Jesusqa atirqanmi wayratapas paratapas controlayta. Jesusqa orqopi Diosmanta mañakusqan qhepamanmi rikurqan Galilea lamar-qochata sinchi wayra aytikachashasqanta. Apostolkunaqa tukuy atisqankutan ruwasharqanku botenku mana chinkaykunanpaq. Chaymi Jesusqa orqomanta urayamuspa boteq kasqanman unu patanta purirqan. Apostolkunaqa rikurqankun unuq patanta purimuqta, jinan mancharikurqanku. Chaymi Jesusqa nirqan: “Noqan kani, ama manchakuychischu”, nispa.

Pedrotaq nirqan: “Señor, qanchus kanki chayqa, kamachiway unu patanta jamunaypaq”, nispa. Jesustaq nirqan: “Jamuy”, nispa. Chaymi Pedroqa unu patanta purirqan, ichaqa Jesusmanña qayllaykushaqtinmi lamar-qochaq aytikusqanta qhawarispa mancharikurqan, jinaspa unuman chinkaykusharqan. Chaymi Pedroqa nirqan: “¡Señor aysariway!”, nispa. Jesustaq makinmanta jap’ispa nirqan: “¿Imaraykun iskayarqanki? ¿Maytaq iñiyniykiri?”, nispa.

Jesuswan Pedrowan boteman wichaqtinku jinan lamar-qochaqa thanipurqan. ¿Imaynan apostolkuna sientekurqanku? Nirqankun: “Qanpunin Diospa Churinqa kanki”, nispa.

Jesusqa manan chay kutillapichu wayrata paratapas controlarqan. Juj kutipin apostolninkunawan botepi viajashaqtin payqa boteq jayt’anpi puñusharqan. Jinan lamar-qochaqa sinchita aytikurqan unupas botemanmi junt’aykusharqan. Chaymi apostolkunaqa Jesusta rijch’achispa nirqanku: “¡Señor, wañusunñan! ¡Salvawayku!”, nispa. Jesustaq sayarispa lamar-qochata nirqan: “Samp’ayay”, nispa. Jinan manaña wayramurqanchu, nitaq lamar-qochapas aytikurqanñachu. Jinan Jesusqa apostolkunata nirqan: “¿Maytaq iñiyniykichisri?”, nispa. Paykunataq ninakurqanku: “Wayrapas lamar-qochapas kasunmi”, nispa. Chaywanmi apostolkunaqa yacharqanku Jesuspi confiaspaqa mana imamantapas manchakunankuta.