Kichay leenaykipaq

Índice nisqaman riy

 99 WILLAKUY

Carcelero Jesuspi iñipun

Carcelero Jesuspi iñipun

Filipos llaqtapin juj sipasman juj supay jaykuran. Chaywanmi suerteta qhawaspa patroninkunaman askha qolqeta ganachiq. Pablowan Silaswan Filipos llaqtaman chayaqtinkun, chay sipasqa supaypa kamachisqan qhepankuta qaparispa puriq: “¡Kay runakunaqa jatun Diospa kamachinmi kanku!”, nispa. Chaymi Pabloqa supayta niran: “¡Jesuspa sutinpin kamachiyki, lloqsiy paymanta!”, nispa. Jinan sipasmanta lloqsipuran.

Sipaspa patronninkunaqa repararankun manaña paywan qolqeta gananankuta. Jinan sinchita phiñakuspanku Pablota Silastawan jap’iranku, jinaspa kamachiqkunaman juezkunamanwan aysaranku, nirankutaq: “¡Kay runakunaqa manan leyninchista kasukunkuchu, llaqtatataq ch’aqwachishanku!”, nispa. Jinan juezkunaqa kamachiranku Pablotapas Silastapas k’aspiwan maqaspa carcelman wisq’amunankupaq. Carcelerotaq tutayaq ukhu cuartoman wisq’amuran chakinkutapas tablakunawanmi jap’ichiran.

Pablowan Silaswanqa Jehová Diosta jatunchanankupaqmi alto kunkawan takiranku, juj presokunapas uyarisharankun chaytaqa. Chayllamanmi kuska tutata jina jatun terremoto pasaran. Jinan punkukunapas kichakuran cadenakunapas paskakuran, chakinkuta jap’iq tablakunapas p’akikuran. Carceleroqa ukhu cuartoman jaykuspan rikuran punkukuna kicharayashaqta. Jinaspa presokunaq ayqekusqankuta piensaspa espadanwan wañuchikuyta munaran.

Chay ratopin Pabloqa fuerteta nimuran: “¡Ama wañuchikuychu! ¡Llapallaykun kaypi kashayku!”, nispa. Jinan carceleroqa ñaupankupi qonqorikuspa niran: “¿Imatan ruwanay salvakunaypaq?”, nispa. Paykunataq niranku: “Qanpas familiaykipas Jesuspin iñinaykichis”, nispa. Jinan Diospa siminta carceleromanpas familianmanpas yachachiranku, llapallankutaq bautizakuranku.

‘Qankunatan qatikachasunkichis, carcelkunaman ima apasunkichis. Chaymantapas sutiyraykun reykunaman kamachikuqkunaman ima apasqa kankichis, chhaynapi paykunaman predicanaykichispaq’ (Lucas 21:12, 13)