15).

14. ¿Imaynatan mañakuy yanapawanchis Diosta munakushanallanchispaq?

14 Amigoykiwanqa sapa kutillanmi rimanki, chhaynapin astawan amigontin kapunkichis. Sichus Jehová Dioswanpas sapa kutilla mañakuypi rimasun chayqa, astawanmi payta munakusun (leey 1 Tesalonicenses 5:17). Mañakuyqa Diospa regalonmi, chaymi sonqomanta paywanqa rimananchis (Salmos 62:8). Mañakuspaqa manan umanchismantachu repetinanchis, aswanpas sonqonchispi kaqtan willakunanchis. Sichus Bibliata estudiashallasun sonqomantataq mañakusun chayqa Jehová Diostan munakushallasun.

DIOSMANTA JUJKUNAMAN WILLAY

15, 16. ¿Imaynatan qhawarinki predicayta?

15 Jinaspapas Diospa amigon kashanallanchispaqqa creesqanchismantan jujkunaman willananchis. Diosmanta jujkunaman willayqa may sumaqmi (Lucas 1:74). Jesusmi llapan cheqaq cristianokunata kamachiran chayta ruwanankupaq, chaymi llapanchis Diospa gobiernonmanta allin willakuykunata willananchis. ¿Kasukushankichu chay kamachikuyta? (Mateo 24:14; 28:19, 20.)

16 Apóstol Pabloqa ancha allinpaqmi predicaytaqa qhawariran chaymi tupanachiran ancha valorniyoq kaqkunawan (2 Corintios 4:7). Diosmanta munayninmantawan jujkunaman willayqa ancha importante llank’aymi. Predicaspaqa Diostan servishanchis, payqa manan qonqanqachu chay ruwasqaykita (Hebreos 6:10). Jinaspapas jujkunatan yanapanki Dioswan  amigontin kanankupaq. Chayta ruwasqaykiraykun qanpas uyariqniykikunapas wiñay kausayta tariwaqchis (leey 1 Corintios 15:58). ¡Manan juj llank’anaqa chhayna kusikuytaqa qowasunmanchu!

17. ¿Imaraykun usqhayta predicananchis?

17 Biblian willan ‘allin tiempopipas, sasa tiempopipas’ usqhayta predicananchis kasqanta (2 Timoteo 4:2). Runakunaqa yachanankun Diospa gobiernonmanta. Jinaspapas Biblian willan Diospa ‘jatun p’unchaynin qayllaykamushasqanta’ ‘tiemponpi chayamunantapas’ (Sofonías 1:14; Habacuc 2:3). Pisi tiempollamantan Diosqa Satanaspa kamachisqan pachata chinkachipunqa. Chaymi llapa runakunaman willamunanchis Dios serviyta decidinankupaq.

18. ¿Imaraykun cheqaq cristianokuna jujkunawan juñunakuspa Diosta adorananchis?

18 Diosqa munanmi cheqaq cristianokuna juñukuspa payta adorananchista. Chaymi Biblia nin: ‘Jujkuna-jujkunawan allintapuni reqsinakusun, chhaynapin kallpachanakusunchis astawan munanakunanchispaq allin ruwaykunatapas ruwananchispaqwan. Amapuni juñunakuyninchiskunatapas saqesunchu imaynan wakinkuna saqeshanku jinataqa, aswanpas astawanraq kallpachanakushasun; Diospa p’unchayninpas cercapiña kasqanrayku’, nispa (Hebreos 10:24, 25). Juñunakuykunamanqa manan faltakunanchischu, chaypin jujkuna-jujkunawan kallpachanakunchis.

19. ¿Iman yanapawasun hermanokunata munakunanchispaq?

19 Juñunakuykunapiqa allin amigokunatan tarinki. Paykunaqa Diosta servinaykipaqmi yanapasunki. Imaymana clase hermanokunatan reqsinki paykunaqa Diosta servinankupaqmi kallpachakunku, ichaqa pantaq  runakunan kanku chaymi imapipas pantaqtinkuqa listo kashanayki perdonanaykipaq (leey Colosenses 3:13). Astawanqa allinkuna ruwasqankutan qhawarinayki. Chaymi yanapasunki paykunata munakunaykipaq Dioswanpas amigontin kanaykipaq.

‘CHEQAQ KAUSAYMAN’ AYPASUN

20, 21. ¿Iman ‘cheqaq kausay’?

20 Jehová Diosqa llapa amigonkuna kusisqa kausanankutan munan. Biblian willan jamuq tiempopiqa manaña kay tiempopi jinañachu kausay kananta.

Diosqa munanmi amigonkuna cheqaq kausayta chaskinankuta qanri, ¿kallpachakushankichu chaypi kanaykipaq?

21 Jamuq tiempopiqa manan 70 otaq 80 watakunallatachu kausasun aswanpas wiñaypaqmi kusisqa paraisopi kausasunchis, manañataq pipas onqonqachu. Chaytan Bibliapi nin ‘cheqaq kausay’, nispa. Chay kausayta qowananchispaqmi Diosqa prometewanchis, chayman aypananchispaqmi ichaqa kallpachakunanchis (1 Timoteo 6:12, 19).

22. a) ¿Imatan ruwananchis cheqaq kausayta chaskinanchispaq? b) ¿Imaraykullan cheqaq kausayta chaskisun?

22 ¿Imatan ruwananchis cheqaq kausayta chaskinanchispaq? ‘Allin kaqkunatan ruwananchis’ (1 Timoteo 6:18). Bibliapi yachasqanchistan kasukunanchis. Ichaqa chay kausayta chaskinanchispaqqa manan imachus ruwananchismantachu dependen aswanpas chay kausaytaqa chaskisun Diospa ‘ancha sumaq sonqo kaynillanpin’. Chaytan Diosqa junt’aq sonqo serviqninkunaman qonqa (Romanos 5:15). Jehová Diosqa maytan munashan chay regalo qoyta.

23. ¿Imaraykun kunan allinta decidinayki?

23 ¿Munasqanman jinachu Diosta adorashanki? Sichus reparakunki vidaykipi cambianaykiraq kasqanta chayqa, usqhaylla cambiay. Sichus Diospi confiasun,  tukuypitaq kasukusun chayqa kay tukukuy p’unchaykunapin millay pachamanta pakaykuwasun. Chaymantataq paraisopi wiñaypaq kausayta qowasun. Sichus kunan allinta decidinki chayqa, aypankin wiñay kausayman.