Kichay leenaykipaq

Índice nisqaman riy

 12 T’AQA

Allinta kawsanapaq yachachikuy

Allinta kawsanapaq yachachikuy

Proverbios librotaqa yaqa llapantan Salomón qelqarqan, chaypin tarikun Diospa sumaq yachachikuyninkuna

¿ALLINNINCHISPAQCHU kanman Diosta kasukuy? Chayta yachanapaqqa imakunatachus Biblia yachachisqantan qhawarinanchis. ¿Yanapawasunmanchu aswan allinta kawsananchispaq? Proverbios libropin rey Salomón allin yachachikuykunata qelqarqan tukuy ima ruwasqanchispi yanapachikunanchispaq. Wakinmanta yachasun.

Dioswan allinpi kanapaq. Dioswan allinpi kanapaqqa paypin confiananchis. Salomonmi nirqan: “Tukuy sonqoykiwan Señor Diosman hap’ipakuy, amataq qan kikiykiq yuyayniykimanqa k’askakuychu. Tukuy ruwasqaykikunapi Señor Diosta yuyariy, paymi cheqan ñanninta pusasunki”, nispa (Proverbios 3:5, 6). ¿Imaynatan rikuchisunman Diospi confiasqanchista? Kamachikuyninkunata kasukuspa. Chhaynapin Jehová Taytanchista kusichisun, rikuchisuntaq Satanás llulla kasqanta (Proverbios 27:11).

Familiapas amigokunapas. Kay tiempokunapin Familiakuna astawan necesitanku Diospa yachachikuyninta. Diosmi qosakunata nin: “Wayna kashaspa casarakusqayki warmillaykiwan kusikuy”, nispa. Chaywanmi yuyarichishan esposanpaq hunt’aq kananta (Proverbios 5:18-20). Proverbios 31 capitulopin esposakunata yanapan qosanwan wawankunawanpas respetachikuspa sumaqta qhawarichikunanpaq. Wawakunatan kamachishan tayta-mamankuta kasukunankupaq (Proverbios 6:20). Chay libroqa willanmi amigokunayoq kay allinpuni kasqanta, hukkunamanta t’aqakuy mana allin kasqantapas (Proverbios 18:1). Ichaqa allin amigokunatan akllananchis, karunchakunanchistaqmi mana allin ñanpi puriq runakunamanta (Proverbios 13:20; 17:17).

Sapankanchispaq. Proverbios libropiqa llapanchispaqmi sumaq yachachikuykuna kashan. Chaykunan yanapawanchis mana allin yuyaykuykunamanta, machaymanta karunchakunanchispaq, allin-kaqta ruwananchispaq, aswan allin llank’aq kananchispaqwan (Proverbios 6:6; 14:30; 20:1). Willanmi Diosta mana kasukuspa runakunaq yuyaykusqanman hina ruwayqa mana allinninchispaq kasqanta (Proverbios 14:12). Niwanchistaqmi sonqonchista allinta cuidanapaq, ¿imarayku? Biblian nin: “Chaymantan imayna kawsaypas paqarimun”, nispa (Proverbios 4:23).

Chay yachachikuykunan askha runakunata yanaparqan allinta kawsanankupaq, paykunaqa yachankuñan Diospa kamachikuyninkunata kasukuy allinpuni kasqanta.

(Proverbios.)