Kichay leenaykipaq

Índice nisqaman riy

 34 WILLAKUY

Gedeón Madián llaqtata atipan

Gedeón Madián llaqtata atipan

Tiempowanmi Israel runakunaqa wajmanta Jehová Dios serviyta saqepuspa pantasqa dioskunata adoraranku. Chaymi qanchis wata Madián runakunaqa animalninkuta suwaranku chajrankutapas q’araranku. Jinan Israel runakunaqa orqo t’oqokunapi pakakuqku. Chaymi Israel llaqtaqa Jehová Diosta valekuranku salvananpaq. Jinan Jehová Diosqa juj angelta Gedeonman kacharan “Jehová Diosmi qanta ajllasunki” nispa nimunanpaq. Gedeontaq niran: “Noqaqa manan allin reqsisqa runachu kani, ¿imaynatan Israel llaqtata salvayman?”, nispa.

Gedeonqa asegurakuytan munaran Jehová Diospa yanapasqanta. ¿Imatan chaypaq ruwaran? Millmatan jawa pampapi saqespa Diosta niran: “Sichus paqarin tutamantanta pacha sulla kay millmata ch’aranchanqa pampataq ch’aki kashanqa chayqa, chaypin yachasaq ajllawasqaykita”, nispa. Paqaristintaq millmaqa ch’aran kasharan pampataq ch’aki. Jinan Gedeonqa Jehová Diosta nillarantaq: “Paqarinqa millmañataq ch’aki kashachun, pampataq ch’aran kachun”, nispa. Gedeonpa mañakusqanman jinataq pasaran. Chaywanmi Gedeonqa yacharan Diospa ajllasqan kasqanta. Jinan soldadonkunata juñuspa Madián llaqtawan maqanakuq riran.

 Jehová Diosmi Gedeonta niran: “Israel llaqtatan yanapasaq maqanakuypi atipananpaq. Ichaqa askhan soldadoykikuna kashan ‘noqallaykun atiparayku’ nispapaschá ninkuman. Kamachiy manchalikunata wasinkuman kutipunankupaq”, nispa. Jinan 22.000 runakuna ripuranku. 10.000 runakunallañan qhepakuranku. Jinan Diosqa niran: “Askharaqmi kashanku. Mayuman apay unuta ujanankupaq, jinaspa qhepachinki pikunachus qhawan-qhawan unuta ujashanku chaykunallata”, nispa. 300 runakunallan chayta ruwaranku. Diosmi niran: “Chay runakunallawanmi 135.000 soldadokunata atipankichis”, nispa.

Chay tutan Diosqa Gedeonta niran: “Kunanmi Madián runakunawan maqanakuq rinayki”, nispa. Gedeonmi soldadonkunaman qoran putututa, ch’usaq p’uyñu ukhupi raurashaq antorchatawan, nirantaq: “Noqaq ruwasqayta jina ruwankichis”, nispa. Gedeonmi putututa tocaspa p’uyñuta chhalluran, antorchata maymispataq qapariran: “¡Jehová Diospa espadan Gedeonpa espadanpiwan!”, nispa. 300 runakunapas kaqtan ruwaranku. Jinan Madián runakunaqa mancharikuspanku tukuy ladoman loco jina phawariranku. Jinaspa paykunapura wañuchinakuranku. Wajmantan Diosqa llaqtanta salvaran.

“Chay atiyqa manan noqaykumantachu jamun, aswanpas Diosmantan jamun” (2 Corintios 4:7)