Kichay leenaykipaq

Índice nisqaman riy

 91 WILLAKUY

Jesuspa kausarimpusqan

Jesuspa kausarimpusqan

José sutiyoq qhapaq runan Jesuspa cuerponta k’aspimanta urayachinanpaq Pilatomanta permisota mañakamuran. Jinan Jesuspa cuerponta sumaq q’apaq aceitekunawan jawiran, lino telawan k’uyuspataq chayllaraq ruwasqa sepulturaman churachimuran, jatun rumiwantaq wisq’achimuran. Sacerdotekunan Pilatota niranku: “Discipulonkunan Jesuspa cuerponta suwaruspa ninkuman: ‘Jesusqa kausaripunmi’”, nispa. Chaymi Pilatoqa niran: “Allinta sepulturaq punkunta sellamuspa guardiakunata churamuychis”, nispa.

Kinsa p’unchaymantan warmikuna tutamantanta sepulturaman riranku, jinan sepulturaq punkunta kichasqata tariranku. Jinaspa ukhuman jaykuqtinku juj ángel paykunata niran: “Ama manchakuychischu Jesusqa kausarimpunmi, discipulonkunaman willamuychis Galileata rinankupaq chaypi paywan tupamunankupaq”, nispa.

María Magdalenaqa Pedrota Juantawan tarispa niran: “Jesuspa cuerpontan aparapusqaku”, nispa. Jinan paykunapas sepulturata qhawaq riranku. Ch’usaq kasqanta rikuspataq wasinkuman kutipuranku.

Mariapas sepulturamanmi kutiran. Chaypin rikuran iskay angelkunata jinan tapuran: “Maymanchá Señorniyta aparunkupas”, nispa. Jinan rikuran juj runata, jardinero kananpaq piensaspataq niran: “Señor, willaway mayman apasqankuta”, nispa. Paytaq niran: “María”, nispa. Jesús kasqanta reparaspataq “¡Yachachikuq!” nispa niran, jinaspa abrazaykuran. Jesustaq niran: “Hermanoykunaman willamuy rikuwasqaykita”, nispa. Jinan Mariaqa discipulokunaman willamuran Jesusta rikumusqanta.

Chay p’unchaypin iskay discipulokuna Jerusalenmanta Emaús llaqtaman risharanku. Jinan ñanpi juj runa puriysikuspa tapuran imamantachus rimasqankuta. Paykunataq niranku: “¿Manachu yachanki? Kinsa p’unchayña karun Jesusta wañuchisqankumanta. Kunantaq wakin warmikuna nishanku: ‘Jesusqa kausarimpunmi’”, nispa. Chay runataq niran: “¿Manachu profetakunaq nisqanta  creenkichis? Paykunaqa willarankuñan Cristoq wañunanmanta kausarinanmantapas”, nispa. Astawantaq yachachiran. Emausman chayaqtinkun discipulokunaqa niranku paykunawan qhepakunanpaq. Ichaqa cenanankupaq mañakusqanta uyarispan repararanku Jesús kasqanta, jinan payqa chinkaripuran.

Chay discipulokunaqa usqhayllan Jerusalenman kutiranku apostolkunaq juñukusqanku wasiman, jinaspa willaranku imachus pasasqanta. Chay ukhupi wisq’asqa kashaqtinkun Jesusqa ñaupankupi rijuriran. Qallariypiqa manan creerankuchu Jesús kasqanta. Chaymi Jesús niran: “Makiykunata qhawariychis, llamiwaychis. Qelqasqan kasharan Cristoq kausarimpunanqa”, nispa.

“Noqan kani ñanpas, cheqaq kaqpas, kausaypas. Noqallantapunin pipas Yayamanqa chayanqa” (Juan 14:6)