Kichay leenaykipaq

Índice nisqaman riy

 5 WILLAKUY

Noé arcata ruwan

Noé arcata ruwan

Tiempowanmi askha runakuna allpapi tiyaranku. Yaqa llapankun millayman tukupuranku. Wakin angelkunapas millaymanmi tukupuranku. Janaq pachapi tiyanankuta saqespan kay pachaman jamuranku. ¿Imapaqtaq jamurankuri? Runakuna jina aycha cuerpoyoq kanankupaq, jinaspa warmikunawan casarakunankupaq.

Chay angelkunan warmikunawan casarakuspa wawakunayoq karanku, wawankutaq wiñaspa jatun runakuna kapuranku, sinchitan runakunatapas maqaqku. Jehová Diosqa manan jinallatachu qhawaran chaykunata. Chaymi sinchita parachimuspa llapa millay runakunata wañuchipuran.

Noé ichaqa mana chhaynachu karan. Payqa Jehová Diostan munakuran. Noeqa esposayoq kinsa qhari wawakunayoqmi karan, sutinkun karan: Sem, Cam, Jafet. Paykunapas esposayoqmi karanku. Jehová Diosmi Noeta niran arcata ruwananpaq, chaypi Noepas familianpas salvakunankupaq. Chay arcan karan maderamanta ruwasqa jatunkaray caja jina. Jinaspapas Jehová Diosmi kamachiran askha animalkunata arcaman apaykunanpaq, chhaynapi chay animalkunapas salvakunankupaq.

Noeqa kaqpachan arca ruwayta qallariran. Familianwanmi 50 watapi jina arca ruwayta tukuranku. Diospa nisqanman jinapunin ruwaranku. Chay watakunapin Noeqa runakunaman willaran jatun para chayamunanmanta, ichaqa manan pipas kasukuranchu.

Jinan arcaman jaykunankupaq hora chayamuran. ¿Iman chay qhepaman pasaran? ¿Yachayta munawaqchu?

“Imaynan Noepa p’unchayninkunapi karan chhaynallataqmi runaq Churinpa chayamusqan tiempopipas kanqa” (Mateo 24:37)