Kichay leenaykipaq

Índice nisqaman riy

 45 WILLAKUY

Israel llaqtan iskayman t’aqakun

Israel llaqtan iskayman t’aqakun

Salomón Diosta adorasqan tiempopiqa runakunaqa thajpin kausaranku. Salomonmi ichaqa waj nacionmanta askha warmikunawan casarakuran, chay warmikunaqa idolokunatan adoraranku. Jinan Salomonqa idolokunata adoraran. Jehová Diosqa phiñakuranmi, jinan payta niran: “Israel llaqtatan iskayman t’aqasaq, mirayniykimanmi juch’uy partellata qosaq, jatun partetataq jujnin kamachiykiman qosaq”, nispa.

Salomonpa jujnin kamachinpa sutinmi karan Jeroboán, pay viajashaqtinmi profeta Ahiyawan tuparan. Chay profetan capanta 12 pedazokunaman llik’iran. Jinaspa niran: “Jehová Diosmi Israel llaqtata iskayman t’aqanqa. Chunka pedazota ajllakuy, qanmi chunka aylluta kamachinki”, nispa. Chayta yacharuspan Salomonqa Jeroboanta wañuchiyta munaran. Jinan Jeroboanqa Egiptoman ayqekuran. Tiempowanmi Salomonqa wañupuran, wawan Rehoboamtaq (Roboam) kamachikuyta qallariran. Chaymi Jeroboanqa Israel llaqtaman kutimuran.

Israelpi umallikunan Rehoboamta niranku: “Sichus llaqtata  allinta tratanki chayqa, servisunkikun”, nispa. Wayna amigonkunataq niranku: “Ama khuyapayaspa llaqtata kamachiy”, nispa. Rehoboamqa chay waynakunata kasuspan runakunata millayta trataran. Jinan llaqtaqa pay contra jatarispa Jeroboanta churaranku chunka ayllukunata kamachinanpaq. Chay chunka ayllukunatan suticharanku “Israel nación” nispa, iskay ayllukunatataq “Judá nación” nispa. Jinan Rehoboamqa chay iskay ayllukunata kamachiran. Chhaynapin Israelpi 12 ayllukunaqa iskayman t’aqasqa karan.

Jerusalén llaqtaqa Judá nacionpin tarikuran. Jeroboanqa manan munaranchu runakuna Diosta adoraq Jerusalenman rinankuta. Payqa niranmi: “Rehoboamtan kasukapunqaku”, nispa. Jinan iskay qori torillokunata ruwachispa niran: “Jerusalenman riyqa sasan. Aswanpas kaypi qhepakuychis iskay qori torillokunata adoraspa”, nispa. Chaymi runakunaqa Jehová Dios serviyta qonqapuranku.

‘Amapuni mana iñiqkunawanqa jujllachakuychischu. ¿Tupanmanchu allin kaq mana allin kaqwan? ¿Imapitaq igual kankuman iñiq runa mana iñiq runawan?’ (2 Corintios 6:14, 15)