Kichay leenaykipaq

Índice nisqaman riy

 10 WILLAKUY

Ama qonqaychu Lotpa esposanwan pasasqanta

Ama qonqaychu Lotpa esposanwan pasasqanta

Lotqa tion Abrahanwanmi Canaán llaqtapi tiyaran. Iskayninkupas askha uywakunayoqmi kapuranku, chaymi campo mana ayparanchu. Jinan Abrahanqa Lot-ta niran: “Manañan iskayninchispaq campo aypanñachu. Ajllakuy maymanchus rinaykita, jinan noqaqa juj kaq ladoman risaq”, nispa. Abrahanqa sumaq runan karan chayta ruwaspaqa ¿riki?

Lotpa qhawarisqan allpaqa munaymi karan, askha unuyoq q’omer pampa. Chayqa Sodoma llaqtaq qayllanpi karan, jinan chayman familianwan ripuran. Chay qhepamantaq Sodoma llaqtapi tiyapuran.

Sodoma llaqtawan Gomorra llaqtawanqa chimpallantinmi karanku, chaypi tiyaq runakunaqa sinchi millaykunatan ruwaranku. Chaymi Diosqa chay llaqtakunata thunipunanpaq decidikuran. Ichaqa salvayta munaran Lot-tapas familiantapas, jinan iskay angelkunata kachamuran paykunata kayta ninanpaq: “¡Usqhayta kay llaqtamanta lloqsiychis! ¡Jehová Diosmi thuninqa!”, nispa.

Lotqa manan usqhaychu lloqsiran. Chaymi angelkunaqa Lot-tapas esposantapas iskaynin ususinkunatapas makinkumanta aysarikuspa phawaylla llaqtamanta orqoranku. Nirankutaq: “¡Ayqekuychis mana wañunaykichispaq, aman qhepaykichistaqa qhawarikamunkichischu, mana chayqa wañunkichismi!”, nispa.

 Zóar llaqtaman chayaqtinkun Jehová Diosqa azufreyoq ninata Sodoma, Gomorra llaqtakunaman parachimuran. Lotpa esposanmi ichaqa Jehová Diosta mana kasukuspa qhepa ladota qhawariran, jinan kachi qaqaman tukurapuran. Ichaqa Lotpas ususinkunapas kasukurankun, chaymi salvakuranku. Lotpa esposan mana kasukusqanmantaqa llakikurankuchá. Chaywanmi allinta yachanchis Diosta kasukuyqa ancha importante kasqanta.

“Lotpa esposanta imachus pasasqanta yuyariychis” (Lucas 17:32)