Kichay leenaykipaq

Índice nisqaman riy

 16 T’AQA

Mesías chayamun

Mesías chayamun

Jehová Diosmi willarqan Nazaret llaqtayoq Jesús prometesqa Mesías kasqanta

¿IMAYNAPIN runakuna yachankuman pi Mesías kasqanta? Jehová Dios kikinmi reqsichinan karqan. Hebreo Qelqakuna qelqayta tukukusqanmanta tawa pachak watakuna pasaqtinmi, ángel Gabriel Nazaret llaqtapi tiyaq María sutiyoq doncellaman rikhurirqan. Chay angelmi willarqan Diospa espiritunpa yanapayninwan wiksallikunanta. Chay wawaqa hanaq pachapi Diospa phiwi Churinmi karqan, paypa kawsaynintan Mariaq wiksanman astamurqan. Paymi Diospa prometesqan Rey karqan.

¿Ima nirqanmi María? “Nisqaykiman hina Diosqa ñoqawan ruwachun”, nirqanmi. Chaykunatan Jehová Dios angelninwan Mariawan casarakunanpaq rimapayaqnin Joseman willachirqan, payqa carpinteriapin llank’aq. Hinan chay qhepaman José Mariawan casarakurqan. Mesiasqa Belén llaqtapin nacenan karqan manan Nazaret llaqtapichu (Miqueas 5:2). ¿Imaynapin chay hunt’akunman 150 kilómetro karupiraq paykuna tiyashaqtinku?

Romapi kamachikuqmi llapa runakunata kamachirqan nacesqanku llaqtapi censachikunankupaq. Joseq Mariaq familianqa Belenmantan karqanku, chaymi María onqokunanpaq pisillaña kashaqtin iskayninku Belén llaqtata rirqanku (Lucas 2:3). Chaypin Mariaqa Jesusta onqokurqan uywakunaq puñunan kanchapi, uywakuna qaranapitaq puñuchirqanku. Askha angelkunan chay llaqtaq camponpi michiqkunaman rikhurirqanku, willarqankutaq prometesqa Mesiaspa nacesqanta.

Huk runakunapas willanankun karqan Mesiaspa chayamusqanta. Profeta Isaiasmi willasqaña Cristo llank’ananpaq ñanta kichaq runa ñawpamunanta (Isaías 40:3). Chay runaqa Bautizaq Juanmi karqan. Huk kutinmi Jesusta rikuspa nirqan: “Qhawariychis, paymi Diospa Corderon runakunaq huchankunata pampachaq”, nispa. Chaymi kaqrato Juanpa qatikuqninkunamanta askha Jesusta qatikurqanku. Hukninmi nirqan: “Mesiastan tarimuyku”, nispa (Juan 1:29, 36, 41).

Jehová Dios kikinpunin chaytaqa sut’incharqan. Jesusta Juan bautizashaqtinmi Dios santo espiritunwan Mesías kananpaq akllarqan, nirqantaqmi: “Kaymi munakusqay Churiy, paymi anchata kusichiwan”, nispa (Mateo 3:16, 17). Chhaynapin Diospa prometesqan Mesías chayamurqan.

¿Hayk’aqtaq chayri sucederqan? 29 watapi, Danielpa willasqan 483 watakuna pasasqan qhepaman. Askharaqmi kashan Jesuspuni Mesías kasqanta sut’inchaq willakuykuna. Ichaqa, ¿imamantan Jesús kay pachapi kashaspa runakunaman willarqan?

(Mateo 1-3; Marcos 1; Lucas 2; Juan 1.)