Kichay leenaykipaq

Índice nisqaman riy

 13 WILLAKUY

Jacobwan Esauwan allipunanku

Jacobwan Esauwan allipunanku

Jehová Diosmi Jacobta prometeran cuidananpaq, imaynan Abrahantapas Isaactapas cuidaran jinata. Jacobqa Harán llaqtapin tiyapuran, chaypin casarakuran, wawakunayoq karan, qhapaq runamanpas tukupuran.

Tiempowanmi Jehová Diosqa Jacobta niran: “Papaykiq wasinman kutipuy”, nispa. Jinan Jacobqa familianwan viajayta qallariranku. Chay qhepamanmi ñanta rishaqtinku serviqnin runakuna Jacobman kutimuspa willaranku: “Hermanoyki Esaumi 400 runakunantin jamushanku”, nispa. Jacobqa manchasqan kasharan hermanon Esaú paytapas familiantapas wañuchinanmanta. Chaymi Jehová Diosta valekuran: “Ama jinachu kay hermanoymanta libraway”, nispa. Paqaristin p’unchaytaq Jacobqa Esauman regalota apachiran: askha ovejata, cabrata, wakata, camellota, asnotapas.

Chay tutan Jacobqa sapallan kashaspa juj angelta rikuran. Jinan angelwan jap’inakuyta qallariran. Paqarimunankaman Jacobqa k’irisqaña kashaspapas mana angelta kachariranchu. Jinan angelqa niran: “Kachariway”, nispa. Jacobtaq niran: “Manan kacharisaykichu bendeciwanaykikama”, nispa.

Chaymi angelqa Jacobta bendeciran. Chaywanmi Jacobqa yacharan hermanon Esaumanta Jehová Dios jark’aykunanta.

Chay p’unchaymi Jacobqa hermanon Esauta 400 runankunatawan karumanta rikuran. Jinan Jacobqa ñaupariran Esauwan  tupananpaq, paypa qayllanman chayaspataq qanchis kutita pampaman k’umuykuran. Jinan Esauqa payman phawaykuspa abrazaykuran. Iskayninkun waqaykuspanku allipunapuranku. ¿Kusikuranchu Jehová Dios Jacobpa ruwasqanwan?

Chay qhepamanmi Esauqa wasinman kutipuran, Jacobtaq viajashallaran. Jacobqa 12 qhari wawakunayoqmi karan. Sutinkun karan: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín ima. Unay watakuna qhepamanmi Jehová Diosqa llaqtanta salvaran Jacobpa wawan Josewan. ¿Imaynatan salvaran? ¿Yachayta munawaqchu? Qatimuqpin chaymanta yachasun.

“Munakushallaychis enemigoykichiskunataqa, qatikachaqniykichiskunapaqpas mañapushallaychis, chhaynapin janaq pachapi kaq Yayaykichispa wawankuna kankichis” (Mateo 5:44, 45)