Kichay leenaykipaq

Índice nisqaman riy

 83 WILLAKUY

Jesús waranqanpi runakunata mijuchin

Jesús waranqanpi runakunata mijuchin

Jesuspa apostolninkunaqa llaqtakunapi predicasqankumantan kutimuranku manaraq 32 watapi Pascua fiesta kashaqtin. Paykunaqa sayk’usqan kasharanku, chaymi Jesusqa boteman wichachispa Betsaida llaqtaman pusaran, chaypi samanankupaq. Ichaqa lamar-qochaq cantonman chayashaqtinkun Jesusqa rikuran waranqanpi runakuna qatikamusqankuta. Jesusqa munaranmi apostolninkunawan sapaqllapi kayta, chaywanpas sumaqtan runakunata chaskiran. Onqosqakunata qhaliyachispataq Diospa gobiernonmanta yachachiran. Tardeyamuytan apostolninkunaqa Jesusta niranku: “Runakunaqa yarqaymantan kashanku, mijunata maskhamunankupaq kachapuy”, nispa.

Jesustaq niran: “Manan ripunankuchu, qankuna mijunata qoychis”, nispa. Apostolkunataq niranku: “¿T’antata rantimunaykutachu munanki?”, nispa. Felipetaq niran: “Qolqenchisña kanman chaypas, manan khaytukuypaqqa rantiyta atisunmanchu”, nispa.

Jesustaq tapuran: “¿Kashanchu mijunaykichis?”, nispa. Andrestaq niran: “Pisqa t’antawan iskay challwallawanmi kashan”, nispa. Jesustaq niran: “Apamuychis t’antata challwatawan”, nispa. Jinan Jesusqa kamachiran runakuna pisqa chunkamanta otaq pachajmanta tiyanankupaq. T’antata challwatawan jap’ispataq cielota qhawarispa Diosmanta mañakuran. Jinaspa apostolkunata niran rakinankupaq. Chaypiqa 5.000 qharikuna, askha  warmikuna, wawakuna iman kasharanku, llapallankutaq sajsanankukama mijuranku. Chay qhepamantaq apostolkuna puchusqanta juñumuranku mana usunanpaq, jinan 12 canastakunata juñuranku. Chayqa milagron karan ¿riki?

Runakunaqa anchatan admirakuranku, chaymi Jesusta rey kananpaq churayta munaranku. Ichaqa manaraqmi tiemponraqchu karan rey kananpaq, chaytan Jesusqa yacharan. Jinan runakunata kachapuspa apostolninkunata boteman seqachiran lamar-qochaq chimpanman rinankupaq. Jesustaq sapallan orqoman wicharan Jehová Dioswan rimananpaq. Imaymana ruwanayoqña kashaspapas Dioswan rimananpaqmi tiempota orqoran.

“Ama ismuq mijunaraykuqa llank’aychischu, aswanpas mana ismuq mijunarayku llank’aychis, chhaynapi wiñay kausayniyoq kanaykichispaq, chaytan runaq Churinqa qosunkichis” (Juan 6:27)