Kichay leenaykipaq

Índice nisqaman riy

 61 WILLAKUY

Imagenman mana k’umuykurankuchu

Imagenman mana k’umuykurankuchu

Rey Nabucodonosormi qorimanta jatunkaray imagenta ruwachiran, jinan Dura llaqtapi churaspa wajachimuran llaqta umallikunata, chaypin kasharanku Sadrac, Mesac, Abednegopas. Jinan reyqa kamachiran: “Pututuq, arpaq, qenaq tocasqanta uyarispan chay imagenman k’umuykunkichis. Mana k’umuykuqqa nina hornomanmi wijch’uykusqa kanqa”, nispa. Chay kinsantin waynakuna, ¿k’umuykurankuchu chay imagenman, icha Jehová Diosllatachu adorankuman?

Tocanankupaq rey kamachiqtinmi llapallanku k’umuykuranku. Sadrac, Mesac, Abednego ichaqa mana k’umuykurankuchu. Jujkunaqa rikusharankun chayta, jinan reyman willaranku: “Reyniy chay judiokunaqa manan imagenta adorankuchu”, nispa. Chaymi reyqa paykunata wajachimuspa niran: “Wajmanta oportunidadta qosaykichis k’umuykunaykichispaq, mana chayqa hornomanmi wijch’uykusqa kankichis. Manataqmi mayqen diospas salvasunkichischu”, nispa. Paykunataq niranku: “Diosniykuqa salvawankumanmi, manaña salvawaqtinkupas, manan imagenman k’umuykusaqkuchu”, nispa.

Jinan reyqa sinchita phiñakuspa kamachiran qanchis kutikama hornota q’oñichinankupaq, nirantaq: “Chay runakunata wataspa hornoman wijch’uykuychis”, nispa. Hornoqa sinchi ruphan kasharan, chaymi judiokunata wijch’uykuq soldadokunaqa ninaq ruphasqan kaqpacha wañupuranku.  Nabucodonosorqa hornotan qhawaykuran, jinan rikuran tawa runakuna chaypi purishasqankuta. Jinan oficialninkunata niran: “Manachu kinsa runakunata wijch’uykuranchis, hornopiqa tawa runatan rikushani, jujninqa angelchus jina”, nispa.

Jinan Nabucodonosorqa hornoq punkunman qayllaykuspa niran: “Ancha jatun Diospa kamachinkuna lloqsimuychis”, nispa. Llapankun admirakuranku Sadracta, Mesacta, Abednegotapas hornomanta lloqsimusqankuta rikuspa. Manan p’achankupas chujchankupas ruphasqachu, nitaq q’osñimanpas asnarisqakuchu.

Nabucodonosormi niran: “Sadracpa, Mesacpa, Abednegopa Diosninqa ancha jatun Diosmi. Chaymi angelninta kachamuran kamachinkunata salvananpaq”, nispa.

Kinsantin waynakunaqa Jehová Diospaqmi junt’aq sonqo karanku imaña kaqtinpas. Qanri, ¿paykuna jinachu kayta munanki?

“Jehová Diosniykitan adoranki, pay sapallantataqmi servinkipas” (Mateo 4:10)