Kichay leenaykipaq

Índice nisqaman riy

 14 T’AQA

Diospa rantinpi willaq profetakuna

Diospa rantinpi willaq profetakuna

Jehová Diosqa profetakunawanmi willachirqan cheqaq yupaychaymanta Mesiasmantawan

PROFETAKUNAQA Israelpi, Judá llaqtapi reykuna kamachikushaqtinkun kawsarqanku. Paykunaqa Diospa rantinpin willananku karqan, chaymi mana manchakuq allin iñiyniyoq kananku karqan. ¿Imakunamantan willarqanku?

1. Jerusalén thunichisqa kananmanta. Jeremías, Isaías profetakunan ñawpaqmantaña willarqanku Jerusalén thunichisqa wikch’usqa kananmanta. Willarqankutaqmi imarayku Jehová Dios chay llaqtapaq phiñakusqanmanta. “Diospa llaqtanmi kayku” nirqankuña chaypas, idolokuna yupaychasqankupi, mana allinkuna ruwasqankupi, sinchi millay kasqankupiwanmi rikuchirqanku Diospa contranpi kasqankuta (2 Reyes 21:10-15; Isaías 3:1-8, 16-26; Jeremías 2:1–3:13).

2. Yapamanta Dios yupaychanankumanta. Babilonia llaqtapi 70 wata preso kasqankumantan Israel runakunaqa llaqtankuman kutipunanku karqan, Jerusalenpi yupaychana wasita wakmanta hatarichispataq Diosta yupaychananku karqan (Jeremías 46:27; Amós 9:13-15). 200 wata ñawpaqtan Isaías profetizarqan Ciro sutiyoq runa Babilonia llaqtata thunichinanmanta imayna atipananmantapas, chhaynapi Diospa llaqtanta horqonanpaq (Isaías 44:24–45:3).

3. Mesiaspa nacesqanmanta kawsasqanmantawan. Mesiasqa Belén llaqtapin nacenan karqan (Miqueas 5:2). Payqa huch’uyyaykukuq runan kanan karqan, huk asnopi sillaykuspataqmi Jerusalenman haykunan karqan (Zacarías 9:9). Munakuywanña runakunata tratanan karqan chaypas, paykunaqa cheqnikunankun karqan (Isaías 42:1-3; 53:1, 3). Hinaspapas ñak’arichispan wañuchinanku karqan. Chhaynaqa, ¿qonqasqachu Mesías kapunman? Manan, aswanmi kawsarimpuspa sacrificionta Diosman haywanan karqan runakunaq huchan pampachasqa kananpaq (Isaías 53:4, 5, 9-12).

4. Mesiaspa gobiernonmanta. Rey Mesiasqa preparasqan kashan kamachinanpaq, runakunan ichaqa mana. Paytaqa Thak-kaypa Qollanan nispan sutichakunan karqan (Isaías 9:6, 7; Jeremías 10:23). Kay pachata kamachikamuqtinqa thak kawsaymi kanqa, salqa animalkunapas manson kapunqaku (Isaías 11:3-7). Manañan pipas onqonqachu (Isaías 33:24). Wañuypas wiñaypaqmi chinkapunqa (Isaías 25:8). Wañupuqkunataq millonninpi kawsarimpunqaku (Daniel 12:13).

(Isaías, Jeremías, Daniel, Amós, Miqueas, Zacarías.)