Kichay leenaykipaq

Índice nisqaman riy

 77 WILLAKUY

Jesús juj warmiwan pozopi riman

Jesús juj warmiwan pozopi riman

Jesuswan discipulonkunawan Galileata viajaranku, viajepin Jesusqa Sicar llaqta qayllapi samaran “Jacobpa pozon” nisqapi. Discipulonkunataq llaqtata riranku mijuna rantiq.

Jinan Samariamanta warmi jamuran unuta orqoq, Jesustaq unuta mañakuran. Warmitaq tapuran: “¿Imaynapitaq Samariamanta kashaqtiy noqawan rimanki? Judiokunaqa manan noqaykuwan rimankuchu”, nispa. Jesustaq niran: “Pichus kasqayta yachawaq chayqa, qanchá unuta mañakuwankiman, noqataq kausay unuta qoykiman”, nispa. Warmitaq niran: “¿Imaynata? Manan unu orqonaykipaq imaykipas kanchu”, nispa. Jesustaq niran: “Unu qosqayta ujaqqa manan jayk’aqpas ch’akichikunqachu”, nispa. Warmitaq niran: “Chay unuta qoykuway”, nispa.

Jesustaq warmita niran: “Phaway, qosaykita wajaramuy”, nispa. Warmitaq niran: “Manan qosayqa kanchu”, nispa. Jesustaq niran: “Cheqaqtan nishanki. Qanqa pisqa qosayoqmi karanki, kunan kaqmi ichaqa tiyaqmasillayki”, nispa. Warmitaq niran: “Profetamá kasqanki, llaqtaypiqa orqopin Diosta adoranku, judiokunataq: ‘Jerusalenpin Diostaqa adorana’, nispa ninku. Mesiaschá yachachiwanqaku imaynata Diosta adorana kasqanta”, nispa. Jinan Jesusqa niran: “Noqan Mesiasqa kani”, nispa.

Jinan warmiqa Samariaman rispa runakunata niran: “Yaqachus jina Mesiasta tarimuni. Payqa tukuytan noqamanta  yachan, rikuchimusaykichis”, nispa. Jinan payta qatikuspa Jesusman riranku yachachisqanta uyarinankupaq.

Chay qhepamanmi Samaria llaqtamanta runakunaqa Jesusta valekuranku llaqtankupi qhepakunanpaq. Jinan iskay p’unchay chaypi qhepakuran paykunata yachachispa, chaymi askha runakuna paypi iñiranku. Jinan runakunaqa warmita niranku: “Jesusta uyarispan yachayku paypuni runakuna salvaq kasqanta”, nispa.

“Pipas ch’akichikuqqa jamuchun; pi munaqpas gratislla ujachun kausay unuta” (Apocalipsis 22:17)