Kichay leenaykipaq

Índice nisqaman riy

 71 WILLAKUY

Jehová Dios Jesusta pakaykun

Jehová Dios Jesusta pakaykun

Israelpa inti lloqsimuy ladopin juj llaqta tarikuran, chaypi tiyaq runakunan creeranku ch’askakuna vidankuta pusarisqanta. Juj tutan wakin runakuna rikuranku cielopi juj ch’aska puririsqanta, jinan qatipamuranku. Chay ch’askaqa Jerusalenmanmi pusamuran. Jinan runakunata tapuranku: “¿Maypin kashan judío runakunaq reynin kananpaq naceq wawa? Paymanmi k’umuykuyta munayku”, nispa.

Chayta uyarispan Jerusalenmanta rey Herodes sinchita mancharikuran, jinaspa sacerdotekunata tapuran: “¿Maypin chay rey nacenan karan?”, nispa. Paykunataq niranku: “Profetakunan willaranku Belenpi nacenanta”, nispa. Jinan Herodesqa ch’aska qhawaqkunata wajachimuspa niran: “Belenpin chay wawataqa tarinkichis. Payta tarimuspa kutimunkichis maypi kasqanta willawanaykichispaq. Noqapas paymanmi k’umuykuyta munani”, nispa. Chayta nispaqa llullakusharanmi.

Jinan ch’askaqa wajmanta puririran, ch’aska qhawaqkunataq qatiparanku. Ch’askaqa juj wasiq patanpin sayaykuran, jinan chay runakunaqa chay wasiman jaykuspanku Jesusta maman Mariatawan tariranku. Jinaspa wawaq ñaupaqenpi k’umuykuspa regalaranku qorita, inciensota, sumaq q’apaq mirratawan. Ichaqa, ¿Dioschu chay ch’aska qhawaqkunata kachamuran? Manan.

Chay tutan Diosqa Joseman mosqoyninpi niran: “Herodesmi Jesusta wañuchiyta munashan. Esposaykita wawaykitawan Egiptoman apapuy, chaypi qhepakamuychis kutimunaykichispaq willanaykama”, nispa. Jinan Joseqa familianta kaqpacha Egiptoman pusaran.

Jehová Diosmi ch’aska qhawaqkunata kamachiran Herodesman ama kutinankupaq. Jinan Herodesqa sinchita phiñakuran, jinaspa Jesusta maskharan. Mana tarispataq kamachiran Belén llaqtapi Jesús jina edadniyoq llapa wawakunata wañuchinankupaq. Jesusmi ichaqa salvakuran Egiptopi kasqanrayku.

 Tiempowanmi Herodes wañupuran. Jinan Diosqa Joseta niran: “Kunanqa manan pipas wañuchisunkichischu, llaqtaykichisman kutipuychis”, nispa. Chaymi José, María, Jesuspas Israel llaqtaman kutipuspa Nazaret llaqtapi tiyaranku.

“Chay jinan rimasqay simiyqa [...] imachus munasqaytan ruwanqa, jinaspan kamachisqayta llapantapuni junt’anqa” (Isaías 55:11)