Kichay leenaykipaq

Índice nisqaman riy

 35 WILLAKUY

Diosmanta juj wawata mañakun

Diosmanta juj wawata mañakun

Israelmanta Elcaná sutiyoq runan iskay warmiyoq karan, sutinkun karan: Ana, Peniná. Ichaqa Anatan masta munakuq. Peninaqa askha wawakunayoqmi karan, Anan ichaqa mana wawayoq karan. Chaymi Peninaqa Anamanta burlakuq. Sapa watanmi Elcanaqa familianwan Siló llaqtata riq Jehová Diosta adoranankupaq. Juj kutinmi chaypi kashaqtinku Elcanaqa reparan Ana sinchi llakisqa kasqanta. Jinan Anata niran: “Ana ama waqaychu. Noqaqa anchatan munakuyki”, nispa.

Chay p’unchaypin Anaqa sapallan riran mañakuq. Waqaykuspan Jehová Diosta mañakuran yanapananpaq. Diosmanmi prometeran: “Diosníy, juj qhari wawata qowanki chayqa, qanmanmi qopusayki wañupunankama servinasuykipaq”, nispa.

Uma sacerdote Elí rikuran Anaq waqasqanta, siminpas kuyushasqanta jinan machasqa kananpaq piensaran. Anataq niran: “Manan machasqachu kashani. Jatun llakin ñit’iwan chaytan Diosman willakushani”, nispa. Eliqa reparakuranmi pantasqanta, jinan Anata niran: “Jehová Dios mañakusqaykiman kutichimuchun”, nispa. Anaqa kusisqa kutipuran. Jinan manaraq watapi juj qhari wawata onqokuran, sutinmi karan Samuel. Ancha kusisqachá Anaqa sientekuran ¿riki?

 Anaqa manan qonqaranchu Diosman prometesqanta. Samuel manaña ñuñuqtinmi Anaqa adorana karpaman apapuran Diosta servinanpaq. Elitan niran: “Jehová Diosmantan kay qhari wawata mañakurani, chaymi Diosman qopushani wañunankama servinanpaq”, nispa. Elcanawan Anawanqa sapa watanmi Samuelta visitaqku mana mangayoq p’achata apaspa. Tiempowanmi Anaqa kinsa qhari iskay warmi wawakunatawan onqokuran.

“Diosmanta mañakushallaychis, chaskinkichismi; maskhashallaychis, tarinkichismi” (Mateo 7:7)