Kichay leenaykipaq

Índice nisqaman riy

 25 T’AQA

Iñiypi, allin kawsaypi, munakuypi wiñanapaq yuyaychaykuna

Iñiypi, allin kawsaypi, munakuypi wiñanapaq yuyaychaykuna

Santiago, Pedro, Juan, Judas cristianokunan cartakunata qelqarqanku iñiqmasinkuta kallpachanankupaq

SANTIAGOPAS Judaspas Jesuspa wawqenkunan karqanku, Pedrowan Juanwantaq apostolninkuna karqanku. Tawantinkumantan qanchis cartakunata qelqarqanku sutinkuwan sutichasqata. Chay qelqakunawanmi iñiqmasinkuta yanaparqanku Diosta tukuy sonqowan servishanallankupaq.

Iñiyniyoqmi kana. Iñiyniyoq runaqa ruwayninwanmi rikuchin iñiyniyoq kasqanta. Santiagon nirqan: “Allinkunata mana ruwaqtinchisqa iñiyninchispas wañusqa kashan”, nispa (Santiago 2:26). Ima sasachakuykunatapas iñiywan atipaqqa astawanmi iñiypi wiñan. Mana iskayaspan Diosmantapas mañakun yachayta qonanpaq. Diospaq hunt’aq kaqtinqa paypa allin qhawarisqanmi kanqa (Santiago 1:2-6, 12). Diosqa pay sonqo runakunaq qayllallanpin kashan yanapaykunanpaq. Chaymi Santiago nillantaq: “Diosman asuykuychis, hinan payqa asuykamusunkichis”, nispa (Santiago 4:8).

Cristianokunaqa tentacionkunamanta millay runakunamantawan ayqekunankupaqmi iñiyninkupi qaqata sayananku. Millay kawsaq runakuna ukhupi tiyasqanraykun Judasqa cristianokunata kallpacharqan ‘iñiypi qaqatapuni sayanankupaq’ (Judas 3).

Ch’uyata kawsana. Diosmi munan payta serviqkuna tukuypi ch’uya kanankuta. Apóstol Pedron nirqan: “Qankunapas tukuy kawsayniykichispi ch’uya kaychis. Diosmi nin: ‘Ch’uya kaychis, ñoqa ch’uya kasqayrayku’, nispa”, nispa (1 Pedro 1:15, 16). Ch’uya kanapaqqa Cristoq ‘yupintan qatikunanchis’ (1 Pedro 2:21). Yaqapaschá sasa kanman Diospa kamachikuyninta hunt’ay, ichaqa ‘conciencianchismi allin kanan’, chaymi aswan allinqa (1 Pedro 3:16, 17). Pedron llapa cristianokunata nirqan Diospa hatun p’unchayninta mosoq pachapi ‘chanin’ kawsay chayamunantawan suyaspa, ch’uyata kawsanankupaq Dios sonqo kasqankutapas ruwaywan rikuchinankupaq (2 Pedro 3:11-13).

“Diosman asuykuychis, hinan payqa asuykamusunkichis.” (Santiago 4:8)

Munakuq kana. Apóstol Juanmi nirqan: “Diosqa munakuymi”, nispa. Jehová Diosmi runakunata anchata munakuspa “Churinta kachamurqan wañusqanwan huchanchista pampachananpaq”. ¿Ima ruwaymanmi chay tanqariwanchis? Juanmi qelqarqan: “Munasqay wawqe-panaykuna, chay hinata Dios munakuwaqtinchismi ñoqanchispas hukkuna hukkunawan munanakunanchis”, nispa (1 Juan 4:8-11). Iñiqmasikuna munakusqanchista rikuchinapaqqa sumaqtan chaskiykunanchis (3 Juan 5-8).

¿Imaynatan rikuchisunman Jehová Dios munakusqanchista? Apóstol Juanmi chay tapuyta kutichin: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa (1 Juan 5:3; 2 Juan 6). Diosta kasukuq runaqa yachanmi paypa munakusqanta, ‘wiñay kawsay qonantan suyakunpas’ (Judas 21).

(Santiago; 1 Pedro; 2 Pedro; 1 Juan; 2 Juan; 3 Juan; Judas.)