Kichay leenaykipaq

Índice nisqaman riy

 57 WILLAKUY

Diosmi Jeremiasta kamachiran predicananpaq

Diosmi Jeremiasta kamachiran predicananpaq

Jehová Diosmi Jeremiasta ajllaran Judá nacionpi profeta kananpaq. Paymi runakunaman willanan karan millay ruwayninkuta saqepunankupaq. Jeremiasmi ichaqa niran: “Waynallaraqmi kani, manchakunin runaq ñaupanpi rimayta”, nispa. Jinan Diosqa niran: “Ama llakikuychu noqan yanapasayki, noqan yachachisayki imachus ninaykita”, nispa.

Jehová Diosmi Jeremiasta niran: “Judá llaqtamanta umallikunata juñuspa paykunaq ñaupaqenpi t’uru p’uyñuta p’akinki, jinaspa ninki, chhaynatan Diospas Judá nacionta ruwanqa”, nispa. Chayta ruwaqtinmi umallikunaqa sinchita phiñakuranku, sacerdote Pasjurmi (Pasur) Jeremiasta maqaspa makinkunata chakinkunatapas tablakunawan kanichiran, jinan Jeremiasqa tutantin mana kuyuriyta atiranchu. Tutamantanmi Pasjurqa kacharipuran. Chay qhepamanmi Jeremiasqa niran: “Manan aguataniñachu, manañan predicasaqchu”, nispa. Ichaqa allinta piensaykuspan niran: “Diospa siminqa nina jinan sonqoypi raurarin, chaymi mana upallakuymanchu”, nispa. Jinaspa runakunaman willashallaran Diospa nisqanta.

Unay watakuna qhepamanmi mosoq rey Judá nacionta kamachiran. Sacerdotekuna llulla profetakunan llaqta umalliqkunata niranku: “Jeremiasqa wañunanmi”, nispa. Jeremiastaq niran: “Wañuchiwaspaykichisqa juchallikunkichismi, noqaqa Jehová Diospa niwasqallantan rimani”, nispa. Jinan umalliqkunaqa niranku: “Jeremiasqa manan wañunanchu”, nispa.

 Jeremiasqa predicashallaranmi, jinan umalliqkunapas sinchita phiñakuranku, jinaspa reyta niranku Jeremiasta wañuchinankupaq. Reytaq niran: “Ima munasqaykichista paywan ruwaychis”, nispa. Jinan Jeremiasta jatun t’oqoman wijch’uykuranku, chay t’oqoqa t’uruyoqmi karan, chaymi Jeremiasqa pisi-pisimanta chinkaykusharan.

Judá nacionpi juj umalliqpa sutinmi Ébed-mélec karan, paymi reyta niran: “Umalliqkunan Jeremiasta t’oqoman wijch’uykusqaku, chaypi kaspaqa wañunqan”, nispa. Jinan reyqa kamachiran: “30 runakunata aparikuspa Jeremiasta orqomuychis”, nispa. Chay qhepamanpas Jeremiasqa mana manchakuspan predicashallaran. Qanri, ¿munawaqchu pay jina kayta?

“Sutiyraykun llapa runakunaq cheqnisqan kankichis, pipas tukukuykama aguantaqmi ichaqa salvasqa kanqa” (Mateo 10:22)