Kichay leenaykipaq

Índice nisqaman riy

 103 WILLAKUY

“Gobiernoyki jamuchun”

“Gobiernoyki jamuchun”

Jehová Diosmi prometeran: “Manan waqaypas, nanaypas, onqoykunapas, wañuypas kanqañachu. Runakunaq weqentan pichasaq. Ñaupaqpi pasasqantapas manan yuyarinqakuchu”, nispa.

Diosqa Edén huertapin Adantapas Evatapas churaran kusisqa kausanankupaq. Diosllatan adorananku karan, kay pachaman junt’anankupaqtaq wawayoq kananku karan. Mana kasukuqña karanku chaypas, Diosqa manan munasqantaqa cambiaranchu. Diosqa junt’anmi promesankunata, chayta kay libropi yacharanchis. Gobiernonmi kay pachaman sumaq kausayta apamunqa, chhaynapitaq Abrahanman prometesqanta junt’anqa.

Pisi tiempomantan Satanaspas supayninkunapas, millay runakunapas chinkapunqaku. Llapallanchismi Diosta adorasunchis, manañan onqosunchu nitaq wañusunpaschu, aswanmi sapa tutamanta kallpayoq jatarisunchis. Allpantinmi paraisoman  tukupunqa, sumaq mijunakunan kanqa, allin wasikunapitaq tiyasunpas. Llapa runakunan sumaq sonqo kapunqaku. Animalkunapas manan manchakuwasunchu, nitaq noqanchispas manchakusunchu.

Anchatachá kusikusun Jehová Dios wañupuqkunata kausarichiqtinqa. Sumaqtachá chaskisun ñaupa tiempopi Diosta serviq runakunatapas, wakinmi kanku Abel, Noé, Abrahán, Sara, Moisés, Rut, Ester, David ima. Paykunan yanapawasunchis allpanchista paraisoman tukuchinapaq. Imaymanatan ruwasunchis.

Jehová Diosqa munanmi qanpas paraisopi tiyanaykita. Chaypin aswantaraq Jehová Diosmanta yachasunchis. Chhaynaqa, ¡sapa p’unchay Jehová Diosta reqsishallasun!

“Qanqa, Jehová Diosniyku, alabaytapas, jatunchaytapas, atiytapas chaskinaykipaq jinapunin kanki, tukuy imatapas qan kamasqaykirayku” (Apocalipsis 4:11)