Kichay leenaykipaq

Índice nisqaman riy

 APÉNDICE

¿Diciembre killapichu Jesús naceran?

¿Diciembre killapichu Jesús naceran?

BIBLIAQA manan ninchu ima p’unchaypi ima killapi Jesuspa nacesqanta. Nitaqmi diciembre killapichu naceran, Biblian chayta sut’inchan.

Jesuspa nacesqan Belén llaqtapi diciembre killapi, ¿para tiempochu icha ch’aki tiempochu karan? Judiokunaq almanaquenpi kislev nisqa killan noviembre diciembre killakunawan tupan, chay killapiqa paranmi chirintaqmi. Qatimuq tebet killataq diciembre enero killakunawan tupan, chay killapiqa astawanmi chirin orqonkunapipas rit’inmi. Belenpi imayna tiempo kasqanmantapas Bibliaqa willanmi, chayta qhawarisun.

Bibliata qelqaq Esdraspas willanmi kislev killapi chirisqanta parasqantapas. Huk kutinsi ‘isqonkaq killa [kislev] iskay chunka p’unchaypi’ askha runakuna Jerusalenpi huñunakusqaku, paykunas ‘para chayashasqanmanta khatatatashasqaku’. Chay huñunakuq runakunan paramusqanmanta chirimusqanmantawan kayta nisqaku: ‘Parapas chayayamushan,  chaymi hawapiqa mana qhepakuykumanchu’, nispa (Esdras 10:9, 13; Jeremías 36:22). Chay rayku manaraq diciembre killa chayamushaqtin, michiqkuna uywankuta llaqtaman qatiyanpuqku mana chiri campokunapi tutantin kanankupaq.

Bibliaq willasqan hina, Jesuspa nacesqan tutataqa michiqkunas tutantin uywankuta qhawasharanku. Chhaynatan Biblia qelqaq Lucaspas willan, Belén llaqtaq qayllanpi ‘michiqkunan kasharqan uywankuta tutantin qhawaspanku’, nispa (Lucas 2:8-12). Chay michiqkunaqa manan p’unchayllachu uywankuta michiqku, aswanmi campopi tiyaqku tutantin uywankuta qhawaspa. Belén llaqtapi diciembre killapi chirirantaq pararantaq chayqa, ¿tiyankumanchu karan michiqkuna campokunapi? Manan. Jesuspa nacesqan killapiqa manan pararanchu nitaq chiriranpaschu chaywanmi yachanchis mana diciembre killapichu nacesqanta. *

Bibliaqa willanmi Jesuspa ima p’unchay wañusqanta ichaqa manan ninchu ima p’unchay nacesqanta. Chaymi yuyarichiwanchis kamachikuq Salomonpa nisqanta: “Aswan allinmi sumaqpaq hap’isqa kay, q’apaq hawinamantaqa. Aswan allinmi wañukapuy p’unchay nacemuy p’unchaymantaqa”, nispa (Eclesiastés 7:1). Chay rayku Biblia imaymanata willan Cristoq predicasqanmanta wañusqanmantapas, nacesqanmantan ichaqa pisillata willan.

Jesuspa nacesqan tutataqa michiqkunan campokunapi uywankuta qhawasharanku

^ párr. 1 Astawan yachayta munanki chayqa maskhay Razonamiento a partir de las Escrituras nisqa librota, 111-114 paginakunata, chay librotaqa Jehová Diospa testigonkunan ruwan.