Kichay leenaykipaq

Índice nisqaman riy

 67 WILLAKUY

Jerusalenta muyuriq perqakuna

Jerusalenta muyuriq perqakuna

Chikanta ñaupa tiempoman kutirisun. Israel llaqtamanta Nehemiasmi Susa llaqtapi tiyaran. Payqa rey Artajerjestan serviran. Juj p’unchaymi Nehemiaspa hermanon Judá nacionmanta jamuspa willaran: “Jerusalenman kutipuqkunaqa peligropin tarikushanku. Llaqtanchista muyuriq perqapas punkunkunapas thunisqallan kashan”, nispa. Jinan Nehemiasqa sinchita llakikuran. Payqa munaranmi Jerusalenman riyta, chaymi Nehemiasqa Diosta valekuran rey permisota qonanpaq.

Chay qhepamanmi reyqa repararan Nehemías llakisqa kasqanta. Jinan niran: “Manan jayk’aqpas llakisqata rikuraykichu. ¿Iman pasarun?”, nispa. Nehemiastaq niran: “Jerusalén llaqtaymi thunisqa kashan”, nispa. Reytaq tapuran: “¿Imaynatan yanapaykiman?”, nispa. Sonqollanpi Diosmanta mañakuspan Nehemiasqa niran: “Jerusalentan riyta munani perqankunata wajmanta jatarichinaypaq”, nispa. Jinan reyqa permisota qoran, viajepi mana pipas jark’ananpaqtaq yanaparan. Jinaspapas Judá nacionpi kamachikuq kananpaqmi nombraran, maderatapas qoranmi llaqtaq punkunkunata ruwananpaq.

Jerusalenman chayaqtinmi Nehemiasqa llaqta muyuriq perqakunata qhawamuran. Jinaspa sacerdotekunata umalliqkunatawan juñuspa niran: “Manan allinchu kashan, llank’ananchismi kanqa”, nispa. Chaymi paykunaqa “arí” niranku, jinan sayarichiyta qallariranku.

Chaytan wakin enemigonkuna yacharusqaku, jinan burlakuspa niranku: “Jatarichisqaykichis perqataqa atoqllan seqaruspa thunirunman”, nispa. Paykunan ichaqa mana kasuspa llank’ashallaranku. Jinan llaqtata muyuriq perqaqa allintaña sayasharan altopiñataq rikukuran.

Jinan enemigonkunaqa rimanakuranku Jerusalén llaqtata qonqaylla atacanankupaq. Chayta yacharuspan judiokunaqa mancharikuranku. Nehemiasmi ichaqa niran: “Ama manchakuychischu. Diosmi noqanchiswan kashan”, nispa. Jinaspa guardiakunata churaran llank’aqkunata cuidanankupaq. Chaymi enemigonkuqa mana atacayta atirankuchu.

 Llaqta muyuriq perqatapas punkunkunatapas 52 p’unchayllapin ruwayta tukuranku. Jinan Nehemiasqa chayta festejanankupaq Leví runakunata juñumuran. Jinaspa iskay t’aqapi takiqkunata juñuran. Juj t’aqan Esdraswan riran, juj kaq t’aqataq Nehemiaswan riran. Unu pujyu punkuq gradasninta wicharanku, jinaspa sapanka t’aqa llaqtaq perqanta muyurimuranku. Temploman chayanankukaman cornetata, arpata tocaspa, Jehová Diosman takispa ima riranku. Llapa qharikuna, warmikuna, wawakunapas Jehová Diosmanmi sacrificiokunata jaywaranku. Kusisqan kasharanku, chaymi takisqankupas karumanraq uyarikuran.

“Manan ima ruwasqa armapas imanasunkipaschu” (Isaías 54:17)