Kichay leenaykipaq

Índice nisqaman riy

 APÉNDICE

Mesiaspa chayamunanta profeta Daniel willan

Mesiaspa chayamunanta profeta Daniel willan

MANARAQ Jesús naceshaqtin pisqa pachak wata ñawpaqtan profeta Daniel kawsaran. Jehová Diosmi Danielman willaranña hayk’aqmi Jesús hawisqa kanan karan Mesías otaq Cristo kananpaq. Danielta niran: “Kaytan yachanayki entiendenayki: Jerusalenta wakmanta sayarichinapaq perqanapaqwan kamachisqa simi lloqsimusqanmanta Diospa akllasqan Kamachikuq  hamunankamaqa qanchis semanan kanqa soqta chunka iskayniyoq semanapiwan”, nispa (Daniel 9:25).

¿Hayk’aqmi Mesías rikhurimunan karan? Chaypaqmi ñawpaqta yachana ima watamantapacha yupakuyta qallariran Mesías rikhurimunanpaq. Profeciaq nisqan hina yupakuytaqa qallariran, ‘Jerusalenta wakmanta sayarichinapaq perqanapaqwan kamachisqa simi lloqsimusqanmantapachan’. ¿Hayk’aqmi chay kamachikuy ‘simi lloqsimuran’? Profeta Nehemiasmi willan “rey Artajerjes iskay chunkakaq watapi kamachikushaqtin” chay kamachikuy simi lloqsisqanta (Nehemías 2:1, 5-8). Askha historiadorkunaq  willasqan hina rey Artajerjesqa kamachikuyta qallariran 475 watapi manaraq Jesús hamushaqtin (m.J.h.). Iskay chunka wata kamachikuyninqa tupan 455 watawan (m.J.h.). Chay rayku Mesías rikhurimunanpaq Danielpa profetizasqan yupakuyta qallariran 455 watamantapacha (m.J.h.).

Danielqa willaranña hayk’a tiempomanta “Diospa akllasqan Kamachikuq” rikhurimunanta. Profecian niran, “qanchis semanan kanqa soqta chunka iskayniyoq semanapiwan”, nispa, llapanpiqa 69 semanakunan. ¿Hayk’a tiempotaq chay 69 semanakuna? Huk Bibliakuna nisqan hina, manan qanchis p’unchay semanakunachu, aswanmi watapi yupasqa semanakuna. Sapanka semanataq tupan qanchis watawan. Ñawpa judiokunaqa qanchis watatan yuparanku huk semanata hina. Yachanapaq, sapa qanchis watan huk watata waqaycharanku, chay watatan suticharanku sábado wata nispa (Éxodo 23:10, 11). Chay 69 semanakunan tupan 483 watakunawan.

455 watamantapacha (m.J.h.), 483 watakunata yupaspan 29 wataman chayanchis (J.h.q.), chay watapin Jesús bautizakuspa Mesiasman tukupuran (Lucas 3:1, 2, 21, 22). * Arí, chay profeciaqa k’apaktan hunt’akuran.

^ párr. 2 455 watamanta (m.J.h.) 1 watakama (m.J.h.) yupakun 454 watakuna. Chaymanta, 1 watamanta (m.J.h.) 1 watakama (J.h.q.) yupakun huk watallata. 1 watamantataq (J.h.q.) 29 watakama (J.h.q.) yupakun 28 watakunata. Kinsantinta yupaspa (454+1+28) yupakun 483 watakunata. Jesusmi “wañuchisqa” karan 33 watapi qanchis chunka semanakuna ukhupi (Daniel 9:24, 26). Astawan yachayta munanki chayqa maskhay Prestemos atención a las profecías de Daniel nisqa libropi, 11 capitulota, Perspicacia para comprender las Escrituras, vol. 2 libropi 1014-1017 paginakunata. Chay librokunataqa Jehová Diospa testigonkunan ruwan.