Kichay leenaykipaq

Índice nisqaman riy

90 WILLAKUY

Jesús calavera patapi wañupun

Jesús calavera patapi wañupun

Uma sacerdotekunan Jesusta Pilatoman aparanku, jinan Pilatoqa tapuran: “¿Imamantan kay runata juchachashankichis?”, nispa. Paykunataq niranku: “Noqaqa reymi kani nisqanmantan”, nispa. Pilatotaq Jesusta tapuran: “¿Judiokunaq reyninchu kanki?”, nispa. Jesustaq niran: “Gobiernoyqa manan kay pachamantachu”, nispa.

Chaymantaqa Galilea llaqtapi rey Herodesmanmi Pilatoqa Jesusta apachiran juzgananpaq. Paypas manan imamantapas juchachayta atiranchu, chaymi jujmanta Pilatoman kutichimpuran. Chay qhepamanmi Pilatoqa runakunata niran: “Noqapas Herodespas manan imatapas kay runapiqa tariykuchu, chaymi kacharipusaq”, nispa. Runakunan ichaqa qapariranku: “¡Wañuchiy! ¡Wañuchiy!”, nispa. Soldadokunataq soq’aykuranku, thoqaykuranku, saqmaranku, kiskakunayoq coronawan churaruspataq burlakuranku: “¡Buenos días, judiokunaq reynin!”, nispa. Pilatoqa jujmantan niran: “Noqaqa manan kay runapiqa ima mana allintapas tarinichu”, nispa. Runakunataq qapariranku: “¡K’aspipi warkuy!”, nispa. Jinan Pilatoqa Jesusta entregaran wañuchinankupaq.

Chaymantataq Jesusta calavera pataman aparanku, chaypin k’aspipi warkuranku. Jinan Jesusqa papanmanta mañakuran: “Papay, kay runakunata perdonaykuy, manan yachankuchu imachus ruwasqankuta”, nispa. Runakunan ichaqa burlakuranku: “Diospa Churin kanki chayqa k’aspimanta uraykamuy”, nispa.

Jesuswan warkusqa suwa runan Jesusta niran: “Gobiernoykipi noqamanta yuyarikamuwanki”, nispa. Jesustaq niran: “Noqawan kuskan paraisopi kanki”, nispa. Chay tardentan kinsa hora tutayaran. Chaypin wakin discipulonkunapas kasharanku maman Mariapas chaypin kasharan. Jesustaq Juanta niran maman Mariata cuidananpaq.

Chay qhepamanmi Jesusqa niran: “¡Llapanpas junt’akunñan!”, nispa. K’umurispataq wañupuran. Chayllamanmi pampaqa sinchita chhafchikuyta qallariran. Templopi cortinataq iskayman llik’ikuran. Ejercitopi capitantaq niran: “¡Cheqaqtapunimá kay runaqa Diospa churin kasqa!”, nispa.

“Jayk’aña Diospa promesankuna karan chaypas llapanmi Jesuswan ‘arí’ nisqa kapun” (2 Corintios 1:20)