Kichay leenaykipaq

Índice nisqaman riy

 85 WILLAKUY

Jesús sábado p’unchaypi qhaliyachin

Jesús sábado p’unchaypi qhaliyachin

Fariseokunaqa cheqnikurankun Jesusta, jap’iytataq munaranku. Paykunaqa nirankun: “Sábado p’unchaypiqa manan pitapas qhaliyachinanchu”, nispa. Juj sabadon Jesusqa ñausapuni naceq runawan tuparan. Jinan discipulonkunata niran: “Kunanmi rikunkichis Diospa atiynin kay runata yanapasqanta”, nispa. Chaymi Jesusqa thoqayninta allpawan tupachispa t’uruta ruwaran, jinaspa ñausaq ñawinta llusiykuspa niran: “Phaway, Siloam pozopi maqchikamuy”, nispa. Chayta ruwaqtinmi ñausa runaqa qhawaripuran.

Jinan runakunaqa admirakuspa niranku: “¿Kay runachus jina qolqetaqa mañapakuq, icha paymanchu rijch’akunpas?”, nispa. Paytaq niran: “Noqan kashani”, nispa. Jinan tapuranku: “¿Imaynapitaq qhawaripunkiri?”, nispa. Jinan willaran imachus paywan pasasqanta. Chay qhepamanmi aparanku fariseokunawan rimananpaq.

Jinan fariseokunata niran: “Jesusmi t’uruwan ñawiyta llusiwaspa niwaran maqchikamunaypaq. Chayta ruwaqtiymi qhawaripurani”, nispa. Fariseokunataq niranku: “Jesusqa sabadopin qhaliyachiran, chhaynaqa manan Diospa atiyninwanchu ruwan”, nispa. Jujkunataq niranku: “Manachus Diospa atiyninwan kanman chayqa, manan qhaliyachinmanchu”, nispa.

 Jinan fariseokunaqa tayta-mamanta wajachimuspa tapuranku: “¿Imaynapin wawaykichis qhawaripuran?”, nispa. Tayta-mamanqa yacharanmi Jesuspi iñiqqa llaqtankumanta qarqosqa kananta, chaymi niranku: “Manan yachaykuchu, payta tapuychis”, nispa. Jinan fariseokunaqa wajmanta tapupayaranku, chaymi payqa niran: “Llapantañan willaykichis, ¿imaraykun tapupayawankichis?”, nispa. Chaymi fariseokunaqa phiñakuspanku qarqopuranku.

Jesusmi chay runaq kasqanman rispa tapuran: “¿Mesiaspi iñinkichu?”, nispa. Paytaq niran: “Payta reqsispayqa iñiymanmi”, nispa. Jinan Jesusqa niran: “Noqan Mesiasqa kani”, nispa. Jesusqa sumaq sonqon paywan karan ¿riki? Qhaliyachisqan qhepamanpas yanaparanmi paypi iñinanpaq.

“Qankunaqa manan entiendenkichischu Diospa simin qelqatapas ni imaynachus Diospa atiynin kasqantapas, chaymi pantashankichis” (Mateo 22:29)