Kichay leenaykipaq

Índice nisqaman riy

31 WILLAKUY

Josuewan Gabaón runakunawan

Josuewan Gabaón runakunawan

Canaán llaqtakunapi runakunan Jericó llaqtawan imachus pasasqanta yacharusqaku. Jinan chay llaqtakunamanta reykunaqa juñunakuranku Israel contra maqanakunankupaq. Gabaón runakunan ichaqa mana chaytachu ruwaranku. Aswanmi paykunaqa thanta p’achawan churakuspanku Josueman rispa niranku: “Karu llaqtamantan jamushayku. Uyariykun Jehová Dios qankunarayku Egiptota Moabtapas ruwasqanta. Sichus prometewankiku mana wañuchiwanaykikupaq chayqa, qankunatan servisaykiku”, nispa.

Josueqa paykunata creespan prometeran mana wañuchinankupaq. Kinsa p’unchay qhepamanmi ichaqa Josueqa yacharan Gabaón runakuna mana karu llaqtamantachu kasqankuta. Chaymi Josueqa paykunata tapuran: “¿Imaraykun llullakuwarankiku?”, nispa. Paykunataq niranku: “Manchakuraykun, yachaykun qankunarayku Jehová Dios maqanakusqanta, ama wañuchiwaykuchu”, nispa. Jinan Josueqa mana imanaranpaschu.

Chay qhepallamanmi Canaanmanta pisqa reykuna juñukuspanku Gabaonwan maqanakuq riranku. Jinan Josueqa soldadonkunawan tutantin puriranku Gabaón runakunata salvanankupaq. Tutamantanmi maqanakuyta qallariranku. Jinan Canaán runakunaqa ayqekuranku, Jehová Diosmi ichaqa jatunkaray chijchikunata paykuna pataman kachaymuran. Josuetaq Diosta valekuran intita sayachinanpaq. Jinan intiqa mana kuyuriranchu. Manan jayk’aqpas chay milagrotaqa rikukuranchu, ichaqa tukuy sonqonwan Diospi confiasqanraykun Josueqa chayta mañakuran. Chay p’unchayqa manan tutayaranchu Israel runakuna enemigonkuta atipanankukama.

“Aswanpas ‘arí’ nisqaykichisqa ‘arí’ nisqallapuni kachun, ‘manan’ nisqaykichistaq ‘manan’ nisqallapuni kachun; chayman yapaykusqaqa Satanasmantan jamun” (Mateo 5:37)