Kichay leenaykipaq

Índice nisqaman riy

 98 WILLAKUY

Cristianokuna askha nacionkunapi predicanku

Cristianokuna askha nacionkunapi predicanku

Apostolkunaqa Jesuspa kamachisqanman jinan tukuy llaqtakunapi predicaranku. 47 watapin Antioquía llaqtamanta cristianokuna, Pablota Bernabetawan kacharanku waj nacionkunapi predicamunankupaq. Iskayninkun tukuy sonqowan predicaranku Asia Menor ladopi kaq llaqtakunapi.

Pablowan Bernabewanqa llapa runamanmi predicaranku: wajchakunaman, qhapaqkunaman, waynakunaman, kuraqkunamanpas. Askhan Jesuspi iñipuranku. Chaymantapas predicarankun Chipre llaqtamanta kamachikuq Sergio Pauloman. Ichaqa juj layqa runan jark’akuyta munaran. Chaymi Pabloqa niran: “Jehová Diosmi castigasunki”, nispa. Chay ratopitaq layqaqa ñausayapuran. Chayta rikuspan Sergio Pauloqa Jesuspi iñipuran.

Pablowan Bernabewanqa wasin-wasinta, mercadokunapi, ñankunapi, sinagogakunapi ima predicaranku. Juj kutinmi Listra llaqtapi such’u runata Pablo qhaliyachiran, jinan runakunaqa paykunata adorayta qallariranku. Paykunan ichaqa niranku: “¡Diosllatan adorananchis! Noqaykuqa runakunallan kayku”, nispa. Wakin judiokunataq jamuspanku runakunata tanqaranku Pabloq contranpi kanankupaq. Chaymi rumiwan ch’aqespa llaqta jawaman aysaranku wañusqa kananpaq piensaspa. Pablon ichaqa mana wañuranchu, hermanokunataq llaqtaman aparanku. Chaymantan Pabloqa Antioquía llaqtaman kutiran.

Pabloqa 49 watapin jujmanta Asia Menor ladopi hermanokunata visitaran, jinaspa Europa ladopi kaq Atenas, Éfeso, Filipos, Tesalónica,  juj llaqtakunamanwan viajaran. Rillarankutaqmi Silas, Lucas, Timoteopas. Kuskataq llank’aranku iñiq t’aqakunata jatarichispa, hermanokunata yanapaspa ima. Pabloqa Corinto llaqtapin wata kuskanta qhepakuran hermanokunata iñiyninkupi yanapaspa. Chaypin predicaran, yachachiran, cartakunatapas askha iñiq t’aqakunapaq qelqaran, karpakunata ruwaspataq llank’aran. Tiempowantaq Antioquía llaqtaman kutiran.

52 watapitaq wajmanta Asia Menor ladomanta viajayta qallariran wichay ladoman Filipos llaqtakama, chaymantataq Corinto llaqtakama urayamuran. Askha watakunataq Éfeso llaqtapi tiyaran yachachispa, jujkunata qhaliyachispa, iñiq t’aqatapas yanapaspa. Sapa p’unchaymi discursokunata qoq yachachina wasipi. Jinan askha runakuna kasukuspa vidankuta cambiaranku. Pabloqa askha llaqtakunapin predicaran, qhepamantaq Jerusalenman viajaran.

“Llapa nacionmanta runakunaman riychis, jinaspa yachachimuychis discipuloykuna kanankupaq” (Mateo 28:19)