Kichay leenaykipaq

Índice nisqaman riy

 96 WILLAKUY

Jesús Saulota ajllan

Jesús Saulota ajllan

Sauloqa Roma nacionmantan karan. Payqa fariseon karan, allintan yacharan judiokunaq leyninmanta, cheqnikurantaqmi cristianokunata. Chaymi warmitapas qharitapas carcelpi wisq’achiran. Rikuranmi millay runakuna rumiwan ch’aqespa Estebanta wañuchisqankutapas.

Sauloqa waj llaqtamanta cristianokunatapas wisq’achiytan munaran. Chaymi uma sacerdotemanta permisota mañakuran Damasco llaqtapi kaq cristianokunatapas qatikachananpaq. Llaqtaman chayashaqtinmi qonqaylla juj k’anchayta rikuran, jinaspa pampaman wijch’ukuran. Juj kunkataq niran: “Saulo, ¿imaraykun qatikachawanki?”, nispa. Saulotaq niran: “¿Pin kanki Señor?”, nispa. Paytaq niran: “Jesusmi kani. Damascota riy, chaypin imachus ruwanaykita willasunkiku”, nispa. Chay ratopin Sauloqa ñausayapuran, jinan makinmanta llaqtaman pusaranku.

Damasco llaqtapin tiyaran Ananías allin iñiyniyoq cristiano. Jesusmi rijuriypi payta niran: “Judaspa wasinman riy, recta nisqa calleman, maskhamuytaq Saulota”, nispa. Ananiastaq niran: “Señor, payqa discipuloykikunatan carcelman wisq’achimushan”, nispa. Jesustaq niran: “Rillay, paytan ajllani waj nacionkunapi predicananpaq”, nispa.

Chaymi Ananiasqa Sauloq kasqanman rispa niran: “Hermano Saulo, Jesusmi kachamuwan wajmanta qhawarinaykipaq”, nispa. Jinan kaqpacha qhawaripuran. Chaymi Jesusmanta yachaspa bautizakapuran. Jinaspa sinagogakunapi cristianokunawan kuska predicayta qallariran. Judiokunaqa anchatachá admirakuranku Jesusmanta predicasqanta rikuspankuqa. Paykunan tapukuranku: “¿Manachu kay runaqa Jesuspa discipulonkunata qatikachasharan?”, nispa.

 Sauloqa kinsa watan Damasco llaqtapi predicaran. Judiokunaqa sinchitan cheqnikuranku, chaymi wañuchinankupaq rimaranku. Ichaqa cristianokunan chayta yacharuspa Saulota yanaparanku ayqekunanpaq. Chaypaqmi llaqtaq perqa t’oqonta canastapi uraykachiranku.

Jerusalenman chayaqtintaq Sauloqa hermanokunawan juñukuyta munaran, paykunan ichaqa Saulota manchakuranku. Chaymi Bernabé sutiyoq sumaq sonqo hermano Saulota pusaran apostolkunaman, jinaspa convenceran cristianoman tukupusqanta. Chaymi Sauloqa paykunawan kuska tukuy sonqo Diosmanta predicaran. Qhepamanmi Pablo sutiwan reqsiranku.

“Cristo Jesusqa juchasapakunata salvaqmi kay pachaman jamuran [...]. Noqataqmi chay juchasapakunamanta aswan juchasapaqa kanipas” (1 Timoteo 1:15)