Kichay leenaykipaq

Índice nisqaman riy

 54 WILLAKUY

Jehová Dios Jonaswan pacienciakun

Jehová Dios Jonaswan pacienciakun

Asiria nacionpin Nínive llaqta tarikuran, chaypi kaq runakunaqa nishu millaymi karanku. Chaymi Diosqa Jonasta niran: “Nínive llaqtata riy, jinaspa runakunata nimunki mana allin ruwasqankuta saqepunankupaq”, nispa. Jonasmi ichaqa mana kasukuranchu, aswanmi barcoman seqaspa Tarsis ladoman ripuran.

Barcopi viajashaqtinmi lamar-qocha sinchita aytiykacharan, jinan barcopi viajaqkunaqa diosninkuta wajakuranku, tapunakurankutaq imarayku chhaynapi tarikusqankuta. Chaymi Jonasqa willakuran: “Jehová Diosta mana kasukusqaymantan kay pasashan, unuman wijch’uykuwaychis”, nispa. Runakunan ichaqa mana munarankuchu. Jonasqa wajmantan niran, jinan unuman wijch’uykuqtinku lamar-qochaqa manaña aytikuranchu.

Jonasqa unu ukhuman chinkaykushaspan Diosmanta mañakuran, chaymi Diosqa mañakusqanta uyarispa jatunkaray challwata kamachiran Jonasta millp’unanpaq. Jonasmi ichaqa challwaq wijsanpi kausashallaran, jinan Diosta niran: “Llapa kamachiwasqaykitan kasukusaqpuni”, nispa. Kinsa p’unchaymantan challwaqa Jonasta ch’aki pampaman aqturpariran.

Jonastaqa Jehová Diosmi salvaran. Ichaqa, ¿manañachu Nínive llaqtata rinan karan? Diosmi wajmanta kamachiran Nínive llaqtata rinanpaq. Chaymi Jonasqa rispa, niran: “40 p’unchaymantan Diosqa  kay llaqtata thuninqa”, nispa. Chayta uyarispan runakunaqa vidankuta cambiaranku. Nínive llaqtamanta reymi runakunata niran: “Juchaykichismanta pesapakuspa Diosmanta perdonta mañakuychis”, nispa. Diosqa rikuranmi pesapakusqankuta, chaymi mana castigaranchu.

Jonasqa sinchitan phiñakuran Jehová Dios Nínive runakunata mana wañuchisqanmanta. Diosqa khuyapayaranmi Jonasta, Jonasmi ichaqa Nínive runakunata mana khuyapayaranchu. Jinan llaqtamanta lloqsispa calabazaq llanthusqan phiña uyantin tiyaran. Ichaqa calabazan ch’akipuran, jinan Jonasqa astawanraq phiñakuran. Chaymi Diosqa niran: “Qanqa chay plantaq wañupusqanmanta llakikunki. ¿Manachu noqari Nínive runakunaq wañunanmanta llakikunay?”, nispa. Chaywanmi Diosqa Jonasta yachachisharan runakunaqa plantakunamantapas aswan valorniyoq kasqanchista.

‘Diosmi qankunawan pacienciakushan; [...] payqa manan munanchu pipas wañunanta, aswanmi munan lliupas juchankumanta pesapakunanta’ (2 Pedro 3:9)