Kichay leenaykipaq

Índice nisqaman riy

 58 WILLAKUY

Jerusalenta thuninku

Jerusalenta thuninku

Judá nacionpi tiyaq runakunaqa sapa kutillanmi idolokunata adoraqku, jinan Jehová Diosqa profetakunata kacharan llaqtanta yanapanankupaq. Paykunan ichaqa burlakuranku manataq kasukurankuchu, chaymi Diosqa decidiran ídolo adoraqkunata chinkachiyta. ¿Imaynatan chayta ruwaran?

Babilonia nacionmanta rey Nabucodonosormi askha nacionkunata jap’ikapusharan. Chaymi Judá naciontapas jap’ikapuran. Jinaspa rey Joaquinta, umalliqkunata, artesanokunata, allin soldadokunatapas Babiloniaman apapuran. Templopi kaq qoritapas apapuranmi, jinaspa Sedequiasta rey kananpaq churaran.

Qallariypin Sedequiasqa Nabucodonosorta kasukuran. Qhepamanmi ichaqa llulla profetakuna waj runakunapas niranku ama kasukunanpaq. Jeremiasmi ichaqa niran: “Mana kasukuqtiykiqa, runakunan yarqaymanta onqoymanta wañunqaku”, nispa.

Pusaq wata qhepamanmi Sedequiasqa Nabucodonosorta mana kasukuranchu. Chaymi Nabucodonosorqa ejercitonta kachamuran Jerusalén llaqtata muyuykunankupaq. Jeremiasmi Sedequiasta niran: “Jehová Diosmi willan, sichus entregakunki chayqa, manan kay llaqtaqa thunisqachu kanqa, qantapas manan Babiloniaman apasunkikuchu”, nispa. Sedequiasmi ichaqa niran: “Manan entregakusaqchu”, nispa.

 Wata kuskan qhepamanmi soldadokunaqa llaqtaq perqanta juj parteta thuniranku. Chaynintan Jerusalenman jaykuranku, jinaspa llaqtata templotapas kanaykuranku, askha runakunatan wañuchiranku, wakintataq Babiloniaman apapuranku.

Sedequiasqa ayqekuranmi, ichaqa Babiloniamanta soldadokunan Jericó llaqtataña ayqeshaqtin aypaspa Nabucodonosorman aparanku. Jinan Nabucodonosorqa kamachiran Sedequiaspa ñaupanpi wawankunata wañuchinankupaq, jinaspa ñawinkunata orqospa carcelman wisq’achiran, chaypitaq wañupuran. Diosmi ichaqa Judá nacionpi runakunata prometeran: “70 watamantan llaqtaykichisman kutipunkichis”, nispa.

¿Iman pasaran Babiloniaman apasqa waynakunawan? ¿Servishallarankuchu Jehová Diosta?

“Tukuy atiyniyoq Jehová Dios, qanpa juicioykikunaqa cheqaqmi chaninmi” (Apocalipsis 16:7)